Lipjenjo w Praze koncertowali
Hućina a Wukrančicy njejsu přikład
Budyšin (SN/at). Serbski sydlenski rum w Sakskej ma so skrućić. Wo tym je zapósłanc krajneho sejma a mjeńšinopolitiski rěčnik frakcije Lěwicy Hajko Kozel přeswědčeny, po tym zo je hłowny wuběrk braniborskeho sejma minjenu srjedu přisłušnosć dalšich 18 komunow a dźesać wjesnych dźělow dweju gmejnow w tamnišim serbskim teritoriju zwěsćił. Tež w Budyskim a Zhorjelskim wokrjesu je hišće dosć jednanskeje potrjeby. „To měło politisce zamołwitym w Sakskej přiležnosć być, wo mjeńšinopolitiskim połoženju w serbskim sydlenskim rumje swobodneho stata rozmyslować“, piše wón w nowinskej zdźělence.
To a tamne (15.05.17)
Z traktorom do Pětrohroda podać chce so jako „Trecker-Willi“ znaty rentnar z Delnjeje Sakskeje. Ze swojim runje 18 km/h spěšnym traktorom z małym bydlenskim připowěšakom chce 81lětny Winfried Langner sobotu wotjěć. Za jězbu tam a sem planuje štyri měsacy. Dotalne ekstremne jězby ze 56 lět starym traktorom su legendarne: Lěta 2015 poby wón z nim na sewjernym kónčku Norwegskeje, 2013 na Mallorce.
Ze 14 lětami dostudował je hólc w staće USA Texasu. Minjenu sobotu přepodachu jemu diplom. Carson Huey-You je najmłódši student, kiž je hdy na Texas Christian Universtity studij wuspěšnje zakónčił. Jeho hłowny předmjet bě fyzika, připódla studowaše hišće chinšćinu a matematiku. Hólc bě hižo z dwěmaj lětomaj čitać započał a jako dźesaćlětny złoži maturu.
Pjatnaće miliardow je dosć
Berlin (dpa/SN): Najebać přidatne dawkowe dochody stata 54 miliardow eurow hač do lěta 2021 chce CDU dawkipłaćerjam a předewzaćam dawkowe wolóženja we wobjimje najwjace 15 miliardow eurow wot lěta 2018 přizwolić. Tole je frakciski šef Volker Kauder medijam zdźělił. Wotpowědne zakonske zakłady chcedźa po wólbach zwjazkoweho sejma zdźěłać. Tak na to mysla, małym a srěnim předewzaćam dawki spušćić.
Bamž wopyta městno zjewjenja
Fátima (dpa/SN). Bamž Franciskus je so składnostnje 100. róčnicy zjewjenja swjateje Marije do portugalskeje Fátimy podał. W měsće z runje 11 500 wobydlerjemi běchu so hižo dopołdnja dźesaćitysacy ludźi zhromadźili, zo móhli bamža witać, kaž powěsćernja dpa rozprawja. Dźensa rano bě portugalski statny prezident Marcelo Rebelo de Sousa bamža přijał. Po katolskej wěrje bě so swj. Marija wot 13. meje 1917 w Fátimje třom dźěćom cyłkownje šěsć króć zjewiła.
DJV: Žurnalistku pušćić
Wobšěrnu wustajeńcu wo žiwjenju a skutkowanju prěnjeho sakskeho ...
CDU socialdemokratow přesćahnyła
Trump Comeyja wotbyć chcył
Ludźo maja nós połny
To a tamne (12.05.17)
Po zwadźe ze staršimaj je 14lětny młodostny ze wsy njedaloko schleswigsko-holsteinskeho Norderstedta z nanowym awtom typa Porsche wotjěł, po tym zo bě sej klučiki hrabnył. Wottam smaleše do směra na Hamburg. Wobsadka policajskeho awta pachoła zadźerža a wza jeho sobu na stražu. Tam wón přizna, zo bě z awtom twochnył, bjez toho zo staršej to wědźeštaj. Nětko wšak dyrbi z chłostanskim jednanjom jězdźenja bjez jězbneje dowolnosće a njewoprawnjeneho wužiwanja awta dla ličić.
41 kilogramow kokaina su cłownicy w chłódźenskim kontejneru w přistawje Bremerhaven namakali. Na čornych wikach bychu drogi wjace hač šěsć milionow eurow wunjesli, kaž z Hamburgskeho cłowneho zarjada rěka. Ličba tajkich namakankow kaž tež sćazane mnóstwa kokaina spochi přiběraja. Drogi běchu w bananowych kartonach z Ekuadora schowane. Kontejner bě za Rusku mysleny.
Wjeršk aliancy tema był
Berlin (dpa(K/SN). Kanclerka Angela Merkel (CDU) je dźensa generalneho sekretara NATO Jensa Stoltenberga přijała. Jeju zetkanje słužeše přihotam přichodneho wjerška aliancy. Na jeho wuradźowanjach, na kotrychž wobdźěli so prěni raz nowy prezident USA Donald Trump, póńdźe wo bój přećiwo terorej. Tema bě dźensa tohorunja ameriski wid na přeniske wudawki Europy za wojerstwo. Stoltenberg ma ćežki nadawk, zwjazkarjow dowjesć na zhromadnu liniju.
Kandidaća za Macrona
Paris (dpa/K/SN). Politiske hibanje přichodneho francoskeho prezidenta Emmanuela Macrona předstaji dźensa lisćinu kandidatow za parlamentne wólby w juniju. Wšo hromadźe ma 577 kandidatow nastupić – jedyn za jedne sydło w narodnej zhromadźiznje. A woni maja nětčišemu njestronskemu prezidentej při wólbach wunjesć trěbnu wjetšinu za dalše skutkowanje jeho knježerstwa. Macronowe hibanje La République en Marche nastupi strony přesahujcy.
Zeleni kritizuja knježerstwo
