Berlin (dpa/SN). Bywši prezident USA ­Barak Obama chcyše so dźensa wječor w Berlinje přihladowarjam prezentować. Planowana je narěč 61lětneho w hali na Wuchodnym dwórnišću ze 17 000 městnami k sedźenju. Jako moderator předwidźany je žurnalist Klaas Heufer-Umlauf. Při tym chcyše Obama „Poselstwo pozitiwneho a trajaceho přewróta“ wozjewić. Zastupne lisćiki su za płaćiznu mjez 61 a 550 eurow předawali. Obama bě mjez 2009 a 2017 prezident USA. We wólbnym boju bě wón w Berlinje při Stołpje dobyća před 200 000 ludźimi rěčał, jako prezident 2013 před Braniborskimi wrotami.

Berlin (SN). Wot 15. do 18. junija přeprošatej Delnjoněmski kaž tež Mjeńšinowy sekretariat wšitkich zajimcow ze štyrjoch awtochtonych narodnych mjeńšin Němskeje kaž tež rěčnikow delnjoněmčiny w starobje 18 do 35 lět na program k mjezsobnej wuměnje do Berlina. Hłowny zmysł zetkanja je „wjace wo tamnych skupinach a wo móžnosćach politiskeho wliwa w zmysle mjeńšiny na zwjazkowej runinje zhonić a mjezsobne syće wutworić“. Do štyrjoch w Němskej připóznatych awtochtonych narodnych mjeńšin a ludowych skupin słušeja: mjeńšina Danow, ­ludowa skupina Frizow, němscy Sintojo a Romojo a Łužiscy Serbja. Delnjoněmski a Mjeńšinowy sekretariat planujetej mjez druhim zetkanja a rozmołwy z politikarjemi a akterami mjeńšinoweje politiki kaž tež wjacore dźěłarnički. Tak zaběraja so wobdźělnicy z prašenjemi kaž: Štó smy? Kak chcemy w zjawnosći wustupować? Kotre aspekty swojeje identity chcemy pokazać? W čim wobsteji přisłušnosć k narodnej mjeńšinje abo ludowej sku­pinje za mnje wosobinsce? Přizjewjenja a prašenja móžeće hač do 14. meje pod: info@niederdeutschsekretariat.de zapodać.

„Dźeń rybičkaceje całty“ woswjeća ­přichodny kónc tydźenja – mjeztym 13. króć – na sewjeru Němskeje. Podłu Baltiskeho morja planuja wustupy shanty-chórow, kolesowarske jězby, originalnu hudźbu, dźěćace programy a akcije nadróžnych wuměłcow. Tež w Hamburgu chcedźa pomórskej kulinariskej chłóšćence česć wopokazać. Prěni króć přihotuja zarjadowanja na Dnju rybičkoweje całty tež nad Sewjernym morjom.

Chrobłe worakawstwo je sej student wuměłstwa w Južnej Koreji dowolił: Wón hrabny sej z instalacije italskeho wuměłca Maurizija Cattelana w stolicy Seoulu bananu, zo by ju nablaku zjědł. Na wideju je widźeć, kak młody muž přilěpjenu bananu wottorhnje, ju woběli a zjě. Po tym běliznu zaso přilěpi. Spočatnje student rjekny, zo bě prosće hłódny, dokelž njebě snědał, pozdźišo rěčeše wo „akciji“.

Wiesbaden (B/SN). Předsydka Zwjazka němskeje katolskeje młodźiny (BDKJ) ze 660 000 čłonami, Daniela Hottenbacher, je sej na třidnjowskim antipatriarchatskim wuradźowanju žadała, zo „dyrbimy přećiwo seksizmej a diskriminaciji wojować a so wo to starać, zo móža so wšitcy njewotwisnje wot splaha swobodnje wuwiwać“.

Žony a lajkojo w cyrkwi

Vatikan (B/SN). Bamž Franciskus je so za „integraciju žonow“ w cyrkwi a towarš­­nosći wuprajił. Po jeho měnjenju měli so kompetenca a sylnosće muži a žonow zjednoćić. Mužojo a žony, kiž wukonjeja wažne nadawki w cyrkwi bjez swjećizny, su w cyrkwinskej słužbje lajkow dale njeparujomne.

Zawostajenstwo Benedikta XVI.

Rom (B/SN). Bamž Benedikt XVI. je italskemu biskopstwu Velletri-Segni, kotrež bě za njeho nowa domizna, 20 000 eurow wotkazał. Wukonjer testamenta, Georg Gänswein, zdźěli, zo je najwjetši dźěl zawo­stajenstwa přešoł do Instituta bamža Benedikta XVI. Dalše wažne dokumenty chowaja so w tajnym bamžowskim archiwje. Gänswein sam je taber­nakl a drjewjany křiž zdźědźił.

Pontifeks wopyta domiznu