Aus der aktuellen Ausgabe vom Freitag, 15 Oktober 2021

Wustajeńca młodeho wuměłstwa

Choćebuz. Kolektiw Wakuum prezentuje wosebitu wustajeńcu twórbow Helle Stoletzki w Choćebuskej galeriji Fango. Přehladka „pokazuje wliw brunicowych jamow na serbske tradicije a wotbłyšćuje situaciju młodych Serbow*kow w tak mjenowanym urbanym rumje“, rěka we wopisanju galerije. Wernisaža budźe jutře,­ sobotu, w 20 hodź. Wo hudźbne wobru­bjenje postara so duwo Kat & Sly. Zarjadowarjo na to skedźbnjeja, zo płaći korony dla postajenja 2G.

„Juwelam hwězdnišća“ cyle blisko

Budyšin. Składnostnje dnja astro­nomije přeproša Budyska hwězdarnja so­botu, 16. oktobra, na zarjadowanje „Juwe­le hwězdnišća“. Wot 15 hodź. móža so zajimcy wo optiskich nastrojach pod kuplomaj domu wobhonić a sej z nimi po chowanju słónca planetaj Jupiter a Saturn­ wobhladać. W planetariju hodźa so firmamenty wšelakich dobow wobdźiwać. Za dźěći budźe zajimawa „paslenska čara“ spřihotowana. Zastup je darmotny.

Kompjuter jako kreatiwny grat

Wolejbulowe hry

Na wolejbulistki sportoweho towarstwa Viktoria Worklecy čaka jutře hnydom dalši hrajny dźeń. Po wuspěšnym zazběhu minjenu sobotu chcedźa Worklečanki wězo dale dypkować.

16.10. 16:00 VV Žitawa 09 II –

  Viktoria Worklecy (ž)

16.10. 16:00 Módro-běłe Wojerecy –

  Viktoria Worklecy II (ž)

30.10. 12:00 Drježdźanske SSV II –

  Viktoria Worklecy (m)

30.10. 16:00 VfL Pirna-Copitz 07 –

  Viktoria Worklecy (m)

30.10. 12:00 Viktoria Worklecy –

  Póst Drježdźany (m)

30.10. 14:00 Viktoria Worklecy –

  Motor Mickten II (m)

01.11. 19:30 Sokoł Budyšin –

  ST Budyšin-sewjer (m)

01.11. 19:30 Sokoł Budyšin –

  Schönbachske VV (m)

Kónctydźenska kopańca

Prěni raz přewjedu dźensa wot 20 hodź. w Slepom na kumštnym trawniku pod swětłomjetakami duel stareje koparskeje gardy Lokomotiwy Slepo a Sokoła Ral­bicy. Šlagrowa hra jutře, sobotu, budźe w Biskopicach. Tam wočakuje Biskopičan­­ske KT 08 we wyšej lize Budissu Budyšin.

16.10. 14:00 Biskopičanske KT 08 –

  Budissa Budyšin

16.10. 14:00 Jednota Kamjenc –

  FSV Motor Marienberg

16.10. 15:00 SV Wesenitzal –

  Rakečanske ST

16.10. 15:00 ST Hnašecy-Dobruša –

  ST Marijina hwězda

16.10. 15:00 Póst Germania Budyšin –

  Módro-běli Kulow

17.10. 11:30 Sokoł Ralbicy/Hórki II –

  HZ Hory II/Bluń

17.10. 12:30 SJ Chrósćicy II –

  Módro-běli Minakał

Mustwo delnjoserbskeho telewizijneho magacina Łužyca wokoło moderatora Christiana Matthéeja poda so z oktoberskim wudaćom na „Domjace wopyty“. Dohromady sydom hosćićelow, kotřiž we Łužicy bydla, abo wottam pochadźeja, wotewrje swoje durje a dowola přihladowarjam dohlad do swojeho wšědneho dnja. Mjez druhim portretuja telewiznicy Jensa Martina z Bórka, kiž předstaji swoje kubło scomter typiskej błótowskej chě­žu, kotruž chce na kóždy pad zachować.

Tworjaca wuměłča a spěwytwórča Ma­rion­ Kwicojc, kotraž je swoju domiznu před něhdźe 30 lětami wopušćiła, zo by w Lipsku na molerstwo studowała a so naposledk tam zadomiła, pokaza zajimcam zajimawostki twarjenja, do kotrehož je zaćahnyła a hdźež jeje wobrazy nastawaja. W Drježdźanach wita Juliana Kaulfürstowa publikum a powěda, kak so za wozrodźenje Slepjanskeje serbšćiny zasadźa. Dale wopytaja telewiznicy nic mjenje zajimawych a fascinowacych woby­dlerjow w Limbarku (Gołkojce), Lubnjowje, Choćebuzu a Podstupimje.

Budyšin. Składnostnje 60. róčnicy wobstaća klankodźiwadła w Budyšinje přihotuje NSLDź za 24. oktober paradu klankow po sprjewinym měsće. Swjedźenski ćah započnje so w 14 hodź. při dźiwadłowych dźěłarnjach na Lubijskej čo. 60 a powjedźe přez Allendowu štwórć, po Pfaffowej nimo Marje-Marćineje cyrkwje hač k wulkemu domej dźiwadła. Dźěći su přeprošene, ze swójbnymi so wobdźělić, pak ze swójskej klanku abo jednej z dźiwadłoweho fundusa. Wot 13 hodź. móža sej wone w dźěłarnjach same klanku ­paslić. W 16 hodź. budźe w Dźiwadle ­na hrodźe předstajenje „Arche Nora“.

