Wo wólbach sejma
Freitag, 02. August 2019
geschrieben von: Měrćin Weclich
Budyšin (SN). Do wólbow w septembrje su jenož hišće někotre tydźenje. W měsačnym magacinje Wuhladko, kotrež jutře, 3. awgusta, w 11.45 hodź. w telewiziji MDR wusyłaja, so kandidatow do toho prašeja: Hraja Serbja we wólbnym boju scyła rólu? Kak wupada ze zdźerženjom a spěchowanjom rěče a kultury? Kotry wuznam maja kandidatam serbske šule a institucije?
Dalšej temje wusyłanja stej zhladowanje na přewšo wuspěšny a něhdźe 22 000 wopytowarjow wokřewjacy XIII. mjezynarodny folklorny festiwal spočatk julija w Budyšinje, Hochozy a Chrósćicach kaž tež „són wo serbskim staće“. Z tajkej wiziju bě so Arnošt Bart 1919 z Budyšina na měrowu konferencu do Parisa podał.
Festiwal we Wuhladku
Freitag, 05. Juli 2019
geschrieben von: Serbske Nowiny
Mjezynarodny folklorny festiwal „Łužica 2019“ je jedna z temow přichodneho hornjoserbskeho telewizijneho magacina Wuhladko jutře, sobotu, w 11.45 hodź. na sćelaku MDR. Wjeršk drje budźe hakle sobotu wječor, festiwal zahajili pak su hižo wčera. Nimo toho rozprawjeja we wusyłanju wo měšniskej swjećiznje Pětra Mróza w Drježdźanach a wo jeho primicy swjatki w Kulowje. Dalša tema budu twarscy wojacy Narodneje ludoweje armeje, kotřiž běchu ćicha opozicija a zdobom rjap wučerpaneho hospodarstwa NDR. Přiběraceje ekonomiskeje krizy wotsrjedź 1980tych lět dla su so woni na wulkotwarnišćach a w industrijowych zawodach wo to starali, zo so hospodarstwo njesypnje.
Wo zjawnej diskusiji
Freitag, 14. Juni 2019
geschrieben von: Měrćin Weclich
Choćebuz (SN). Junijske wudaće delnjoserbskeho telewizijneho magacina Łužyca jutře w 13.40 hodź. telewiziji RBB je nahrawanje podijoweje diskusije na temu „Wumrěje serbska rěč?“ Diskusijny wječor w Choćebuskim měšćanskim domje je 6. junija Christian Matthée moderěrował. Debatowali su tam čłonka Rady za serbske naležnosće Braniborskeje Angela Šurmanowa, Astrid Šramina z Gołbinskeje drastoweje skupiny, referent krajneje zamołwiteje za naležnosće Serbow Měto Nowak, direktor Serbskeho instituta dr. Hauke Bartels a prof. Edward Wornar, direktor Inistituta za sorabistiku na Lipšćanskej uniwersiće.
Jutře nowe Wuhladko
Freitag, 31. Mai 2019
geschrieben von: Marian Wjeńka
Budyšin. Nadawki noweje rady Załožby za serbski lud budu jedna z temow přichodneho hornjoserbskeho magacina Wuhladko jutře, sobotu, w 11.45 hodź. na MDR. Dale zaběraja so we wusyłanju z twarskimi wojakami za čas NDR.
Na wopyće w Hochozy
Freitag, 17. Mai 2019
geschrieben von: Měrćin Weclich
Choćebuz (SN). W mejskim wudaću delnjoserbskeho telewizijneho magacina Łužyca wita moderator Christian Matthée přihladowarjow jutře, 18. meje, w 12.40 hodź. w telewiziji RBB ze serbskeje wsy Hochozy. W srjedźišću wusyłanja steji tamniši wjesnjanosta Fryco Wojto (Njewotwisna wolerska skupina Hochoza). Wón je po słužbnych lětach najstarši wjesnjanosta Braniborskeje. Prjedy hač 78lětny hišće w róžowniku zastojnstwo złoži, zhladuja we wusyłanju na jeho 25lětne njesprócniwe skutkowanje jako prěni muž gmejny we wokrjesu Sprjewja-Nysa.
