Sym podpisał, dokelž ...
... přez tři europske koparske mišterstwa awtochtonych narodnych mjeńšin europeady lěta 2008 w Šwicarskej, 2012 pola nas we Łužicy a loni w italskim Južnym Tirolu je na polu sporta tójšto spomóžnych zwiskow k narodnym mjeńšinam po cyłej Europje nastało. Při tym móžach w rozmołwach ze sportowčemi a sportowcami zwěsćić, zo podpěra, kajkuž my Serbja w Němskej mamy a jako samozrozumliwu začuwamy, w druhich krajach Europy scyła samozrozumliwa njeje. Tež w sportowym hibanju móhła a měła Europska unija hišće wjac spěchować. Tohodla iniciatiwu FUEN Minority SafePack podpěruju!
Podpisajće tež Wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Federalistiskeje unije europskich narodnych mjeńšin FUEN Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mailowu adresu: .
To a tamne (27.12.17)
Dźěd w delnjofrankskim Wasserlosenje chcyše swojemu wnučkej wěsty puć do pěstowarnje zaručić a filmowaše to. Dokelž je při tym tež druhe dźěći w zjawnosći filmował, wołachu swědcy policiju. Internetnje rozšěrjachu nimo toho powěsć wo nadpadnje zadźeržacym so rentnarju. Pola policije wšak přizjewi so bórze na to mać hólčka, kotraž bě w socialnych medijach wo rozhorjenju zhoniła. Dokelž jězdźi jeje synk z busom do pěstowarnje, bě wona dźěda prosyła zwěsćić, hač su po puću někajke problemy.
Wudźěrak je do hód we wokrjesu Augsburg wobchadne njezbožo ze škodu 15 000 eurow zawinił. 24lětny z awtom jěducy njebě w Stadtbergenje na puć hladał, ale na zasadźenje wohnjoweje wobory. Tohodla je do parkowaceho awta zrazył. Šofer so njezrani, wobě awće pak stej šrot. Wohnjowa wobora pak bě wopak alarmowana, kaž polizija zdźěli.
Z dobrym přikładom doprědka kročić
Južnotirolski krajny hejtman (móžemy w Němskej ze zastojnstwom ministerskeho prezidenta přirunać) Arno Kompatscher je hižo wjacore razy zdźělił, zo budźe k poradźenju wobydlerskeje iniciatiwy Federalistiskeje unije europskich narodnych mjeńšin Minority SafePack přinošować. Němski dźenik w Južnym Tirolu Dolomiten je interview z nim wjedł a přinošk přez Zjednoćenstwo dźenikow w mjeńšinowych a regionalnych rěčach Europy MIDAS, kotremuž tež Serbske Nowiny přisłušeja, redakciji SN přewostajił.
Sće iniciatiwu hižo podpisał?
A. Kompatscher: Haj.
Južnotirolčenjo a Ladinojo maja hižo dobry škit jako mjeńšinje. Čehodla měli woni iniciatiwu podpěrać?
Wjetšina statow za rezoluciju
New York (dpa/SN). Najebać hroženje prezidenta USA Donalda Trumpa, druhim krajam pomocne płaćenja šmórnyć, su čłonske staty UNO wčera z přemóžacej wjetšinu za rezoluciju wo statusu Jerusalema hłosowali. 128 ze 193 krajow, mjez nimi tež Němska, to podpěrowaše. Dźewjeć statow, mjez nimi USA a Israel, wupraji so přećiwo tomu. 35 krajow so hłosa wzda. Rezolucija pak njeje ludoprawnisce zawjazowaca. Palestinjenjo ju witachu, Israel ju raznje porokowaše.
Přiměr na Ukrainje witałoj
Moskau/Berlin (dpa/SN). W konflikće Ukrainy dla staj ruski prezident Wladimir Putin a zwjazkowa kanclerka Angela Merkel (CDU) dojednanje na přiměr wokoło swjatych dnjow a na proze do noweho lěta witałoj. Wobaj wuprajištaj w telefonaće nadźiju, zo mjelčenje bróni tež dlěši čas dźerži, kaž zwjazkowe knježerstwo wčera wječor informowaše. Ukraina a Ruskej přichileni separatisća w Donbasu běchu so srjedu na přiměr přez hody a Nowe lěto dojednali.
Stawk bjez wjetšich sćěhow
Prěni serbski zakoń hódnje wopominać
Chrósćicy (SN/at). Dźěłowe ćežišća lěta 2018 rozjimachu čłonojo Serbskeje lěwicy na swojim kónclětnym zetkanju wutoru w Chrósćicach. Jedne tajke je 70. róčnica schwalenja Zakonja wo zachowanju prawow serbskeje ludnosće 23. měrca 1948 w Sakskim krajnym sejmje. Kaž zapósłanc Hajko Kozel rozłoži, planuje frakcija Lěwicy w sakskim sejmje, z wustajeńcu tónle historiski podawk wopominać. Jako partnerow chce Domowinu, Załožbu za serbski lud a Serbski muzej zdobyć. W dalšim dypku wopominanja ma wo to hić, wuskutki prěnjeho serbskeho zakonja na žiwjenje našeho ludu wuhódnoćić a na zakładźe w Braniborskej płaćiweho aktualneho serbskeho zakonja konsekwency za móžne ponowjenje sakskeho zakonja wotwodźeć.
