Mniša wopušća Wechselburg
Wechselburg (dpa/SN). Katolski rjad benediktinow klóšter we Wechseburgu we wokrjesu Srjedźna Sakska wopušći. Abtownja w bayerskim Ettalu, ke kotrejž klóšter słuša, njewidźi žanu móžnosć, Wechselburg zachować, Drježdźansko-Mišnjanske biskopstwo zdźěla. Kónc lěta 2026 klóšter swoje dźěło zakónči.
Biskopstwo rozsud Ettalskeje abtownje jara wobžaruje, biskop Heinrich Timmervers zwurazni. „Wechselburg je wažny duchowny centrum a znate putniske městno.“ Po jeho informacijach staj tam jenož hišće dwaj mnichaj žiwaj. Wjelelětny prior pater Maurus Kraß nawróći so kónc septembra do swojeho domizniskeho klóštra. Wot kónca oktobra njebudźe konwent hižo wjace kmany, Bože słužby w bazilice přewzać, w zdźělence rěka.
Nětko dyrbja nowe rozrisanje za putniske městno namakać, biskopstwo zdźěla. „Jasne pak je, zo wotchad mnichow rjadu benediktinow cyrkwinske žiwjenje we Wechselburgu čujomnje změni a tak swoje slědy zawostaji“, Timmerevers zwěsća. Benediktinojo su we Wechselburgu tež hóstny dom wobhospodarjeli a běchu aktiwni dušepastyrjo.
To a tamne (02.09.25)
Kuriozne stawiznički naposkać dyrbjachu sej zastojnicy awtodróhoweje policije, jako njedaloko sewjerorynsko-westfalskeho Moersa 22lětneho šofera wosoboweho awta kontrolowachu. Tón přizna, zo njeje hišće nihdy jězbnu dowolnosć měł. Awto z wopačnym čisłom słušeše přećelej, kotrehož pak jeno z předmjenom znaješe. Přiwołany přećel ani prawje njewědźeše, wotkal awto ma, a zo bě je 22lětnemu wupožčił, jemu tež wjace wědome njebě. Policisća awto sćazachu a napisachu wjacore skóržby.
Tak horco kaž lětsa we Wulkej Britaniskej w zašłych 150 lětach njebě, kaž ze zapiskow wuchadźa. Narodna wjedrarnja zdźěla, zo wučinješe přerězna temperatura wot spočatka junija hač do kónca awgusta 16,1 stopjeń, štož je 1,51 stopnjow nad wjelelětnym přerězkom. Dotalny rekord naměrichu lěta 2018.
Posrědkowar w rozestajenjach
Vatikan (B/SN). Po woli bamža Leja XIV. ma Vatikan we wójnach a rozestajenjach posrědkowar być, zo bychu njepřećeljo so zetkawać a sej do woči hladać móhli. Ludam ma so nadźija wróćić, kotruž sej zasłuža, dostojnosć měra. „Nimamy so kaž rubježne zwěrjata zadźeržeć, ale kaž putnicy“, praji bamž njedawno na zetkanju ze zastupjerjemi wuchodnych cyrkwjow.
Wuměłstwo tyje duši
Berlin (B/SN). Lěkowanski muzej mjenuje so koncept Berlinskeho Bode-muzeja. Mjez postawami Jězusa, madony, buddhy a muslimskimi paćerskimi rjećazkami wopytowarjo na zawkach sedźo meditěruja. Meditacija zwjazuje nabožiny hač z abo bjez słuchatkow z meditaciskimi tekstami muzeja. Berlinska kupa muzejow woswjeći lětsa 200. róčnicu wobstaća.
Dale a wjac Indičanow w Berlinje
Sobudźěłaćerjo UNO zawlečeni
Sanaa (dpa/SN). Wojowarjo Huthijow w Jemenje su wjacore běrowy pomocnych organizacijow UNO nadpadnyli a sobudźěłaćerjow zawlekli. Tole wjacore medije rozprawjeja. Po informacijach UNO su zběžkarjo znajmjeńša jědnaće sobudźěłaćerjow organizacijow zjednoćenych narodow zajeli. Zastupnicy UNO su postupowanje Huthijow mjeztym zasudźili. Do toho bě Israel nawodu Huthijow Ahmeda al-Rahauija při zaměrnym nadpadźe morić dał. Huthijojo su wjećbu připowědźili.
