Ze zapósłancom zwjazkoweho sejma Thomasom Jurkom (SPD) w rozmołwje

Thomas Jurk z Běłeje Wody bě wot lěta 2004 do 2009 sakski minister za hospodarstwo a dźěło. Wot lěta 2013 je wón zapósłanc zwjazkoweho sejma. Za njón 55lětny nětko znowa kandiduje. Marian Wjeńka je so z nim rozmołwjał.

Knježe Jurko, wólbna doba je skoro nimo. Što byšće za sebje w minjenych štyrjoch lětach wuspěch mjenował?

T. Jurk: Hladajo na serbsku narodnosć w Němskej na kóždy pad to, zo je so nam poradźiło financowanske zrěčenje za Załožbu za serbski lud zdźěłać. W nim je na přikład stopnjowanje mzdow sobu wobkedźbowane za tych, kotřiž w tymle wobłuku dźěłaja. Cyłkowny etat załožby je porno zašłemu zrěčenju wobšěrniši. Dokelž přisłušam etatowemu wuběrkej zwjazkoweho sejma, bě mi wažne hromadźe z kolegami docpěć, zo załožbje trěbne srědki přewostajimy.

A što měło so w přichodźe hišće rozrisać?

T. Jurk: Jedna z temow, kotraž budźe mje zaběrać, jeli mje do zwjazkoweho sejma wuzwola, budźe wězo nowe financowanske zrěčenje za Załožbu za serbski lud.

Budyšin (SN/at). „Wudawamy we wokrjesu miliony eurow za wutwar spěšneho interneta, ale ani stajny někak porjadny handyjowy zwisk njeje wšudźe zaručeny“, kritizuje Budyski měšćanski radźićel a wokrjesny předsyda FDP Mike Hauschild. „Dospołna handyjowa syć rozsudźa dźensa sobu wo žiwjenju a smjerći, dokelž nimamy wjace telefonowe cele“, da wón k rozmyslenju. Tak chcedźa swobodni demokraća z pomocu internetneje strony wšitke kónčiny Budyskeho wo­krjesa zwěsćić, hdźež žadyn handyjowy zwisk nimaja abo jenož jara słaby. Wobydlerjo móža nětko pod www.funkloch-bautzen.de handyjowe dźěry přizjewić. Na karće widźiš, hdźe klaca. Kónčina wokoło Kumšic je tam tuchwilu podata. Mike Hauschild mjenuje dalše přikłady, kotrež je sam nazhonił: „Mjez Budyšinom a Wojerecami stej to wotbóčka do Holešowa a zwjazkowa dróha B 96 wokoło Hórnikečanskeho jězora. Tež mjez Šćeńcu, Hermanecami a Minakałom ničo ­njeńdźe.“ Z wuslědkami chce so FDP na wobhospodarjerjow syćow wobroćić.

Budyšin (SN/at). Lěto po wukročenjach na Žitnych wikach w Budyšinje je tudyše městne towarstwo SPD póndźelu temu „Što čini zwjazkowa republika za wěstotu w Budyšinje“ rozjimało. Wot časa wukročenjow trajaca wšědna prezenca policije na Žitnych wikach je něšto přinjesła, je měšćanski a wokrjesny radźićel Roland Fleischer přeswědčeny. Wón pak njemóže sej předstajić, „wěčnje tam štyrjoch policistow měć“. Hubertus Schwerk rjekny, zo ma tule „permanentnu prezencu za znjeměrnjacu“. A tudyša direktna kandidatka SPD za wólby zwjazkoweho sejma dr. Uta Strewe so prašeše: „Čehodla je runje Budyšin tajki, kajkiž je?“ Trěbne je wobšěrne zhromadne dźěło měšćanskeje ciwilneje towaršnosće. Marko Kuring začuwa, zo njeje stat kmany wobydlerjow škitać, hdyž na policiji lutuje. Česćownosć před policistami měła so zaso přesadźić. Proces k tomu pak měli zwjazkowi politikarjo nastorčić.

Berlin (dpa/SN). We wólbnym boju spyta kanclerski kandidat SPD Martin Schulz wo připóznaće wabić a žada sej dalši telewizny duel ze zwjazkowej kanclerku Angelu­ Merkel (CDU). Z naprašowanjow wuchadźa, zo Schulz dale a wjac hłosow wolerjow zhubja. Nětko je wón kanclerce list napisał a sej dalši duel žadał. Kaž wón měni, njejstaj hišće wo mnohich dypkach, kaž wo digitalizaciji, renće, hladanju a kubłanju diskutowałoj.

Reakcija UNO „směšna“

Bangladesh/New York (dpa/SN). Ličba z Myanmara do Bangladesha ćěkacych přisłušnikow ludu Rohingya je po informacijach UNICEF na 370 000 rozrostła. Něhdźe 60 procentow z nich su dźěći. Wjacore pomocne skutki su na městnje a ćěkancam pomhaja. Bjezstrašnostna rada UNO chce dźensa popołdnju w New Yorku konflikt tematizować. Čłowjeskoprawniskej organizaciji Human Rights Watch a Amnesty International kritizu­jetej UNO, zo njeje konflikt prjedy tematizowała, a matej jeje dotalnu reakciju za „směšnu“.

Protesty přećiwo reformje