Jedyn milion awtow wob lěto
To a tamne (17.07.23)
Na wšě 2,18 promilow alkohola w kreji měješe 42lětna mać, jako přijědźe z awtom na policajsku stražu w Lubiju, zo by swojeho syna wotewzała. Toho běchu zastojnicy lepili, jako w dźěćacym a swójbnym centrumje kompjuter a žiwidła kradnješe. 16lětny měješe 1,46 promilow alkohola w kreji. Mać dyrbješe jězbnu dowolnosć hnydom wotedać. Wona dyrbi runje tak kaž jeje syn wšelakich přeńdźenjow dla z chłostanjom ličić.
Pjeršćenjej mandźelskeju wotnjesł je wětřik w Nižozemskej. „Přizemjenje“ pjeršćenjow při powětrowym balonje měješe romantiski wjeršk kwasa w měsće Mill njedaloko mjezy Němskeje być. Krótko do wjerška pak wětřik balon hrabny a do powětra zběhny. Do toho bě so ćežidło pušćiło, kotryž balon w runowaze dźeržeše. Mandźelskaj nětko internetnje za pjeršćenjomaj pytataj.
Narodny swjatk woswjećili
Paris (dpa/SN). Starosćejo so nowych namócnosćow su w Francoskej dźensa, 14. julija, narodny swjatk woswjećili. Na Champs-Élysee w Parisu je prezident Emmanuel Macron tradicionalnu wojersku paradu sćěhował. Wočakujo rozestajenja su po wšěm kraju 130 000 policistow zasadźili. Po smjertnym wutřělu policista na młodostneho při wobchadnej kontroli bě w Francoskej dny dołho k ćežkim namócnosćam dóšło.
China reaguje hněwna
Berlin (dpa/SN). China je hněwna na nowu strategiju zwjazkoweho knježerstwa napřećo Chinje reagowała. China njeje zawinowar problemow, z kotrymiž so Němska bědźi, rěka w prěnjej reakciji w chinskej rěči na internetnej stronje chinskeho wulkopósłanstwa w Berlinje. „China je partner Němskeje při zmištrowanju wužadanjow a žadyn přećiwnik.“ Němska měła wuwiće Chiny „racionalnje, wobšěrnje a objektiwnje“ wobhladować.
Zelenskyj ma dalšu podpěru
Nawoda wurywanjow Torsten Trebes (nalěwo) a Stefan Dalitz z ...
Aktiwisća dalše blokady planuja
Na wopory spominali
Scholz: Žadyn limit spěšnosće
Füssen (dpa/SN). Zwjazkowy kancler Olaf Scholz (SPD) je bórzomne wobmjezowanje spěšnosće 130 km/h na awtodróhach Němskeje wotpokazał. Na wobydlerskim dialogu w Füssenje w Allgäuju wón wčera rjekny, zo njeje za to tuchwilu „žaneje zakonjedawarskeje wjetšiny“. Wón měješe temu drje swój čas w swojim wólbnym programje, Scholz rjekny, „tole pak njedosaha“. Pozadk je, zo FDP w koaliciji z SPD a Zelenymi limit wotpokazuje.
Žona bě so Scholza prašała, čehodla smědźa šoferojow najebać wulke ekologiske problemy na awtodróhach dale z 180 km/h smalić. Z wobmjezowanjom spěšnosće móhła Němska klimje škodźacy wuhlikowy dioksid zalutować. Scholz žadaše sej wutwar elektriskeje mobility.
Wo wobłuku tak mjenowanych kanclerskich rozmołwow chce Scholz wšitke 16 zwjazkowe kraje wopytać a so tam z wobydlerjemi zetkać.
Dale a wjace chudych na swěće
New York (dpa/SN). Minjene lěta je 165 milionow ludźi po wšěm swěće po rozprawje UNO pod mjezu chudoby přišło. Koronapandemije a z tym zwjazanych hospodarskich zesuwanjow dla je so wšědnje k dispoziciji stejaca suma pjenjez za potrjechenych pod mjezu 3,26 eurow znižiła, wuwićowa agentura UNO zdźěla. Cyłkownje žiwori 1,65 miliardow ludźi na swěće pod tutej mjezu. „Ličba by hišće wyša była, njebychu-li knježerstwa za čas koronakrizy socialne programy a konjunkturne pakety nastajili“, rjekny Achim Steiner, najwyši zastupnik Němskeje pola UNO. Chude kraje pak njemóža tute wudawki častodosć zmištrować. To ma daloko sahace socialne sćěhi: „Knježerstwo, kotrež njemóže lěkarjow a chorobnych sotrow zapłaćić, kotrež njemóže strowotniskim centram medikamenty přewostajić, podrywa socialnu infrastrukturu kraja“, tak Steiner.
UNO zdźěla, zo je sej 52 krajow swěta do paslow zadołženja zalězło, z kotrychž so bjez pomocy hižo wjace njewudrěja. Zjawne zadołženje je loni na rekordnu sumu 82,5 bilionow eurow rozrostło. To je pjeć króć telko kaž w lěće 2000.
To a tamne (14.07.23)
Pjeć lodow na šišce pokradnyli su njeznaći w zahrodniskim wobchodźe w Meeranje pola Šwikawy. Njeznaći chłóšćerjo běchu za to durje wikow namócnje wotewrěli a so tak do wobchoda zadobyli. Tam pokradnychu lód z chłódźenskeje lódki. Při tym zawostajichu wěcnu škodu 10 000 eurow. Lód porno tomu njepłaćeše wjace hač 15 eurow.
Ličba wobchadnych njezbožow z e-rolerami dale přiběra. Jeno w Braniborskej su loni 127 njezbožow z e-scooterami zličili, policija zdźěla. Lěto do toho bě jich 65 njezbožow. 90 ludźi so při zražkach zrani. Tež druhdźe so njezboža z e-rolerami kopja. Italska chce tohodla prawidła přiwótřić: Přichodnje dyrbja wužiwarjo rolerow nahłownik nosyć a jězdźidło zawěsćić. Nimo toho trjebaja čisłowu tafličku, wobchadne ministerstwo planuje. Parlament dyrbi tomu hišće přihłosować.
Kak wobchadźeć ze Chinu?
Berlin (dpa/SN). Zwjazkowe knježerstwo je dźensa po dołhej a zdźěla kontrowersnej diskusiji napjeće wočakowanu strategiju Chinje napřećo schwaliło. Zwjazkowa wonkowna ministerka Annalena Baerbock (Zeleni) na nowinarskej konferency na to pokaza, zo ma poćah mjez Němskej a Chinu wšelake stronki. Na jednym boku chce Němska ze wšěmi krajemi w měrje a přezjednosći žiwa być. Na druhim boku je China sylny hospodarski partner a zdobom wulki riwala.
Aktiwisća lětanišći blokowali
Hamburg (dpa/SN). Klimowi aktiwisća skupiny „Poslednja generacija“ su dźensa betonowej pisće Hamburgskeho a Düsseldorfskeho lětanišća blokowali. Dypkownje k zahajenje prózdnin su so wjacori demonstranća tam přilěpili, hdźež lětadła wotleća a přizemja. Na to dyrbjachu zamołwići wobě lětanišći nachwilnje zawrěć. Hamburgske lětanišćo wot 10 hodź. zaso dźěłaše. Skupina zdźěli, zo protestuje z akciju přećiwo ignorowanju klimoweje krizy ze stron knježerstwa.
Zranjeni po ruskim nadpadźe