Klingbeil: Dawki znižić
Berlin (dpa/SN). Najebać wobćežne wuradźowanja wo etaće Němskeje hladajo na zalutowanja so zwjazkowy financny minister Lars Klingbeil (SPD) dale wo to prócuje, dochodowe dawki za ludźi ze snadnej a srěnjej mzdu srjedź wólbneje doby znižić. W koaliciskim zrěčenju je zakótwjene, „zo chcemy tutón puć kročić“, rjekny předsyda SPD w telewizijnym sćelu ARD. Tuchwilu w ministerstwje wšelake móžnosće pruwuja, minister rjekny.
Wotsunjenju dźěći zadźěwali
Wuhnaći Palestinjenjo ćěkaja ze sewjerneho dźěla Gazaskeho pasma ...
Skućićel so pola policije přizjewił
Pozdatneho mordarja zajeli
Lwiw (dpa/SN). Po smjertnych wutřělach na bywšeho prezidenta ukrainskeho parlamenta Andrija Parubija w Lwiwje je policija po oficialnych informacijach podhladneho zajała. Prezident Wolodymyr Zelenskyj zdźěli, zo je so muž při prěnim přesłyšowanju k njeskutkej wuprajił. Zelenskyj přilubi, zo chcedźa wšitke wobstejnosće mordarstwa wotkryć.
Parubija běchu minjenu sobotu wosrjedź dróhi zatřělili. Wón pochadźa z kónčiny Lwiwa na zapadźe Ukrainy. 54lětny Parubij je wot 2016 do 2019 prezident parlamenta był. Za čas rewolucije na Kijewskim Majdanje 2014 bě wón komander stanoweho lěhwa a nawoda organizacije „Zakitowanje Majdana“, kotraž bě protestowacych wukubłała.
Socialny zwjazk kritizuje Merza
Berlin (dpa/SN). Zwjazkowy kancler Friedrich Merz je ze swojimi wuprajenjemi kritiku zbudźił. Socialny zwjazk (SoVD) jemu wumjetuje, zo wón ze swojimi wuprajenjemi socialny stat rozdwoja. „To njeje jenož wopak, ale tež towaršnostnje strašne“, tak nawodnica SoVD Michaela Engelmeier. Merz bě hižo reformy pominał: Tak njemóhł wobydlerski pjenjez w nětčišej formje dale wobstać. Engelmeier porno tomu wuzběhny, zo je socialny stat solidariski fundament zwjazanosće a zo dyrbja wšitcy z toho profitować móc. Město skrótšenjow trjebaja wjac sprawneje dawkoweje reformy.
Tež zwjazkowa ministerka za dźěło Bärbel Bas (SPD) znapřećiwi: „Twjerdźenje, zo njemóžemy sej socialne zawěsćenske reformy a socialny stat hižo dowolić, je bullshit“. Diskusija pokazuje: Wjele ludźom woznamjenja socialny stat wěstosć a zepěru we wšědnym žiwjenju. Bas wuzběhuje, zo je tohodla wosebje wažne, we wobłukach strowotniskeho zastaranja, hladanja a renty system wutworić, kiž hladajo do přichoda stabilny wostawa.
Spahn a Miersch w Kijewje
Předsydaj frakcijow CDU/CSU a SPD na solidaritnym wopyće w Ukrainje
Kijew (dpa/SN). Předsydaj wobeju koaliciskeju frakcijow Jens Spahn (CDU/CSU) a Matthias Miersch (SPD) staj njewočakowano na zhromadny wopyt do wot Ruskeje nadpadnjeneje Ukrainy dojěłoj. W stolicy Kijewje wobdźělištaj so w běhu dnja na rozmołwach wo dalšej podpěrje na dobro Ukrainy a wo diplomatiskich prócowanjach k skónčenju wójny.
Zhromadna jězba pokazuje, „zo njesteji jenož knježerstwo kruće Ukrainje poboku, ale tež wjetšina parlamenta w formje koaliciskeju frakcijow“, rjekny Spahn na jězbje z ćahom do Kijewa. Miersch mjenowaše zhromadny wopyt „jasny signal podpěry Ukrainy“. Jemu je wosebje wažne, zo jedna so wo zhromadny signal CDU/CSU a SPD.
Wopyt Spahna a Mierscha je nowostka: Za čas amploweje koalicije SPD, FDP a Zelenych běchu drje hižo zastupnicy jednotliwych stron w Kiewje, nic pak na runinje frakciskich předsydow. Spahn a Miersch staj prěni króć w Ukrainje.
