Srědki digitalizacije raznje skrótšene
Berlin (dpa/SN). Etatowy plan za nuznje trěbnu digitalizaciju zarjadnišćow w Němskej je kontrowersnu diskusiju zbudźił. Kritikarjo skorža na masiwne skrótšenje srědkow, kotrež su w naćisku etata za přichodne lěto, kiž bě zwjazkowe knježerstwo schwaliło, zaplanowane. Zwjazkowe nutřkowne ministerstwo je so wčera kritice wobarało: Dźakowano njepřetrjebanym srědkam minjenych lět su najwjetši dźěl diferency „wotpopadnyli“, rěčnica w Berlinje zdźěli.
Po spočatk julija wot kabineta schwalenym naćisku zwjazkoweho etata za lěto 2024 su we wobłuku „digitalizacija zarjadnišćow a zarjadniskich posłužbow“ zwjazkoweho nutřkowneho ministerstwa město dotal 377 milionow jenož hišće 3,7 milionow eurow zaplanowali. Nowinarjo rozprawjeja wo wulkim mjerzanju mjez druhim w statnej kencliji w Schleswigsko-Holsteinskej. Kraj měješe w nadawku wšěch zwjazkowych krajow mjez druhim internetnu próstwu wo dźěćacy pjenjez zdźěłać – a je projekt po připowědźenym skrótšenju zaćisnył.
To a tamne (04.08.23)
Na wšě 100 000 kilometrow wob lěto po puću je braniborski ministerski prezident Dietmar Woidke (SPD) ze swojim słužbnym „Mercedesom S“. Tole je statna kenclija w Podstupimje zdźěliła. Nahladna ličba kilometrow ma tež něšto z wulkosću kraja činić, rěčnik rozłoži. Braniborska je po płoninje pjaty najwjetši kraj Němskeje. Dalše informacije wo awće a wo słužbnych jězbach wostanu tajne.
Kak wobchadźeć z fanami heavy-metaloweho festiwala w schleswigsko-holsteinskim Wackenje, kotřiž njesmědźa najebać zastupny lisćik błóta dla na swjedźenišćo? Tute prašenje zamołwitych tuchwilu chětro zaběra. Prěni króć w stawiznach eventa dyrbjachu wulki dźěl wopytowarjow domoj pósłać. Móžne rozrisanje: Ludźom pjenjezy wróćić a jim lisćik za klětu rezerwować. Hišće pak njewědźa, kak tole technisce zmištrować.
Bamž: Dokal kročiš, Europa?
Hłowa katolskeje cyrkwje na swětowym zetkanju młodźiny w Lissabonje
Lissabon (dpa/SN). Bamž Franciskus je sej na Swětowym zetkanju młodźiny w Lissabonje zmužity měrowy kurs Europy žadał. Zdobom zasadźuje so wón za nowu politisku wiziju do přichoda. Kontinent měł so swojim problemam wěnować, sej hłowa katolskeje cyrkwje wčera w kulturnym centrumje Belém žadaše.
Hladajo na wójny a konflikty a z tym zwjazanu bědu a migraciju bamž z kritiku přećiwo Europje njelutowaše, dokelž wona po jeho měnjenju přemało k rozrisanju konfliktow přinošuje. „Dokal kročiš, Europa, hdyž swětej žadyn kurs měra njenamjetuješ, žane kreatiwne puće, wójnu w Ukrainje skónčić a tójšto konfliktow, kotrež swět z krwju wopancaja?“, so wón prašeše. Wosebje pobrachowacy zmužity puć měra je čujomny. Zamołwići inwestuja wjace pjenjez do bróni hač do přichoda dźěći, Franciskus rjekny.
Kwota stupa
Unija ma 90 prašenjow
Berlin (dpa(SN). Nowe koło w zwadźe wo tepjenski zakoń: Frakcija CDU/CSU ma hišće 90 prašenjow a žada sej wotmołwu zwjazkoweho knježerstwa. W naprašowanju, kotrež medijam předleži, dźe mjez druhim wo statne spěchowanje, wo škit podružnikow, wo trěbnych rjemjeslnikow, wo dalše parlamentariske postupowanje a wo prašenje, hač chcyło zwjazkowe knježerstwo předležacy naćisk zakonja hišće změnić. CDU je sej wěsta, zo njeje tuchwilny naćisk dozrawjeny.
