Ryby zaso w srjedźišću
Klětno. We wobłuku 17. łužiskich rybowych tydźenjow su tónle kónc tydźenja hnydom wjacore zarjadowanja. Tak přeprošuja jutře, sobotu, wot 10 do 16 hodź. na rybarski swjedźeń při Klětnjanskim Maksimilianowym haće. W samsnym času přewjedu při Starym haće we Wysokej (Weißig) pola Wóslinka tradicionalne wułójenje. A zajutřišim, njedźelu, wot 11 do 14 hodź. witaja zajimcow w hosćencu „Wichowski dwór“ pola Wósporka na hornjołužiski rybowy bifej.
Na wulke kermušne wiki
Koćina. Při po wšěm zdaću słónčnym nazymskim wjedrje wočakuja jutře sta zajimcow na žnjowy dźakny swjedźeń a kermušne wiki, kotrež wotměja so wot 10 do 17 hodź. w Koćinskim zawodźe Krabatowy mlokowy swět. Wjeselić smědźa so wopytowarjo na mnohich direktnych zwičnjerjow z cyłeje Sakskeje, kotřiž tam swoje čerstwe žiwidła a dalše wudźěłki poskića. Mjez druhim móžeš sej tam swoju zymsku potrjebu běrnow zaručić, a to k wosebitej płaćiznje. Z najwšelakorišimi kulinariskimi wosebitostkami staraja so tež wo ćělne derjeměće wopytowarjow.
Posledni swjedźeń do přetwara
Motocrossowe wubědźowanje
Při starej tankowni w Sepicach přewjedu jutře motocrossowe wubědźowanje „Cross Country Sepicy“. Zarjadowar je motorsportowe towarstwo Quad Point Sepicy. Prěnje wubědźowanje započnje so w 9.30 hodź., dalšej stej w 11 hodź. a 13 hodź. Wulke endurowurisanje budźe w 14 hodź. Mytowanje dobyćerjow je za 16.10 hodź. planowane.
MC Jawora poskići kurs
Motorsportowy klub MC Jawora poskići wšitkim staršim a jich dźěćom kurs za započatkarjow. Termin je 14. oktober 2018. Přizjewić smědźa so holcy a hólcy w starobje pjeć do dwanaće lět, a to z pomocu přizjewjenskeho formulara, kotryž steji na internetnej stronje MC Jawory.
Kónctydźenska kopańca
Po tydźenskej přestawce pokalneho koła dla hraja koparjo na wokrjesnej runinje zaso wo dypki.
13.10. 13:00 SV Liegau-Augustusbad – SJ Njebjelčicy II
13.10. 15:00 Módro-běli Kulow
– Motor Kumwałd
13.10. 15:00 HZ Łaz/Běły Chołmc
– SJ Chrósćicy II
13.10. 15:00 ST Mały Wosyk
– ST Marijina hwězda
14.10. 13:00 Sokoł Ralbicy/Hórki
– Zeleno-běli Bukecy
14.10. 15:00 SG Großnaundorf
– Rakečanske ST
14.10. 15:00 Natwar Němske Pazlicy
– ST Radwor
14.10. 15:00 SJ Njebjelčicy – ST Ćisk II
Krajne pokalne koło
Worklecy (SN/MWj). Mjeztym połdra lěta je zašło, zo staj Chróšćanskaj Szczepaniakec bratraj Henry a Marcus při nanuzowanym přesadźowanju Worklečanski hosćenc Ke kupowemu hatej přewzałoj. Tehdy bě nadźija wulka, zo namaka so korčmar, kiž hosćenc ze žurlu powjedźe a na te wašnje wjesne žiwjenje dale wobohaći. Dokelž hosćenc jako tajki njedźěła, njezadźiwa, zo so ludźo prašeja, kajka je tuchwilna situacija a kak tam dale póńdźe. To chcychu tež Serbske Nowiny wědźeć a su so z nowymaj wobsedźerjomaj na městnje zetkali.
Njebjelčicy (aha/SN). Zo je gmejnska rada Njebjelčic hakle na swojim wčerawšim posedźenju hospodarski plan za lěto 2018 wobzamknyła, wopodstatni wjesnjanosta Tomaš Čornak (CDU) z wjacorymi argumentami. Po jeho słowach njebě lochko na jednym boku lutować z přewostajenymi srědkami, na tamnym boku pak zaručić trěbne inwesticije. Tak gmejna lětsa žane klučowe připokazanki njedóstanje. Dale ma 30 procentow mjenje dochodow z přemysłoweho dawka. Tohodla zwyšichu radźićeljo sadźbu za njón wo dźesać na 400 procentow.
