Skónčnje nowe rumnosće za balet SLA – a kajki to rjany napohlad, hdyž wonka nimo běžiš a přihladować móžeš, kak rejwarki a rejwarjo zwučuja. Tola kak posudźuja to poprawom ći zwučowarjo? Na wčerawšej probje „Łužičanki“ njebě wo wulkich woknach, kotrež wid do žurle a na móžnych wonka stejacych přihladowarjach dowola, ničo pytnyć. Ze zahoritosću wěnowachu so „Łužičanki“ rejwanskej wučerce. Wjeselo při rejwanju widźomnje přesahowaše. Při tym ani na staršich, kotrychž dźěći so wčera prěni raz na probje wobdźělichu, njehladachu. A kak je to pola profijow? Myslu sej, zo woni jako wuměłcy za to trenuja, zo bychu na jewišću nazwučowane choreografije pokazali. Tuž su na přihladowarjow zwučeni a jim rozdźěl zawěsće njenadpadnje. Jako so potom, tróšku do kónca z proby, wotsalich, widźach wonka štyri starše žony, kotrež probje zajimowane přihladachu. Wotmysł, kedźbnosć na so sća­hnyć, je so tuž docpěł. Božena Šimanec

Tójšto zajimcow přiwabi wernisaža wosebiteje wustajeńcy „Zynk & barba“ wčera w Budyskim Serbskim domje. Na wjacorych poschodach pokazuje přehladka twórby, nastate we wobłuku 9. mjezynarodneho festiwala dudakow w Slepom wuhotowaneje molerskeje dźěłarnički pod nawodom Maje Nageloweje. Wo hudźbne wobrubjenje wotewrjenja postara so Serbski folklorny ansambl Slepo, tola tež wopytowarjo někotružkuli serbsku ludowu štučku zaspěwachu. Zarjadowar přehladki je towarstwo Spěchowanski kruh za serbsku ludowu kulturu. Foto: Maćij Bulank

We wobłuku dnja wotewrjeneho pomnika w Smochćicach wotměchu njedźelu popołdnju wosebity koncert. Spěwarjo Wojerowskeho komorneho chóra pod nawodom Anity Däbritz a skupina Wólbernosće podachu so zhromadnje z publikumom po ležownosći kubłanišća swj. Bena a spěwachu na sydom wuzwolenych městnach. Při tym přednjesechu ludowe a wuměłske pěsnje z wjacorych kontinentow. W jubilejnym lěće zaklinčachu wězo tež twórby Zejlerja a Kocora. Foto: Leńka Thomasowa

„Serenada w zelenym – Kocor & Zejler reloaded“ bě hesło koncerta, zahajaceho takrjec tradicionalne Němsko-Serbske nazymske wiki w Stróži. Najebać sylny dešć, kotryž zawini nimale hodźinske zapozdźenje, dožiwi něhdźe 40 zajimcow minjeny pjatk w stanje na łuce při Domje tysac hatow program, wopřijimacy na přikład pop, jazz a elektronisku hudźbu. Interpreća Trio a kumple – z hosćom bě mjez druhim spěwarka Milena Wowčerjec – běchu sej za njón wjacore kompozicije Korle Awgusta Kocora a Handrija Zejlerja wuzwolili a wobdźěłali, při čimž so prašenju wěnowachu, „kak drje bychu twórby klinčeli, bychu-li dźensa nastali“. Foto: Jurij Helgest