Ministerstwo pósłanca zaso skazało
Berlin (dpa/SN). W běhu jenož 48 hodźin dyrbješe němski pósłanc w Ankarje Martin Erdmann dwójce do turkowskeho wonkowneho ministerstwa přińć. Na póndźelnej rozmołwje dźěše wo lěta trajacu rozkoru zastopnjowanja ludomordarstwa w zwisku z morjenjom a deportacijemi Armenjanow přez Osmaniske mócnarstwo. Turkowska masakry wotpokazuje. Wot junija je tuž poćah mjez krajomaj špatny. Nětko kritizowaše turkowske knježerstwo dźěłarničku njewotwisneje załožby, kotraž je historisku temu w zwisku z pedagogiskimi konceptami wobjednawała. Němski pósłanc pak skedźbni na njewotwisnosć a swobodu załožbow w Němskej.
To bě bětko hižo 17. króć, zo dyrbješe so pósłanc Martin Erdmann w běhu dweju lět w turkowskim ministerstwje wusprawnić. Hakle sobotu su jeho kulturneho swjedźenja Kurdow w Kölnje dla do ministerstwa skazali. To słuša ke chutnym instrumentam diplomatiskeho protesta. Mjez partnerami NATO tajke skazanje pósłancow z wašnjom njeje.
Manewer zaměr njepřekročił
Strachi, twjerdźenja a připowědźe njewoprawnjene byli
Moskwa (ČŽ/K/SN). Tydźeń trajacy rusko-běłoruski manewer Zapad 2017 je tak derje kaž nimo, a hranicy na Baltikumje a druhdźe na wuchodźe su dale tajke kaž do 13. septembra. W žanych medijach njeje ani noticki wo tym, zo bychu ruscy wojacy z běłoruskimi hromadźe něhdźe teritorij NATO nadpadnyli a zo bychu jich tanki tam něšto rozbili.
Smě so tuž za to měć, zo wotmě so manewer Zapad 2017 w zaměrowym wobłuku, za kotryž bě wot ruskeho zakitowanskeho ministerstwa připowědźeny. Dźěše wo strategiski trening zakitowanja a wotwobaranja terora. We wuchodnych kónčinach Ruskeje a Běłoruskeje je 12 200 wojakow (5 000 ruskich a 7 200 běłoruskich), 70 lětadłow a helikopterow, 250 tankow, dwěsćě kanonow a dźesać wójnskich łódźi operowało.
Tilich ma so nětko wo porjad starać
Nastupajo wuslědk wurjadneho posedźenja Budyskeho wokrjesneho sejmika reagujetej opoziciskej stronje Lěwica a Zwjazk 90/Zeleni z porokom ministerskemu prezidentej Stanisławej Tilichej (CDU).
Tróšku hinaši wólbny bój
To a tamne (20.09.17)
Hoberski monster tuka a wotpadkow, kotryž je Londonski wopłóčkowy kanal zatykał, ma so na biodiesel předźěłać. Hač do 10 000 litrow ćěriwa móhło z toho nastać. Tež Londonski měšćanski muzej chce hižo dźěl 130 tonow ćežkeje a 250 metrow dołheje hromady tuka jako wustajenski objekt měć. Mjeztym ma tónle monster hižo někotre mjena, kaž na přikład Fat the Ripper.
Šrot město rězka a běrnjaceje solotje je sej 25lětny w Ludwigshafenje kupił. Młody muž bě sej nowu kuchnju popřał. Dyrbješe pak ju najprjedy raz natwarić, štož bě jemu po wšěm zdaću chětro wulke wužadanje. Hižo někotre dny wón twarješe, ale njeje ani kročałku dale přišoł. Zadwělowanosć přeměni so do njemdrosće, a wón rozbi kuchnju na kruchi. Při tym pokaza wjace talenta. Zbył je z meblow jenož hišće šrot.
