Wuznamny serbiski basnik, publicist a docent dr. Mićo Cvijetić, njesprócniwy přełožowar a wudawaćel tež serbskeje literatury w Serbiskej, je njeboh.

Lěta 1946 rodźeny a po dołhej ćežkej chorosći spočatk tydźenja zemrěty kulturny a narodny prócowar bě wot lěta 1978 do 1982 hóstny lektor na uniwer­siće w Lipsku, hdźež zezna so ze Serbami a sej serbšćinu přiswoji.

Z toho časa horješe so za serbsku rěč, stawizny, literaturu a kulturu Serbow. Swoje doktorske dźěło, kotrež wěnowaše stykam mjez łužiskimi a južnymi Serbami, zakitowaše lěta 1989 na uniwersiće w Beogradźe.

Hižo do toho bě poněčim po cyłym kraju znaty basnik klasisku, nowotarsku a tehdy młodu serbsku poeziju započał přełožować do swojeje maćerneje rěče, ju wudawać w juhosłowjanskich časopisach a prezentować w radiju. Z toho časa je wurostło horliwe a zaměrne přełožowanske a publicistiske skutkowanje, wotkrywace serbsku literaturu a posrědkowace wědu wo najmjeńšim słowjanskim ludźe w Serbiskej. Wo tutej horliwosći swědča mnohe wědomostne a esejistiske publikacije kaž tež zběrki a antologije serbskeje poezije.

Wjace wobdźělnikow we wšitkich technikach

Jubilejne wubědźowanje wo najrjeńše serbske jutrowne jejko, kotrež je Spěchowanski kruh za serbsku ludowu kulturu lětsa 70. raz wuhotowało, je zakónčene – znajmjeńša, štož nastupa dorosćenych, dźěći a młodostni móža swoje kolekcije hišće hač do 17. apryla zapodać. Cyłkownje je so na lětušim wurisanju 33 žonow a muži w starobje wot 18 do 76 lět z dohromady 61 kolekcijemi po stajnje třoch wudebjenych jejkach wobdźěliło. „To je zwjeselaca wyša ličba porno lońšemu wubědźowanju“, podšmórnje ze stron Domowiny za wurisanje zamołwita projektowa managerka Rejzka Krügerowa, pokazujo na rozrost wo něhdźe třećinu. Předewšěm „hladajo na kategoriji ‚Wóskowanje wjacebarbne‘ a ‚Wužrawanje‘ je zajim wočiwidnje přiběrał. Loni mějachmy w nimaj šěsć kolekcijow resp. jenož dwě kolekciji, lětsa je jich dwanaće resp. sydom.“

Wobdźělnicy nic jenož z Łužicy, dobyćerka z Hessenskeje

Drježdźany (CR/SN/mb). Hač smě Gerhard Zschau, designer mody a załožer łužiskeje marki LABA, T-shirt z wobrazom linolorězby Hanki Krawcec z lěta 1974 předawać, kotraž běše so na tehdom hižo 14 lět staru rysowanku złožiła, njeje po wčerawšim jednanju wyšeho krajneho sudnistwa w Drježdźanach jasne. Hakle 4. jutrownika chce sudnistwo swój wusud wozjewić, po tym zo je wčera wurunanje zwrěšćiło. W lěće 1960 portreto­wana spyta tomu zadźěwać, zo Zschau „portret Moniki“ jako motiw T-shirta w rjedźe „stari mištrojo“ wužiwa (SN wospjet rozprawjachu). Před krajnym sudnistwom w Zhorjelcu je wona dobyła, a Zschau njesmědźeše hižo produkowanych sto eksemplarow předawać.

Drježdźany/Wojerecy (SN/at). Wojerecy su zajimawe za Němski hygienowy muzej w Drježdźanach. Wo tym swědči „Festiwal wopačneje wěrnosće“, kotryž traje jako třeća faza „Fake-projekta we Wojerecach“ hišće hač do 15. měrca. Hygienowy muzej dźěła tu wusko ze sociokulturnym centrumom Kulturna fabrika hromadźe.

Za kompetentnymi partnerami w prowincy su pytali a po rešeršach na nje we Wojerecach storčili, rozprawja Marian Zabel, sobudźěłaćer za zjawnostne dźěło hygienoweho muzeja. Na přikład su muzejownicy za wobstejacymi strukturami hladali. Tajke Kufa abo tež Energijowa ­fabrika sćělesnjujetej. Jednaćel Kufy, Uwe Proksch, tele prócowanja z krajneje stolicy wobkrući. „Woni běchu na partnerach w prowincy zajimowani“, wón na spočatki zhromadneho dźěła zhladuje. „Spočatnje smy na kulturnu krajinu na městnje nawjazać chcyli, kotraž njesměła přejara zdalena z Drježdźan być“, Zabel wujasni. Kufa běše kluč, z kotrymž su so Drježdźanscy muzejownicy za Fake-projekt w měsće dalšich partnerow wotkrywali.