Aus der aktuellen Ausgabe vom Dienstag, 28 Juni 2016

Truskalcy so derje radźili

Dohna. Z wotmachom w Sakskej tuchwilu truskalcy žněja. Dźakowano słónčnym dnjam a najebać nachwilny dešć w někotrych kónčinach su so wone lětsa derje radźili, zdźěli krajny zwjazk Sakski sad dźensa w Dohna. Wjace hač 30 ratarjow po zdźělenju zwjazka truskalcy na 295 hektarach w 20 wšelakich družinach plahuje. Połojca płoniny je za samošćiparjow.

Pčołarjow dale podpěrać

Drježdźany. Sakska chce pčołarjow kraja dale podpěrać a přewostaja za to hač do lěta 2019 wjace hač 280 000 eurow. Po informacijach ratarskeho ministerstwa ličba pčołarjow tež dźakowano spěchowanju minjenych lět dale přiběra. Pjenjezy maja so za dalekubłanje pčołarjow nałožić.

Staršiski pjenjez spěšnišo

Praha. Čěscy starši móža po narodźe dźěsća wot stata garantowany staršiski pjenjez 8 150 eurow nic kaž dotal hakle w běhu dweju lět, ale hižo w šěsć měsacach wučerpać. Po słowach ministerki za dźěło a socialne naležnosće Michaele Marksoveje měła nowela pomhać wosebje maćerjam ze snadnymi dochodami kaž tež wšěm tym, kotřiž dyrbja abo chcedźa so zaso do dźěła nawróćić.

Lětnje wjedro njebě dotal tajke, kaž sej to wikowarjo drasty přeja. Zo bychu přiwšěm swoje składy tróšku wuprózdnili, wabja kupcow nětko z dobrymi poskitkami. To wězo předawarjam, kaž je to Björn Kalich z Budyskeho wobchoda Atrium, dźěło wolóža. Tež Kathrin Wehser so wjeseli, hdyž móže při nakupowanju za dowol někotre fenki lutować. Foto: SN/Maćij Bulank

Dwanaty króć přeproša Łužiske hudźbne lěćo wot 15. do 31. julija na dohromady 16 zarjadowanjow. Wone wotměja so w Budyšinje, Chróstawje, Kamjencu, Njeswačidle, Smochćicach a Žitawje.

Mjeńšinowe dźiwadła so na mjezynarodny projekt dojednali

Bruneck (SN/CoR). Z europeadu před štyrjomi lětami we Łužicy bě so tež za dźiwadła europskich narodnych mjeńšin nowa doba zhromadneho dźěła započała. Tež tónraz wužiwachu wuměłcy turněr, zo bychu so runja koparjam w italskim Južnym Tirolu zetkali a wo dalšim zhromadnym postupowanju wuradźowali. Na dźěłarničce wot 22. do 24. junija wobdźělichu so w Měšćanskim dźiwadle Bruneck nimo njeho Němsko-Serbske ludowe dźiwadło Budyšin, Theatr Genedlaethol Cymru z Waliziskeje, dźiwadło němskorěčneho zhromadźenstwa Belgiskeje AGORA a Teatr Żydowski z Pólskeje. A wone dojednachu so na to, zhromadny projekt „VÔX – To give minority languages a voice“ (Mjeńšinowym rěčam hłós dać) pola spěchowanskeho programa Europskeje unije Creative Europe zapodać. Kłobuk za cyły projekt staji sej NSLDź. Hač do 5. oktobra chce próstwu zapodać, z přizwolenjom liči klětu nalěto. Prěnje wuslědki chce 2018 prezentować.

Něhdźe 30 000 sakskich šulerjow je so 21. junija na akciskim dnju „genialsocial“ wobdźěliło. Tón dźeń wuměnichu hólcy a holcy 6. do 10. lětnika šulsku ławku z dźěłowym městnom.

Budyšin (SN/mwe). „Hišće njeje doskónčnje zličene, kelko wobdźělnikow je kelko pjenjez nadźěłało. Srjedź julija to potom wěmy. Je pak wotwidźeć, zo je so lětsa wjace šulow na akciji wobdźěliło.“ To zdźěli Andrea Büttner, jednaćelka sakskeje młodźinskeje załožby a za „genialsocial“ zamołwita, Serbskim Nowinam.