Přihoty na wólby
Freitag, 03. Mai 2019
geschrieben von: Měrćin Weclich
Budyšin (SN). Kónc meje su komunalne wólby w Sakskej. Tež w dwurěčnej Hornjej Łužicy wolimy měšćanske, gmejnske a wjesne rady kaž tohorunja wokrjesne sejmiki. Wuhladko, kotrež jutře, 4. meje, w 11.45 hodź. telewizija MDR wusyła, někotrych serbskich kandidatow zetka a předstaji, kotre temy su jim wažne a kak chcedźa pomhać serbske zajimy w komunalnej politice přesadźić. Nimo toho wěnuja so w mejskim magacinje 40lětnemu wobstaću folklorneje skupiny Sprjewjan a pobychu na wopyće pola pčołarja. Dalša tema je „cirkus w šuli“, hdźež 120 Worklečanskich šulerjow swoje akrobatiske, artistiske a dalše zamóžnosće pokaza.
Wo přesydlenju
Freitag, 12. April 2019
geschrieben von: Měrćin Weclich
Choćebuz. W aprylskim wusyłanju delnjoserbskeho telewizijneho magacina Łužyca wita moderator Christian Matthée přihladowarjow z tradicionalnych Slepjanskich jutrownych wikow. W rozmołwach a přinoškach wěnuja so redaktorojo mjez druhim zakładnemu zrěčenju wo přesydlenju Miłoraza, Serbskemu institutej a strukturnej změnje we Łužicy. Dalše temy su serbske jutrowne nałožki, Europeada 2020, hłowna zhromadźizna Domowiny w Chrósćicach, młodźi ludźo ze serbskimi korjenjemi a dźeń přichoda w Choćebuskim studiju RBB. Magacin Łužyca wusyłaja jutře, 13. apryla, w 13.30 hodź. w telewiziji RBB.
Bilancuja „hłownu“
Freitag, 05. April 2019
geschrieben von: Měrćin Weclich
Budyšin (SN). 30. měrca je so w Chrósćicach něhdźe 190 delegatow ze wšěch župow a čłonskich towarstwow Domowiny k 19. hłownej zhromadźiznje třěšneho zwjazka zešło. Nimo bilancowanja dotalneho dźěła chcychu so delegaća tež aktualnym a nowym politiskim wužadanjam wěnować. To je hłowna tema magacina Wuhladka jutře, 6. apryla, w 11.45 hodź. w telewizijnym sćelaku MDR. Nimo toho póńdźe we wusyłanju wo Alfreda Krawca-Dźěwinskeho, wuznamneho, mjezynarodnje připóznateho filmoweho wědomostnika Němskeje a wo dwacećilětne wobstaće młodźinskeho Radija Satkula.
Dwurěčnosć „strašna“
Freitag, 01. März 2019
geschrieben von: Měrćin Weclich
Budyšin (SN). Mjeztym zo su dwurěčne wjesne a dalše tafle w serbskim sydlenskim rumje w Sakskej a Braniborskej samozrozumliwe, Zwjazk tajke za awtodróhi wotpokazuje. To wuchadźa z naprašowanja zapósłanca Zelenych w zwjazkowym sejmje Stephana Kühna. Na małe naprašowanje jeho frakcije wotmołwi wobchadne ministerstwo, zo njeje z wěstotnych přičin móžno dwurěčne tafle při awtodróhach nastajić. Předsyda Domowiny Dawid Statnik nima za argument žane zrozumjenje. Wo tym, wo lětušim Kulowskim karnewalu a dalšich zajimawych temach rozprawja jutře, 2. měrca, w 11.45 hodź. magacin Wuhladko w telewiziji MDR.
Kak dale ze serbšćinu?
Freitag, 15. Februar 2019
geschrieben von: Měrćin Weclich
Choćebuz (SN). W februarskim wudaću delnjoserbskeho telewizijneho magacina Łužyca je moderator Christian Matthée na wopyće pola prof. Eduarda Wornarja, direktora Lipšćanskeho Instituta za sorabistiku, a pola serbskich studentow. Ćežišćo rozmołwy je po ewaluaciji serbskeho kubłanskeho poskitka na zakładnych šulach Delnjeje Łužicy prašenje: „Kak dale ze serbskej wučbu?“ W magacinje, kotryž RBB jutře, 16. februara, wot 13.30 wusyła, předstaja tež Jakuba Gruhla. Młody rapper je za delnjoserbske bramborske radijo basnje delnjoserbskeje poetki Miny Witkojc zhudźbnił.
