Wopomnišćo sej nětko sami digitalnje wotkryć
Budyšin (SN/CoR). Wot tohole tydźenja móžeš sej Budyske wopomnišćo na wirtuelnym wobchodźenju sam wotkrywać. 65 lět po tym zo bě statna bjezstrašnosć NDR (stasi) jastwo Budyšin II přewzała, skića tam nětko nowe přistupy k stawiznam domu. Hosćo pohibuja so jako internetni wopytowarjo w 3D-modelu jastwa a postaja sami, wo čim chcedźa so dokładnišo informować dać. Wužiwarjo nadeńdu dokumenty, fota, wideja, zwukowe natočenja a objekty, kotrež pomhaja, do časa stasi so zanurić. W srjedźišću steja transport jatych, jich wšědny dźeń a dohladowanje. W jenož pjatnaće mjeńšinach dóstanješ přehlad wo stawiznach jastwa a jeho jatych pod režimom tehdyšeje statneje strony SED.
Prěni pomnik
W Kačej Korčmje zwonka Rakec wotmě serbska studowaca młodźina 11. awgusta 1946 swoju prěnju powójnsku schadźowanku. Přitomni běchu tež zastupjerjo pólskeje a juhosłowjanskeje wojerskeje misije při Berlinskej Zwjazkarskej kontrolnej komisiji a sowjetskeje komandantury z Budyšina. Dopołdnja wotkrychu wobdźělnicy před něhdyšim knježim dworom pomnik sowjetskim a pólskim wojakam 2. ukrainskeje fronty, kotřiž běchu při wuswobodźenju našeje domizny swoje žiwjenje woprowali.
Na kwadratnym obelisku su dźakne słowa w serbskej, pólskej a ruskej rěči. Studenća a dalši ludźo běchu pjenjezy za prěni tajki pomnik po wójnje składowali. Dźěle obeliska buchu pozdźišo do Budyskeho Serbskeho muzeja přewjezene. Schadźowanka skónči so wječor z předstajenjom hry Marje Kubašec „Chodojta“ pod hołym njebjom. Dźiwadźelnicy Chróšćanskeje skupiny su kruch pod nawodom Pawoła Kmjeća něhdźe tysac přihladowarjam předstajili.
Přispomnjenje: Twórba Marje Kubašec měješe tež swoju prapremjeru na schadźowance – na jubilejnej połstatej w lěće 1925. Mikławš Krawc
Zahajensku a kónčnu scenu za pop-operu nawjerćeli
Chrósćicy/Budyšin (SN/JaW). Horca faza přihotow na předstajenje serbskeje pop- opery „Carpe noctem – njeskónčna nóc“ je zaběžała. To zdźěli zamołwity za wuměłstwowe prašenja Syman Hejduška.
Tak su wčera předpředań kartkow za operu zahajili. Za cyłkownje štyri předstajenja wot 10. do 13. septembra w Chróšćanskej wjacezaměrowej hali „Jednota“ móža sej zajimcy zastupne lisćiki pola časnikarja Jürgena Njeka w Chrósćicach a w Budyskej Serbskej kulturnej informaciji wobstarać. „Kartki sej kupić pak je tež internetnje pola poskićowarja eventim móžno“, informowaše wčera zamołwity za zjawnostne dźěło projekta popoweje opery, kotruž přihotuje skupina Trio a kumple zhromadnje ze Serbskim młodźinskim towarstwom Pawk, Stanisław Wowčer. Lisćiki płaća 12,50 do 17 eurow.
Swět seniorow na mólbach
155. wustajeńca małeje galerije na Njeswačanskim hrodźe
Njeswačidło (ML/SN). „To je moje žiwjenje – mój swět“ rěka pjata wustajeńca z twórbami 25 molerjow Budyskeho běrowa seniorow a wokrjesa, kotraž bu njedźelu popołdnju w małej galeriji Njeswačanskeho Stareho hrodu wotewrjena. Hač do 31. oktobra pokazuja tam nětko połsta wolijowych mólbow, akwarelow, rysowankow a dalšich žanrow tworjaceho wuměłstwa.
Přehladka zbliža wopytowarjam krasnosć přirody, twarjenjow a krajinow, zwobraznjenu wot molerjow we wyšej starobje. Wobhladowar móže so do twórbow zanurić, kotrež nastachu w měrnym wokomiku w našej domiznje, w dalšich němskich kónčinach a we wukraju. Jedna so wo dźěła, tworjene w času koronapandemije. Tohodla wustajeja seniorki a seniorojo Budyskeho wokrjesa jenož 50 twórbow, hewak dodawachu stajnje na 80 dźělow za wustajeńcy. Tole wuzběhny Ingrid Konschak w swojej lawdaciji. Molerka z Wětrowa je z dwěmaj wolijowymaj mólbomaj na pokazce wobdźělena. Molowała je wona „Pohlad na Nowu Wjes z Njeswačanskeho parka“ a „Hatnu krajinu pola Malešec“.
Ma spodźiwny přisłód
Serbske wodźenje dožiwić
W parku błudźenkow spodobne kulturne popołdnjo wuhotowali
Wochozy (SN/MWj). Ze serbskej wersiju awdioweho přewodnika móža so wopytowarjo nětko po Wochožanskim parku błudźenkow wodźić dać. Tule nowosć su tam wčera we wobłuku kulturneho popołdnja zjawnosći předstajili. Na tele prěnje zjawne zarjadowanje po wjele měsacach nanuzowaneho zawrjenja korony dla bě wjace hač 400 wopytowarjow do woblubowaneho wočerstwjenišća blisko Hamorskeje milinarnje přijěło. Serbski publikum ze Zejic sy tam runje tak wuhladał kaž hosći z Budyšina, Baćonja, Pančic-Kukowa, Noweje Wjeski a z Hórkow. Wochožanska Domowinska skupina je popołdnjo sobu podpěrała.
Serbja na festiwalu
Wernisaža zazběh noweho rjadu
„Jedna z najwažnišich knihow nakładnistwa“
Budyšin (SN/CoR). Dołho hižo njeje so w Budyskej Smolerjec kniharni telko ludźi zešło kaž wčera wječor składnostnje předstajenja němskeho wudaća knihi Křesćana Krawca „Sej statok stajili“. Něhdźe 40 zajimcow njedožiwi tam jenož premjeru zběrki z třinaće portretami pod titulom „Was wir in uns tragen – Sorbische Lebenswege“, ale zdobom sceniske čitanje. Wšako wobsahuje tež němske wudaće wosebity kapitl „Chróšćan zběžk“, a tak su awtor, bywša jednaćelka Ludoweho nakładnistwa Domowina a lektorka knihi Marka Maćijowa kaž tež lektor LND Pětr Thiemann bój wo zachowanje Chróšćanskeje srjedźneje šule w lěće 2001 wot spočatka hač do njewuspěšneho kónca měšanemu němskoserbskemu publikumej wčera z perspektiwy wobdźělenych zbližili. Tež pasaže z knihi „Gruben-Rand-Notizen“ Jurja Kocha su zapřijeli. Michał Cyž je čitanje natočił.
