Wosebity adwentny kalender poskićuje wot 1. decembra Němsko-Serbske ludowe dźiwadło. Kóždy wječor wotydźenja budźe adwentny wóz we wjeskach mjez Wotrowom a Radworjom, Sulšecami a Bukecami pozastać. Tuchwilu so jeničce za tutón čas připrawjene mobilne jewišćo w dźiwadłowej dźěłarni twari. Ćěsla Bert Zimmermann (nalěwo) a molerka dźiwadłoweje dźěłarnje Tina Jungheinrich připrawitaj murje, po do toho zhotowjenym małym modelu. Foto: SN/Hanka Šěnec

Na lětušej schadźowance přihladowarjo podarmo za šćipatymi, aktualnymi temami pytali njejsu. Hač staj to načolnikaj institutow sorabistiki w Lipsku a Drježdźanach, kotrajž so wo tym wadźitaj, z čehož klina nětk ći lěpši – wězo – mužojo wuńdu. Hač su to „Krawcojo“, kiž pytaja nowe zetkawanišćo w Drježdźanach a so pobrachowaceje kedźbnosće dla na kóncu z protesta sem kruće nalěpja. Abo hač je to přeco zaso aktualna tema serbskeho dorosta, zo so starša generacija boji, jelizo młodźi raz přez kromu talerja pohladnu. Tež kabaret wo PowerSerbje měješe zajimawe a do hłubokosće sahace myslički. Ramikowy kulturny program pjelnješe serbsku dušu wospjet z nowej energiju. Ale wosebje moderacija přeswědči, wšako dopokazaštaj moderatoraj, zo zamóžetaj z wěstym wot­stawkom a we wuběrnje nawuknjenej serbšćinje zabawjeć. A časopis serbskich studowacych Šeršeń da nadźiju za snadź žurnalistiski dorost za Serbske Nowiny. Božena Šimanec

Budyšin (SN/bn). Pianistka Liana Bertók a čłon chóra Serbskeho ludoweho ansambla Pětr Cyž staj předwčerawšim w Budyskej Röhrscheidtowej bašće druhi komorny koncert pod hesłom „Pěseń moja, pozběhń so“ na česć Jana Pawoła Nagela składnostnje lětušich 25. po­smjertnin wuznamneho serbskeho komponista wuhotowałoj. Jeju dramaturgisce wušiknje zestajany, wjelorake fasety wobkedźbowacy program wopřijimaše wjacore, serbsce a němsce zanjesene wuměłske spěwy Nagela z cyklusa „Pjeć chutnych pěsnjow“ a jednotliwe sadźby z jeho klawěrnych kompozicijow, kaž na přikład ze „Sonatiny za klawěr“ a z „Kocoriana-suity w starym stilu“. Mjez hudźbnymi přinoškami čitaše Cyž wujimki z awtobiografije Nagela „Dźěćatstwo w Złyčinje“, sposrědkowawši ně­hdźe 25 wopytowarjam dožiwjenja a nazhonjenja hólčeca krótko do kónca Druheje swětoweje wójny, wuwiće wuměłca a wutworjenje „serbskeho wědomja“ čłowjeka Johanna Paula Horsta Nagela.

Wosebitej hudźbnej projektaj hižo tójšto dobreho wothłosa žnjałoj

Z dźeń a wjetšim poskitkom w syći směmy so předewšěm tež nad mnohotnosću serbskich hudźbnych projektow wjeselić. Projektaj skupiny Astronawt ze Serbskim ludowym ansamblom (SLA) a nowy format kooperacije sćelaka MDR JUMP a skupiny Brankatschki „Popsorben“, słušatej k najnowšim wupłodam na tutym polu. Wobaj pokazatej jasnje angažement sobuskutkowacych a pisanosć idejow w zwisku ze serbstwom.

„Cyle nowe a wosebite nazhonjenje“