Sakski krajny kuratorij za wjesny rum idejowej wubědźowani wupisał

Lejno (SN/JaW). Sakski krajny kuratorij za wjesny rum Miłoćicy (SLK) je za nazymu a klětuše nalěto dwě idejowej wubědźowani w zwisku ze „Simul+ fondsom Čiń sobu!“ wupisał. Na nimaj móža so zajimcy we wjacorych modulach wo pjenjezy wjacorych statysac eurow prócować. Wosebity wobstatk wubědźowanja je modul za dwurěčnosć.

Něhdźe dźesać zajimcam je wčera sobudźěłaćer SLK a hłowny zamołwity za serbske wubědźowanje Tadej Cyž zhromadnje z nawodu „Simul+ fondsa Čiń sobu!“ Christophom Bielu na serbskorěčnym zarjadowanju w Lejnje směrnicy a wobsahi wubědźowanja rozłožił. „Požadać móža so wšitcy, jednotliwcy runje tak kaž institucije, towarstwa a dalše cyłki. Tež gmejny a města móža so we wotpowědnym modulu wo pjenjezy prócować“, Tadej Cyž podšmórny. Wuwzate z wubědźowanja su politiske strony.

Radwor (BB/SN). Što činić z traktorami abo wulkimi a mjeńšimi awtami, kotrež po Radworju smala? Warnowanske tafle nastajeć? Abo w ekstremnym padźe jim samo zakazać po wsy jězdźić? Štož za­poča so předwčerawšim wječor na zhromadźiznje gmejnskeje rady z jednorym naprašowanjom wobydlerki, wuwi so ke chětro wobšěrnej diskusiji. Problem, zo je hłowny puć prěki přez wjes na někotrych blakach za dźensniše poměry zawěrno chětro wuski, wšak njeje nowy.

Tež žadanje wobydlerki njebě nowe. Gmejna měła so wo porjadk starać, prjed hač snano něchtó žiwjenje přisadźi. Ale kak, hdyž jedna so při Dróze Alojsa ­Andrickeho tola wo wokrjesnu a nic wo komunalnu dróhu? K tomu přińdźe: ­Na próstwu gmejny su tam před wěstym časom hižo raz tempo měrili­. Tola lědma štó je tehdy spěšnišo hač dowo­lenych 50 kilometrow na hodźinu jěł.

63lětny zhubjeny

Rakecy. Hižo wot štwórtka minjeneho tydźenja je 63lětny muž z Rakec zhubjeny. Policiji bu tónle pad wutoru znaty. Muž je 7. oktobra swoje bydlenje w Rakečanskich bydlenskich blokach z módrym žonjacym kolesom wopušćił, dokelž chcyše hriby pytać jěć. Dotal je policija podarmo za nim pytała. Při tym zasadźichu nimo wjetšeje ličby zastojnikow tež trut a jěchansku staflu hotowostneje policije. Pytany je 1,75 metrow wulki, šwižneje postawy a ma krótke šědźiwe włosy. Štóž móže pokiwy dać, njech so pola policije přizjewi.

Budyšin. Němsko-Serbske ludowe dźiwa­dło pokaza jutře, sobotu, swoju kołwrótnu komediju „Dołhož fenki běža“ w 19.30 hodź. na hłownym jewišću Budyskeho NSLDź. Je to poslednje předstajenje a hrabnjenčko měsaca, kóždy lisćik płaći jenož wosom eurow. Dźiwadło poskića simultany přełožk do němčiny. W dźiwadle płaći incidency korony dla prawi­dło 3G. Testować dać móža so zajimcy do předstajenja w testowanskim centrumje na Burskej hasy. Wón je sobotu wot 17.30 hodź. wotewrjeny. Test płaći za wopytowarjow dźiwadła pjeć eurow. Termin móžeće hižo nětko přez internetnu stronu NSLDź skazać. Lubowarjo serbskeho dźiwadła njech lóštny kruch njeskomdźa.

Prózdniny z instrumentom

Nowy film sćelaka Arte wo našim ludźe wulku chwalbu žnjał

Tych filmow w serbskej rěči a ze serbskej tematiku njeje mało. Nahrawali su tajke za čas NDR – mjez druhim w režiji njeboh dr. Tonija Bruka –, tež hišće po lěće 1990. Zwjetša su to dokumentacije wo stawiznach a ludowej kulturje Serbow a wo Łužicy. Na Choćebuskim filmowym festiwalu su wone w sekciji „Heimat – Domownja – Domizna“ minjene lěta ­přeco widźeć byli – krótke a dlěše, starše a nowe.

Nowowutworjena syć „Łužycafilm“ so jara prócuje, serbskim produkcijam nowy wotmach a impulsy dawać. Přeco pak hišće něšto faluje – tajki porjadny dołhi hrajny film w serbskej rěči. Ideje za to su, ale nadźija, zo tajki w blišim času nastanje, njeje wulka. Hišće njeje tón čłowjek namakany, kiž by za tajki film prawu ­mysličku měł a tež scenarij napisał.

Na wopyće pola spěwarja, hudźbnika a komponista Matthiasa Kießlinga w Žylowje

Něhdźe 200 hudźbnych nahrawanjow – su to wobdźěłanja serbskich spěwow a swójskich kompozicijow na serbskorěčne teksty – je mjeztym 65lětny spěwar, hudźbnik, komponist a producent Matthias Kießling dotal za delnjoserbski rozhłós sćelaka RBB a hor­njoserbski rozhłós MDR produkował. Šwarna ličba to titulow, kotrež móžemy w serbskim rozhłosu słyšeć.