Respekt a tolerancu docpěć
Interkulturne tydźenje w Budyskim wokrjesu z počesćenjemi zahajene
Wojerecy (AK/SN). „Čestnohamtsce angažowani wukonjeja za integraciju ćěkancow hódnotne njeparujomne dźěło.“ Tole podšmórny krajny rada Michael Harig (CDU) na zahajenju 8. interkulturnych tydźenjow Budyskeho wokrjesa minjeny pjatk we Wojerecach, hdźež so 14 z cyłkownje 33 zarjadowanjow tydźenjow pod hesłom „Wjelorakosć zwjazuje“ wotměwa. „Integracija njeradźi so w zastojnskich stwičkach, ale w swobodnym času, hustodosć kónc tydźenja“, dźakowaše so Harig čestnohamtskim pomocnikam, lokalnym koordinatoram a dobrowólnikam na žurli wobydlerskeho centruma. Zhromadnje ze sakskej statnej ministerku za socialne, škit přetrjebarjow, runostajenje a integraciju Petru Köpping (SPD) počesći wón angažowane wobydlerske zwjazki a iniciatiwy. „Wjelorakosć wuskutkuje tež problemy a konflikty. Napjatosće a diskusije pak dyrbimy wudźeržeć“, wabješe Harig za kulturu wotewrjenosće a akceptancy.
Trump kritizuje UNO
New York (dpa/SN). Prezident USA Donald Trump je Zjednoćene narody jako „běrokratiske a hubjene wodźene“ kritizował. Njedostatkow dla UNO swój potencial njewučerpa, rjekny Trump wčera do swojeje prěnjeje narěče gremijej UNO w New Yorku. Budget UNO je wot lěta 2000 wo 140 procentow rozrostł. „Wuslědki pak njewotpowěduja inwesticijam.“
Suu Kyi za měrliwe rozrisanje
Naypyidaw (dpa/SN). Knježerstwo Myanmara je zwólniwe, do Bangladesha ćěkacych Rohingya zaso přiwzać. To zdźěli dźensa knježerstwowa šefina Aung San Suu Kyi w stolicy Naypiydaw. Nošerka Měroweho Nobeloweho myta přeproša wukrajnych diplomatow, prowincu Rakhine wopytać a so tam wo aktualnym połoženju informować. Suu Kyi chce konflikt z mjeńšinu Rohingya měrliwje rozrisać. Mnozy z nich su namocy dla do Bangladesha ćeknyli.
Wjac padow „reichsbürgerow“
To a tamne (19.09.17)
Pokład w nuznikach zaběra tuchwilu statne rěčnistwo w šwicarskim Genfje. Pjenjezy w hódnoće wjacorych dźesaćtysac eurow su na nuznikach města našli. Pozadki toho njejsu dotal znate. Samo toaleta banki bě z titami bankowkow zatykana. Tež w třoch hosćencach mějachu hosćo wjele pjenjez w nuznikach dla ćeže wodu ćahnyć. Statne rěčnistwo pyta nětko za skućićelemi njewšědneje wotstronjowanskeje akcije.
Podarmo na listy čakali su ludźo w durinskim Arnstadće. Wulke mnóstwa póšty z listowych kašćikow su so prawdźepodobnje zhubili. Zašły štwórtk pak lepichu zastojnicy skónčnje 48lětneho, kak je ju z kašćikow wjaceswójbneho domu wudźił. Jako jeho bydlenje přepytachu, nańdźechu tam njeličomne listy z cyłeho města. Póštu wšak ludźo přiwšěm najprjedy raz dóstać njemóža, dokelž je ju policija sćazała.
Cyrkej přichoda trjeba jednotu
Wittenberg (B/SN). Za cyrkej jednoty a zhromadnu eucharistiju wupraja so předsyda rady Ewangelskeje cyrkwje w Němskej Heinrich Bedford-Strohm. Na Božej słužbje Mjezynarodneje ekumeniskeje towaršnosće (IEF) we Wittenbergu wón rjekny, zo njeměli wěriwi křesćenjo za blidom Božim dźěleni być. IEF swjećeše we Wittenbergu 50lětne wobstaće. Towaršnosć běchu 1967 w šwicarskim Fribourgu jako hibanje europskich křesćanow załožili.
IS hrozy cyrkwi Našeje knjenje
Podpisma za čas festiwala zběrał
Mjez dźewjeć direktnymi kandidatami za wólby zwjazkoweho sejma we wólbnym wokrjesu 156 (Budyšin I) je Tobias Faku z 29 lětami najmłódši. To jeho wot tamnych kandidatow runje tak wotzběhuje kaž jeho połne mjeno: Christoph Tobias Mzingisi Faku. Žadyn nowačk na politiskim parkeće pak syn němskeje maćerje a južnoafriskeho nana njeje. Hižo wjacore razy je wón za Hibanje za wobydlerske prawa Solidarita (BüSO) za zwjazkowy sejm a krajny sejm w Sewjerorynsko-Westfalskej kandidował.
