Niska woda Łobja łódźe haći
Drježdźany (dpa/SN). Běła flota Sakskeje móže Łobjo trajaceje pobrachowaceje wody dla, wot minjenych dnjow jenož hišće zdźěla wužiwać. „Wot minjeneho tydźenja su poprawom jenož hišće kołojězby móžne“, rjekny nawtiski nawoda předewzaća Jochen Haubold na naprašowanje nowin. Tak su jězby do Sakskeje Šwicy jenož hišće wot Pirny a mjez Drježdźanami a Mišnom móžne. Niskeje wody dla móža jenož hišće historiske parniki zasadźeć, kotrymž dosaha 50 centimetrow wody při Drježdźanskim pegelu. Modernej salonowej łódźi trjebatej znajmjeńša 60 centimetrow. Wonej stej při Terasowym pobrjoze přiwjazanej.
Přehlad krajneho centruma za škit před wulkej wodu wobswědči wčera dopołdnja 64 centimetrow, normalnej stej dwaj metraj. „Wuhlady njejsu wjele lubjace“, Haubold rjekny. Za połoženje w rěce je rozsudne, što so w hornim dźělu stawa. Łobjo dóstawa wodu k 95 procentam z Čěskeje z někotrymi hodźinami zapozdźenja. Jězbny plan wotpowědujo prognozam ze susodneho kraja stajnje aktualizuja. Nakładne łódźe hižo wot 28. meje wjace njejězdźa, Haubold zdźěli.
To a tamne (06.07.23)
Při dotal najwjetšim zasadźenju přećiwo ilegalnym plantažam canabisa we Wulkej Britaniskej je policija nimale 200 000 rostlinow sćazała a wjace hač tysac ludźi zajała. Nimo toho su wulke mnóstwa bróni a něhdźe 760 000 eurow našli, policija zdźěla. Racija bě „bjez runjeća“. Při operaciji su w Jendźelskej, Walesu a Šotiskej 11 000 policistow zasadźili. Plantaže běchu we wulkich industrijnych zawodach, ale tež w prózdnje stejacych twarjenjach zaměstnjene.
Z blešu wina za runje dźesać eurow za šulsku tombolu w swojim wólbnym wokrjesu je britiski premierminister Rishi Sunak rozhorjenje zbudźił. „Smy šokowani“, zdźěli šulske spěchowanske towarstwo nowinarjam. Jedna so wo tunje wino, kotrež w wobchodach poskićuja, 43lětny Sunak je najbohatši premier w britiskich stawiznach.
Nowe plany EU za gentechniku
Brüssel (dpa/SN). Komisija EU chcyše dźensa nowe plany nastupajo wobchadźenje z gentechniku w ratarstwje předstajić. Kaž z naćiskow wuchadźa, kotrež nowinarjam předleža, chce Brüsselski zarjad namjetować, wobstejace rjadowanja widźomnje wolóžić. Zaměr je, plahowanje rostlin pospěšić, kotrež su robustniše přećiwo suchoće a škódnikam. Kritikarjo so boja, zo njemóža so ludźo přichodnje wjace wědomje přećiwo genetisce změnjenym žiwidłam rozsudźić.
Israelski wojak morjeny
Tel Aviv (dpa/SN). Israelskeho wojaka su w palestinskim měsće Dsheninje w Kraju zapadnje Jordana zatřělili. To je israelska armeja zdźěliła. Na israelskim boku je to prěni smjertny wopor po spočatku wojerskeje ofensiwy. Na tamnym boku su znajmjeńša dwanaće Palestinjanow morili a wjace hač sto zranili. Z wojerskej akciju chcyše Israel infrastrukturu militantnych Palestinjanow zničić. Palestinjenjo su cofacych israelskich wojakow dźensa wospjet masiwnje nadběhowali.
Wodu z Fukushimy do morja?
Zwjazkowy prezident Frank-Walter Steinmeier, jeho mandźelska Elke ...
Kabinet naćisk etata schwalił
Macron: Socialne syće blokować
Tafle skorža přećeženja dla
Hamburg (dpa/SN). Pomocna organizacija „Tafla“ je po swojich wuprajenjach w Němskej přiběrajcy přećežena. Dale a wjetša ličba potrjechenych ludźi a runočasnje woteběracy poskitk žiwidłow zawinujetej po wšej Němskej wuwzaćny staw nastupajo rozdźělowanje žiwidłow, rjekny nawoda předsydstwa schleswigsko-holsteinskeho krajneho zwjazka Frank Hildebrandt nowinarjam. „Ličba kupcow je so na někotrych městnach nimale podwojiła. Dary žiwidłow su runočasnje wo zdźěla 50 procentow woteběrali.“
Ličba čestnohamtskich pomocnikow je porno tomu konstantna wostała, zdźěli rěčnica cyłoněmskeho zwjazka taflow Anna Verres. „Pomocnicy dźěłaja na mjezy přećeženja – psychisce kaž tež ćělnje“.
Tafle kaž tež socialne zwjazki widźa stat w zamołwitosći. „Rozprawy taflow su wostrózbjace: W časach rekordneje inflacije a raznje přiběracych płaćiznow njemóža sej mnozy ani wjace jědź dowolić“, rjekny nawodnica předsydstwa Socialneho zwjazka Němskeje Michaela Engelmeier. Stat dyrbjał swojej zamołwitosći wotpowědować a na přikład zničenje žiwidłow zakonsce zakazać.
Ćmowa stronka
To a tamne (05.07.23)
Znowa dobył je 39lětny Joey Chestnut mjeztym 16. wubědźowanje w napřemojědźenju hotdogow składnostnje dnja njewotwisnosće USA w New Yorku. Chestnut je wčera w běhu dźesać mjeńšin na wšě 62 warjenych kołbaskow w całće spóžěrał. Muž je wubědźowanje we wólnočasnym parku Coney Island južnje New Yorku wot lěta 2016 stajnje dobył. Jeho wosobinski swětowy rekord: 76 hotdogow, nimale wosom za mjeńšinu.
Nimale sto tubow zubneje pasty pokradnyłoj staj njeznataj z wobchoda žiwidłow w durinskim Heldburgu. Njeznataj zastupištaj do wobchoda za čas wotewrjenja a zhubištaj so ze zubnej pastu w hódnoće 450 eurow. Sobudźěłaćerka padustwo krótko po tym w drogerijowym wotrjedźe zwěsći. Skućićelej so zminyštaj. Awtomatiska kamera je njeskutk po słowach nawody wobchoda nahrawała.
Prawniski puć za „indigeny lud“ nětko pruwuja
Serbski sejm je prawiznikam Londonskeje kenclije „Doughty Street Chambers“ nadawk dał, juristiske kročele pruwować, kak móhli připóznawanje Serbow jako indigeny lud přesadźić.