Hdyž zasady spušćiš
Dalše rozestajenja z Madridom hroža
Barcelona (dpa/SN). Katalanojo su wčera nowy regionalny parlament wuzwolili. Tři strony, kotrež wustupuja za njewotwisnosć Katalonskeje wot španiskeho stata, su sej znowa absolutnu wjetšinu 70 z cyłkownje 135 sydłow regionalneho parlamenta zdobyli. To zdźěli wólbny zarjad po wuličenju nimale wšitkich hłosow. Nětko hrozy nowe koło w rozestajenjach z centralnym knježerstwom w Madridźe. Nimale 82,5 procentow z 5,5 milionow wólbokmanych bě wolić šło.
Najsylniša strona w nowym parlamenće, liberalna Ciudadanos, ma 37 sydłow. Jeje načolna kandidatka Inés Arrimadas je poprawna wólbna dobyćerka. Wona pak nima žanu šansu knježerstwo wutworić, dokelž su móžni koaliciscy partnerojo prosće přesłabi.
Překwapjacy bě wuslědk aliancy w belgiskim eksilu přebywaceho bywšeho regionalneho prezidenta Carlesa Puigdemonta JuntsxCat. Wona docpě 34 mandatow.
To a tamne (22.12.17)
Nastupajo najwoblubowanišej předmjeni lěta 2017 móhłoj Marie a Paul cyle prědku stać, kaž prěnja prognoza Towaršnosće za němsku rěč we Wiesbadenje wěšći. Po wšěm zdaću budu tež Emilia a Emma, Ben a Alexander na načolnych městnach. W dźělnej probje wuhódnoćichu rěčewědnicy daty z dźesać stawnistwow po cyłej Němskej, při čimž su prěnje a dalše mjena runohódnje zapřijeli. Doskónčnu lisćinu prezentuje towaršnosć hakle nalěto.
Přejara z njewobeńdźomnymi hodownymi pěsnjemi nochce so policija w Kemptenje zaběrać. Twitterowała je tuž foto přijimarskeho wokna policajskeje straže z připrawjenym pokiwom: „Hodowne spěwy, kotrež na čuwy du, njejsu přičina, přizjewjenje zapodać. Waša policija.“ Mjenowanej stej předewšěm spěwaj „Last Christmas“ a „Feliz Navidad“.
Wjace energije přetrjebali
Berlin (dpa/SN). Přetrjeba energije w Němskej je lětsa wo 0,8 procentow wyša hač loni. To wujewi dźensa w Berlinje wozjewjene předwobličenje dźěłoweho zjednoćenstwa energijowe bilancy. Wjetšu přetrjebu energije – 461,5 milionow tonow kamjentnowuhlowych jednotkow – je předewšěm dobra konjunktura wuskutkowała. Cyłkownje su podźěle mineralneho wolija, zemskeho płuna a wobnowjomnych energijow přiběrali, jasnje woteběrała pak je přetrjeba jadroweje miliny a kamjentneho wuhla.
Kretschmer optimistiski
Mnichow (dpa/SN). Sakski ministerski prezident Michael Kretschmer (CDU) je so po zetkanju ze šefom koncerna Siemens Joewom Kaeserom wčera w Mnichowje nastupajo zachowanje wot zawrjenja wohroženeju sakskeju twornjow w Zhorjelcu a Lipsku optimistisce wuprajił. Na prašenje, kotre stejnišća maja w přichodźe perspektiwu, ma so „fairnje a sprawnje“ wotmołwić.
Hodowne štomy z Danskeje
Njewšědny wólbny bój w Katalonskej
Barcelona (SN/at). 5,5 milionow wobydlerjow Katalonskeje je dźensa namołwjenych nowy regionalny parlament wolić. Wólby postajiło je španiske knježerstwo, po tym zo bě justica kraja w oktobrje referendum wo njewotnisnosći zakazała. Dotalne regionalne knježerstwo Carlesa Puigdemonta bě jón přiwšěm přewjedło, byrnjež centralne knježerstwo ze stolicy Madrida wulki ćišć wukonjało.
W Madridźe nadźijeja so přichodneho regionalneho knježerstwa w Barcelonje, kotrež so separatizma wotrjeknje. Aktualne naprašowanja pak rysuja hinaši wobraz: Separatistiske strony móhli sej najebać jara napjaty bój z přećiwnikami njewotwisnosće Katalonskeje móc zaso zdobyć. Hač to za absolutnu wjetšinu 68 sydłow w regionalnym parlamenće dosaha, njebě hač do dźensnišeho dnja jasne. Rěč bě samo wo hrožacym njerozsudnym połoženju, z dlijacymi so koaliciskimi jednanjemi.