Trump před sudnistwo skazany
Washington (dpa/SN). Po dotal njesłyšanej skóržbje přećiwo Donaldej Trumpej w zwisku z wobwliwowanjom wólbow a nadběhom na Kapitol bě bywši prezident USA dźensa prěni króć před sudnistwo skazany. Termin za formalne wozjewjenje wumjetowanjow přećiwo Trumpej bě dźensa wječor předwidźany. Spočatnje njebě jasne, hač Trump sam přińdźe abo hač je přišaltowany. Trump je prěni bywši prezident USA, kiž dyrbi so před sudnistwom zamołwić.
Žane přepokazanki do Nigera
Pašowarjo ludźi brutalniši
Nadpady trutow wotwobarane
Žada sej krizowy wjeršk twarstwa
Berlin (dpa/SN). Prezident zwjazka rjemjeslnikow Němskeje Jörg Dittrich žada sej hladajo na přiběracu krizu twarskeho hospodarstwa wjerškowe zetkanje. „Trjebamy tajki wjeršk“, rjekny Ditrich nowinarjam. Wón je sej wěsty, zo bliži so twarstwo hladajo na dramatisce woteběracu ličbu twarskich dowolnosćow w Němskej krizowemu dołej. „Tomu njemóžemy drje wjace zadźěwać“, je sej wón wěsty. „Ćim nuznišo je, wo naprawach rěčeć, zo njeby puć po tutym dole předołhi był. Trjebamy signal rozmacha.“
Twarske kóšty a přiběrace danje kreditow wuwiće na twarnišćach kraja hižo měsacy dołho haća. Wosebje twar bydlenjow pod tym ćerpi. Ministerka za twarstwa Klara Geywitz (SPD) je tohodla dawkowe wolóženja namjetowała. Dittrich na to pokazuje, zo sej rjemjesło hižo wot nalěća wotpowědne rozmołwy žada. „Wšitcy zamołwići dyrbja za blido. K tomu słušeja banki runje tak kaž twarske a rjemjeslniske předewzaća. „Kriza twarstwa ma dramatiske wuskutki na hospodarstwo a wšu towaršnosć.“
Kajka Europa?
Do swědomja rěčeć móžeš jenož tomu, kiž hišće swědomje ma. To drje je zasadny problem wčerawšeje namołwy bamža Franciskusa na swětowym zetkanju młodźiny w portugalskej stolicy Lissabonje na zamołwitych Europy. Bamž paruje mjez nimi „zmužity kurs měra“ a „kreatiwne puće, wójnu w Ukrainje skónčić“. Europa jako faktor mocy a stability wočiwidnje wjace njeeksistuje. Dawno smy so ponižili na swěrneho wotročka USA. Francoski prezident Emmanuel Macron je jenički, kiž sej stajnje zaso sylnišu a wosebje sebjewědomišu Europu na swětowym jewišću žada. Jemu pak so mjeztym směja kaž wbohemu błazniwcej, kiž njeje znamjenja časa hišće spóznał. Zamołwići EU njejsu sej po zdaću toho wědomi, zo ze swojej pasiwnosću a podwólnosću napřećo USA na kóncu jenož tych sylnja, kotřiž so tak a tak dawno prašeja, čemu je wony konstrukt 27 statow hišće trěbny – a kiž chcyli jón w tuchwilnej formje wotstronić.
Marko Wjeńka
To a tamne (03.08.23)
Ze 2,6 promilemi alkohola w kreji je šofer wosoboweho awta z Braniborskeje nimale 300 kilometrow k Baltiskemu morju jěł a je sej krótko do swojeho cila za wodźidłom wusnył. 38lětny z wokrjesa Dubja-Błóta bě w Rostocku kedźbnosć zbudźił, jako po seklojtej čarje jězdźeše. Jako awto na busowym zastanišću steješe a motor hišće běžeše, tukachu swědcy na strowotniske problemy šofera. Policija zwěsći alkohol a jězbnu dowolnosć muža sćaza. 38lětny bě po puću do susodneho Graal-Müritza – do dowola.
Znowa je pozdatne rubježne zwěrjo w Berlinje zasadźenje policije zawinowało. Muž bě zastojnikow informował, po tym zo bě w měšćanskim dźělu Dahlemje dźiwje zwěrjo wuhladał. Zastojnicy wuhladachu tam plyšowe zwěrjo na elektriskim kašćiku měšćanskeho zahrodnistwa. Štó je hrajku tam sadźił, njewědźa.
