Aus der aktuellen Ausgabe vom Mittwoch, 28 Juli 2021

Marek Krawc rozprawja wo aktualnje rozjimanych temach w Čěskej

Praha. Ryby móža so wot drogow, kaž je to crystal meth, wotwisne stać, to zwěsćichu čěscy wědomostnicy. Tele w susodnym kraju jako pervitín znate wopojadło produkuja a konsumuja tam we wulkich mnóstwach. Zbytki wopojnych jědow, lěkow a dalšich chemikalijow namakaja swój puć přez wopłokowanske připrawy do připrawjernjow wody a wottam do čěskich rěkow a rěčkow. Ryby a dalše wódne žiwochi su tajkim jědojtym maći­znam wustajene a wot nich počasu samo wotwisne, kaž studija Čěskeje agrarneje uniwersity wujewja. Wosebje pola pstruhow su biologojo mylenja w zadźerženju wobkedźbowali. Ryby njemóža ani porjadnje žrać ani so na njepřihódne wuměnjenja w swojim žiwjenskim rumje nastajić.

Wulkotna to powěsć: Gmejna Pančicy-Kukow a Domowina chcetej Muzej Ćišinskeho zhromadnje ponowić a tež wudźeržować. Skónčnje mamy w serbskim swěće twarnišćo mjenje. Što wšitko njebu rěčane a namjetowane, muzej znowa wuhotować. Rozmyslowali tež su, jón přeměstnić. Muzej direktnje w klóštrje zarjadować zbudźi chětro kontrowersne měnjenja, kaž wěm so dopomnić. Namjet Zwjazka serbskich wuměłcow bě, jón na bywšej Wotrowskej šuli zaměstnić. Stajnje pak wosta prašenje nošerstwa njerozrisane. Tež to je nětko na zbožo jasne, a tak wostanje Muzej Ćišinskeho na swojim městnje w šuli ze samsnym mjenom w ródnej wsy Jakuba Barta-Ćišinskeho, hdźež tež słuša. A je kaž Bože wjedźenje, zo dóstanu za wuhotowanje spěchowanje za modernu multimedialnu techniku. Bjez tajkeje dźě dźensa nimale žanu dušu wjac do muzeja njewabiš. Přeju tuž dobre poradźenje a prawje bórze a wobstajnje dosć wopytowarjow. Janek Wowčer

W rozprawje wo beneficnym koncerće w Chrósćicach, SN 26. julija, bě rěč wo pomocy serbskej swójbje na zapadźe Němskeje, kotraž je njewjedrow dla ćežko po­trjechena. Tónle fakt je so jako njewěrny wopokazał. Swójba njeje žanu wulku škodu přećerpjeła. Wona je jeno zwisk mjez wosadnym zwjazkom we Weilerswisće a TCM sposrědkowała. Redakcija SN

Tokio (kh/SN). Na třećim wubědźowanskim dnju olympiskich hrow w Tokiju je němske mustwo prěnjej złotej medali dobyło. Ricarda Funk wubědźi sej tajku w kanuslalomje před Maialen Chourraut ze Španiskeje. Třeće městno wobsadźi ­faworitka Jessica Fox z Awstralskeje. Dalše złoto za Němsku je samsny dźeń k tomu přišło. Konjaca sportowča Isabell Werth swjećeše z němskim dresurowym mustwom znowa olympiske dobyće. Zhromadnje z Dorothee Schneider a Jessicu von Bredow-Werndl je sej 52lětna Werth złoto w mustwowej dresurje suwerenje zawěsćiła. To bě jeje sedma złota medalja na olympiskich hrach. Mustwowe slěbro dźěše na USA, bronza na Wulku Britanisku.

Runjewon swójbny charakter měješe minjeny kónc tydźenja zetkanje motorskich w Bórkhamorje. Dohromady něhdźe 250 bikerow bě zdźěla ze swojimi swójbnymi k Jantarowemu jězorej přijěło. Tež wobydlerjo ze wsy a wokoliny so po swjedźenišću ­rozhladowachu a motorske wobdźiwachu. Štyri kapały z Lipska, Drježdźan a Kamjenicy starachu so wo hudźbu. Nimale 170 ­mašinow bě sobotu na tradicionalnym wulěće do Bjerwałda a Łaza wobdźělenych. Foto: Jost Schmidtchen

Smječkecy (AJH/SN). Park Smječkečanskeho Domu swj. Jana tworješe njedawno krasnu zelenu přirodnu kulisu zabawneho zetkanja wobydlerjow domu a jeho sobudźěłaćerjow. W běhu dnja přeměni so park na mału oazu, wupyšenu z kwětkami, latarnčkami, pisanymi chorhojč­kami a lampkami za lětni swjedźeń.

Pod lipami dožiwichu přitomni dwuhodźinski koncert skupiny Holaski. Po dołhej přestawce pandemije dla móžachu Donatec bratřa a jich bubnar Kito Mark ­nětko zaso z połnym zapalom najwšelakoriše hity a oldije zahrać. Paleta sahaše wot serbskich ludowych pěsnjow přez němske štučki hač k swójskim kompozicijam kapały.