Cyłkowny etat gmejny ma wobjim połdra miliona eurow. Jedna z najwažnišich inwesticijow je za 32 000 eurow derje wuhotowane trjebane wohnjowoborne awto, kotrež Njebjelčanscy wobornicy hišće lětsa dóstanu. Za saněrowanje Lipoweho puća w Njebjelčicach a za jeho wobswětlenje z dźewjeć lampami nałožichu 47 000 eurow, za twar baćonjaceho hnězda při Miłočanskej žabje 10 000 eurow. Nimo toho natwarichu lětsa w Serbskich Pazlicach nowej busowej čakarni. Za naličene inwesticije dóstanje gmejna dohromady něhdźe 150 000 eurow spěchowanje, tak zo zwostanje za nju swójski podźěl 37 000 eurow.
Hamor (AK/SN). Strach wobchadnych njezbožow na wšelakich ćežišćowych městnach chce Hamorska gmejna bytostnje pomjeńšić. Tole podšmórny wjesnjanosta Achim Junker (CDU) na zašłym posedźenju Hamorskich gmejnskich radźićelow.
Na zetkanju gmejny ze zastupjerjemi policije, Zhorjelskeho krajnoradneho zarjada a krajneho zarjada za dróhotwar a wobchad su sej problematiske městna w Klětnom, Delnim Wujězdźe a Hamorje wobhladali a so na wšelake rjadowanja dojednali. Tak su před Klětnjanskej pěstowarnju spěšnosć na 30 km/h redukowali, štož płaći za čas, dołhož je pěstowarnja wočinjena. Na křižowanišću zwjazkoweje dróhi B 156 a statneje dróhi S 108 na kromje Delnjeho Wujězda płaći wotnětka ze wšěch třoch směrow maksimalna spěšnosć 70 km/h. Zo bychu tam rjadowanje předjězby hišće jasnišo wuzběhnyli, připrawja nimo toho přidatne wobchadne znamjenja.
Z trikom rentnarce wobšudźili
Zhorjelc. Z wumyslenej basničku su njeznaći zawčerawšim w Zhorjelcu žonje w starobje 89 a 85 lět wobšudźili. W prěnim padźe wuda so muž při telefonje jako znaty jeje syna. Toho su pječa runje w chorowni operowali, dokelž měješe wobchadne njezbožo, na kotrymž bě sam wina. Načinjenu škodu pak dyrbi hnydom narunać. Tuž so cuzy při telefonje prašeše, kelko pjenjez žona w domjacnosći ma. W samsnym času klinkaše při durjach dalši skućićel, kotremuž překwapjena rentnarka štyricyfrowu sumu přepoda. W tamnym padźe wuda so njeznaty jako policist a powědaše samsnu stawizničku. Tež tu zaso klinkaše, a žona přewostaji wopačnemu policistej ec-kartku a tajne čisło. Na to bu něšto stow eurow wot jeje konta wotzběhnjene.
Budyšin. Zakónčace wodźenje po wosebitej wustajeńcy Reginy Herrmann „Dźěl wote mnje“ budźe njedźelu, 14. oktobra, w 15 hodź. w Budyskim Serbskim muzeju. Přehladka pokazuje mnohostronskosć wuměłče, kotraž so nimo serbskeje tematiki tež z kulturami a nabožinami swěta zaběra. Jeje wušiknosć spóznawaš w kóždej jednotliwej tekstilnej plastice. Na wodźenju porěči wuměłča tež wo swojim žiwjenju a tworjenju. Wězo móža wopytowarjo twórby kupić.
Pytaja požčonki za wustajeńcu
Łaz. Spěchowanske towarstwo zetkanišća Dom Zejlerja a Smolerja organizuje lětušu adwentnu wustajeńcu wo modelach wohnjowobornych jězdźidłow. Za to pyta stare a nowe, wulke a małe modele hašenskich a dalšich awtow z wotpowědnym přisłuškom. Podpěraćeljo njech přizjewja so wot 22. oktobra hač do 15. nowembra we Łazowskim Domje Zejlerja a Smolerja pod telefonowym čisłom 035724/ 502 56. Wotewrěć chcedźa přehladku 2. decembra. Wona budźe přistupna póndźelu a štwórtk wot 10 do 12 hodź. a wot 13 do 17 hodź. kaž tež we wobłuku Łazowskich adwentnych wikow 15. decembra. Dalše informacije zhonja zajimcy pod www.zejler-smoler-haus-lohsa.de
Na lětušim swjedźenskim zarjadowanju přepodaća Myta Domowiny běchu mjez wuznamjenjenymi zastupjerjo wjacorych generacijow. Tak přija starši hač 85lětny Jan Bart čestne čłonstwo narodneje organizacije za spomóžne skutkowanje wosebje na dobro Witaj-hibanja. Na tamnym boku běchu to młodźi, kaž něšto starši hač 30lětny Lucian Kaulfürst, kotrehož počesćichu z Čestnym znamješkom Domowiny za jeho angažement při spěchowanju serbšćiny a šěrjenju wědy wo Serbach.