Kamjenska Lessingowa biblioteka přeproša dźěći a młodostnych w starobje jědnaće do 16 lět w lětnich prózdninach zaso na čitansku akciju. Štóž w času prózdnin znajmjeńša tři knihi přečita, dóstanje za to wosebity certifikat, kotryž móže wučerjej němčiny předpołožić. Nawodnica knihownje Marion Kutter so wjeseli, zo je so dotal 87 zajimcow přizjewiło, mjez nimi šulerjo Serbskeho gymnazija Budyšin. Witane su na knižne lěćo radlubje tež dźěći ze serbskich wsow. Foto: Lennart König

Łaz/Grodk (SN). Wjac hač 40 šulerjow 9. lětnika Wyšeje šule Łaz wopyta njedawno pjeć zawodow we wokolinje Grodka. Zarjadowanje powołanskeje orientacije organizowało bě Grodkowske předewzaće za hospodarske spěchowanje (ASG). „Chcychmy zawodam zmóžnić, swoje powołanske předstawy na městnje rozjasnić, hdyž wučomnicy zajimcam wočakowanja na powołanje wosobinsce wuswětleja“, potwjerdźi Arwed Obst z ASG.

Wobdźělili su so mjez druhim Čornopumpske transportne předewzaće, blidarnja Łužica a zawod Knauf, kotryž zhotowja wudźěłki z gipsa. Tež powołanja fy­zioterapeuta, socialneho asistenta, kubłarja a mechatronikarja su wopytowarjam předstajili. Předewzaćeljo kaž šulerjo běchu ze zarjadowanjom jara spokojom, wšako móžachu tak wosobinski kontakt nawjazać. Přewodźacy wučerjo běchu překwapjeni wo wukubłanskim potencialu regiona. Tu móža šulerjo mjez wjele powołanjemi wuzwolić. Klětu chcedźa zamołwići znowa zarjadowanje přewjesć.

Berlin (dpa/SN). Zwjazkowy sejm zaběra so dźensa na wurjadnym posedźenju ze sćěhami­ britiskeho rozsuda, Europsku uniju wopušćić. Kanclerka Angela Merkel (CDU) přednjese k tomu knježerstwowe wozjewjenje, w kotrymž apeluje na rozwažne wobchadźenje z Wulkej Britaniskej. Merkel skedźbni na to, zo je kraj dale zhromadny zwjazkar w NATO kaž tež mjezynarodnych wjerškow G 7 a G 20. Koaliciski partner SPD žada sej spěšne jednanja wo wustupje Britow z EU. Kritikarjo maja dołholětne lutowanske naprawy kanclerki za přičinu njespokojnosće wobydlerjow EU.

Bonitu kraja pomjeńšili

Frankfurt nad Mohanom (dpa/SN). Po wotumje wustupa Wulkeje Britaniskeje z Europskeje unije su dalše ratingowe agentury jeje kreditowu hódnotu pomjeńšili. Tak zniži agentura Fitch bonitu wot AA+ na AA. Rozsud, z EU wustupić, wuskutkuje so negatiwnje na britiske hospodarstwo, zjawne financy a politisku kontinuitu, informuje ratingowa agentura. Njewěstosće dla zniži Fitch prognozy rozrosta za lětsa a přichodnej dwě lěće.

Alternatiwa za Čěsku załožena

Na spočatku lětnich prózdnin we wjacorych zwjazkowych krajach nastaji wobswěto- a přirodoškitny zwjazk BUND ze swojim před­sydu Hubertom Weigerom (hlej foto) dźensa při Baltiskim morju pola Zingsta tafle, kotrež dowolnikow namołwjeja so wo čistotu­ starać a wotpadki sobu domoj brać, zo njeby so morjo dale zanjerodźiło. Foto: dpa/Jens Büttner

Dieselowu lokomotiwu pokradnyć spytał je 21lětny w Halle nad Solawu. Tam bě so wón do porjedźernje lokomotiwow na ležownosći Němskeje železnicy za­dobył, hdźež chcyše ćežke jězdźidło startować. Sobudźěłaćer železnicy jeho lepi a zawoła policiju. Kaž muž zastojnikam wuzna, chcyše wón lokomotiwu měć, zo by z njej jězdźić móhł. Při tym njesteješe ani pod wliwom alkohola ani drogow. Nětko wšak dyrbi ze skóržbu ličić.

Nachribjetnik z 30 000 eurami je 61lětny w ćahu zabył. Muž bě po puću z Frankfurtskeho lětanišća do Wiesbadena. Po tym zo bě wón ćah na hłownym dwórnišću we Wiesbadenje wopušćił, jemu po někotrych mjeńšinach napadny, zo nima nachribjetnik při sebi. Jako so do ćaha nawróći, pak bě tón hižo fuk. Podarmo muž za nim pytaše. Za čo telko pjenjez trjebaše, nichtó njewě.