Dale mytowaše Weronika Bartowa jako zamołwita za sport ze zbrašenymi ST Marijineje hwězdy kóždeho wobdźělnika digitalneho jubilejneho běha Pančičanskeho sportoweho towarstwa, kotrež wob­steji mjeztym sto lět, z wopismom, me­dalju abo pokalom. Jubilejny běh wotmě so pandemije dla jako alternatiwa k integraciskemu sportowemu swjedźenjej.

Město Kulow kupi płoniny při starym dwórnišću za nowe ležownosće

Kulow (AK/SN). Bydlensku kwalitu w Kulowje chce tamniša měšćanska rada dale polěpšić a kupi za to płoniny za nowe twarske ležownosće a parkowanske městna. Kaž měšćanscy radźićeljo na swojim zašłym posedźenju wobzamknychu, kupi město dohromady 31 400 kwadratnych metrow přestrjenje. Za to wuda 350 000 eurow, kotrež wozmje zdźěla ze srědkow koronoweje pomocy komunam, zdźěla z měšćanskich rezerwow.

29.7.–4.8.2021 Budyski filmowy palast: Space Jam – A New Legacy: wšědnje 14:45 Die Croods – Alles auf Anfang: wšědnje 14:15 | wu a srj 10:15 | nj 12:45 Die Croods – Alles auf Anfang w 3 D: wšědnje 17:30 Godzilla vs. Kong w 3 D: wšědnje 1:45 (nimo srj) Godzilla vs. Kong: pj a so 22:20 100% Wolf: wu a srj 9:45 | nj12:15 Catweazle: wšědnje 19:30 (nimo srj) | wu a srj 10:15 | nj 12:30 A Quiet Place 2: wšědnje 20:15 | pj a so 23:00 Nobody: pj a so 22:15 Conjuring 3: Im Banne des Teufels: wšědnje 19:45 | pj a so 22:15 Yakari: wu a srj 10:15 | pj, nj, pó a wu 15:00 Malasana 32 – Haus des Bösen: pj a so 22:30 Der Spion: pj a so 22:15 Cash Truck: wšědnje 17:00 a 19:45 | pj a so 22:30 Generation Beziehungsunfähig: wšědnje 17:45 a 20:15 Spirit – Frei und ungezähmt: wšědnje 15:00 a 17:15 | srj 10:30 | nj 12:30 Die Olchis – Willkommen in Schmuddelfing!: wšědnje 15:15 a 17:15 | wu a srj 9:45 | nj 12:00 Blackpink: srj 19:45 Peter Hase 2 – Ein Hase macht sich vom Acker: wšědnje 14:45 | wu a srj 10:15 | nj 12:15 Der Rausch: wšědnje 17:30 a 19:30 Cats&Dogs 3 – Pfoten vereint: wu a srj 10:00 | nj 12:30 The Suicide Squad: srj 20:00 Ostwind – Der große Orkan: wšědnje 14:30 a 17:15 | nj 12:00 Fast & Furious 9: wšědnje 14:00, 17:00 a 20:00 | pj a so 22:00 Mein Freund Poly: štw, so a srj 15:00

Na poslednim dnju šulskeho lěta je so šulska słužba za Martinu Jancynu zakónčiła. Wona bě na Wojerowskej Zakładnej šuli „Handrij Zejler“ při Worjole wot 1985 to, štož so dobra duša šule mjenuje. Jako zastupowaca nawodnica je minjene lěta hodźinski plan tak zestajała, zo bě wšitko za koleginy optimalnje zrjadowane a na wosobinske wobstejnosće přiměrjene.

Kóždy na šuli, hač koleginy, šulerstwo, starši šulerjow, socialna słužba abo techniski přistajeny měješe w Martinje Jancynej stajnje wotewrjene wucho za słužbne abo tež priwatne naležnosće. Sćicha staraše so wona wo wšě małe, ale tež wulke šulske problemy, njehladajo na swjatok. Tež w času najwjetšich wužadanjow je z přećelnym optimizmom měrnje wustupowała. Wona bě na Zejlerjowej šuli najdlěje wuwučowaca a drje poslednja wučerka, kotraž so z tohole šulskeho městna na wuměnk poda, wšako ma kubłanišćo po přichodnym šulskim lěće na nowe městno přećahnyć.

Budyšin. Za čas wot 1. septembra 2021 hač do 31. awgusta 2022 poskića Muzej Budyšin młodym zajimcam, přewjesć dobrowólne socialne lěto we wobłuku měšćanskich a kulturnych stawiznow. Do jich nadawkow słuša inwentarizować a digitalizować objekty, hladać a rozšěrić datowu banku, rešeršować za wustajeńcy a pomhać wosebite přehladki sobu natwarić a wottwarić. Nadrobniše informacije dóstanu zajimcy pod telefonowym čisłom 03591/ 534 931.

Radźićeljo wuradźuja

Wotrow. Dalše twarske dźěła we wobłuku saněrowanja šulskeho twarjenja w Pančicach-Kukowje budu jedna z temow přichodneho posedźenja tamnišeje gmejnskeje rady jutře w 19 hodź. na Wotrowskej starej šuli. Dale zaběraja so radźićeljo z ponowjenjom wjesneje dróhi w Kanecach, za čož dyrbi gmejna nětko roły, wobhrodźenja a zornowcowe plesternaki kupić. Nimo toho póńdźe wo nowu bydlensku štwórć při Srjedźnym puću w Pančicach-Kukowje.