Berlin/Peking (dpa/SN). Zwjazkowa wonkowna ministerka Annalena Baerbock je dźensa rano swój nastupny ­wopyt w Chinje zahajiła. W přistawnym měsće Tianjin je politikarka Zelenych ­šulu wopytała, na kotrejž wuwučuja tež němčinu. Nimo toho poby wona w němskim předewzaću, kotrež produkuje wětrniki. Centralne politiske rozmołwy su jutře w Pekingu planowane.

Tohorunja jutře wočakuje němsku ­politikarku chinski wonkowny minister Qin Gang. Zhromadnje z nim pojědźe Baerbock w spěšniku do Pekinga, po tym zo je zawod twarca elektriskich awtow wopytała.

Politisce drje budźe wopyt němskeje politikarki w Chinje jedyn z najćešich w dotalnym času jeje zastojnstwa. China wójnu ruskeho prezidenta Wladimira Putina přećiwo Ukrainje politisce podpěruje a zabjerje tež w prašenju Taiwana zapadej napřećo jara raznu poziciju. Opozicija w Němskej žada sej tuž wot Baerbock jasnu strategiju w poćahach k Chinje, zo bychu so hospodarske wotwisnosće wottwarili.

Naćisk zakonja wo reformje mjenoweho prawa w Němskej je wozjewjeny. Serbske zajimy su na prěni wid derje zakótwjene. Zakład předleži, zo změja Serbowki prawo, žónsku formu swójbneho mjena do personalnych dokumentow zapisać dać. K wobkrućenju a zwobraznjenju tejele nowosće je zwjazkowe ministerstwo justicy přiručku wudało. Tam z maćiznu so tak derje njewuznawacych jenož na słowjanske rěče njeskedźbnja, ale tež serbski přikład wužiwaja. Ofensiwnosć pomha wšěm tym, kiž so za mjenowe prawo zajimuja, rozumić: Liberalny stat swoje (po narodnosći njeněmske) wobydlerki dlěje njewobmjezuje, po splahu tu formu swójbneho mjena wjesć, kotraž tradiciji jich rěče wotpowěduje. W interneće přistupna wujasnjowanska přiručka runa so w tymle dypku skromnemu ekskursej do serbskeje mjenowědy. Z tymle postupowanjom waža sej awtorojo zakonskeho naćiska tradicije serbskeju rěčow a zdobom z tym zwjazanu kulturnu bohatosć. Axel Arlt

Hněwajo so na bywšeho podružnika je wobsedźer domu w bayerskim Rammingenje wobsydstwo muža, kotrež po poł lěće přeco hišće w bydlenju ležeše, na wja­corych městnach w měsće wotpołožił a podružnikej daty pósłał, hdźe wěcy leža. Te wšak běchu spěšnje namakane, mjez druhim wot ludźi, kotřiž policiju wo namakankach informowachu. Policija před tajkimi akcijemi warnuje, pokazujo tež na prawniske konsekwency.

Stražu zwjazkoweje policije w Frank­furće nad Wódru je sej muž wupytał, zo by tam swój mobilny telefon nabiwał – a přińdźe na to do jastwa. Zastojnicy zwěsćichu, zo za mužom wjacorych njeskutkow dla z wukazom zajeća pytaja. Nimo toho je pólskemu staćanej zakazane, do Němskeje přińć. Zastojnicy dowjezechu 37lětneho do jastwa. Swój mobilny telefon muž w jastwje wužiwać njesmě.

Berlin (dpa/SN). Zwjazkowy minister ­za strowotnistwo Karl Lauterbach (SPD) a minister za ratarstwo Cem Özdemir (Zeleni) chcyštaj dźensa předźěłany plan nastupajo legalizaciju cannabisa před­stajić. Prawdźepodobnje njeje nowa wersija tak daloko sahaca kaž prěnjotna. Tak njebudźe drje móžno, wopojny jěd we wobchodach kupować. Kóždy smě najwjace 25 gramow cannabisa za swójsku potrjebu wobsedźeć, zakoń předwidźi.

Wobaraja so wotpinjenju

Berlin (dpa/SN). Krótko do wotpinjenja poslednich třoch atomowych milinarnjow w Němskej přichodnu sobotu dale wo tym diskutuja. Wosebje ze stron FDP naprawu dale kritizuja. Liberalni chcedźa milinarnje jako rezerwu zachować. Tež fachowcy nimaja wotpinjenje za trěbne. Porno tomu Zeleni dale na wotpinjenju milinarjow wobstawaja a tež zastopnjowanje jako rezerwu wotpokazuja.

Wolóža mobilizowanje muži