Su motiwowani
Smochćicy (SN). Budyski wokrjesny zwjazk CDU je minjeny pjatk a sobotu klawsurne posedźenje w Smochćicach wotměł. Tak přihotowachu čłonojo klětuše komunalne wólby, wólby Sakskeho krajneho sejma a europske wólby. Něhdźe 50 sobustawow předsydstwa wokrjesa CDU, wjesnjanosća a předsydźa wjesnych skupin běchu přitomni. Dale zaběrachu so čłonojo ze šansami změny strukturow w kónčinje. K tomu přeprosychu sej prof. dr. Christiana Stegmanna z Němskeho centruma za astrofyziku kaž tež dr. Birgit Beckmann z centruma za twarske slědźenje „LAB-Lausitz Art of Building“.
Čłonojo CDU Budyskeho wokrjesa su wysoko motiwowani, dokelž z dobrymi kandidatami ke klětušim wólbam nastupja. „Za to nětko wšitko přihotujemy. Zaměr je, zo CDU najwjac hłosow wolerjow dóstanje, tak zo móžemy zaso w parlamentach zastupjeni być a našu domiznu sobu wuhotować“, podšmórny předsyda wokrjesneje CDU Udo Wićaz. Hladajo na wšitke wužadanja chcedźa zhromadnje změnu strukturow pozitiwnje wobwliwować, tak zo region inowatiwny a zajimawy wostanje. Tak chce CDU wobstejace hódnoty zachować .
Wopory njezboža
Mjenje zrěčenjow
Wiesbaden/Drježdźany (dpa/SN). Mjenje młodostnych rozsudźi so loni za wukubłanje w hladanskim wobłuku. Kaž z dotal předležacych ličbow wuchadźa, je cyłkownje 3 375 młodostnych wukubłanske zrěčenje podpisało – 60 zrěčenjow mjenje hač w lěće 2021.
Hladajo na cyłu Němsku je loni něhdźe 4 000 wosobow mjenje tajke zrěčenje podpisało. Statistiske zarjady na to skedźbnjeja, zo budu wšitke daty snano hakle w lěću předležeć. Mjeztym zo je w Sakskej mjenje rozdźělow, za tym wupada, zo je tomu w druhich krajach hinak.
To a tamne (05.04.23)
Dokelž chcyše muž w Praze přitulnu atmosferu w swojej bydlenskej stwě měć, je na swojim telewizoru widejo kaminoweho wohenja nastajił. Kedźbliwy susod pak zawoła wohenja w stwě dla wohnjowu woboru, kotraž je hnydom reagowała a jězdźidło na přizjewjene městno pósłała. Kaž wobornik w stolicy Čěskeje wčera zdźěli, wšak bě to njetrjebawši alarm. Přiwšěm chwala sej tajkich kedźbliwych susodow, wšako móhło tomu tež hinak być.
Betty Buckland w šotiskim Edingburgh je sej nětko són spjelniła. Zhromadnje z nazhonitym pilotom je 93lětna hišće raz sama z lětadłom lećała. Z 240 kilometrami na hodźinu a 600 metrow wysoko zemje lećeć bě jej wulkotne dožiwjenje. Buckland njeje prěni raz za wodźidłom lětadła sedźała. W lěćnych prózdninach přebywaše často pola přiwuznych w USA, hdźež měješe z kuzenkom móžnosć lećeć.
Finska oficialnje sobustaw NATO
Brüssel (dpa/SN). Finska přistupi dźensa oficialnje k NATO. K tomu měješe so popołdnju swjatočna ceremonija w Brüsselu přewjesć. Nimo finskeho prezidenta Saulija Niinistöa wobdźěla so tež zwjazkowa wonkowna ministerka Annalena Baerbock (Zeleni) a 29 kolegow tamnych sobustawskich krajow. Finski přistup je reakcija na nadpad Ruskeje na Ukrainu. Finska ma 1 300 kilometrow dołhu mjezu k Ruskej. Tež Šwedska chce z čłonom NATO być. Turkowska pak so tomu spjećuje.
Zastojnicy hromadźe dźěłaja
Hrádek nad Nissou (dpa/SN). Zwjazkowi policisća a jich čěscy kolegojo w přichodźe hraničnu kónčinu mjez Němskej a Čěskej přepruwuja. Tak chcedźa zhromadnje wosoby a jězdźidła kontrolować a wotpowědne informacije wuměnjeć, zdźělištej wobě stronje dźensa w Hrádeku nad Nissou. EU naprawu spěchuje. Zastojnicy wobeju krajow su wot lěta 2020 zhromadnje zwučowali a wotpowědnu rěč swojich nowych kolegow nawuknyli. Wšědnje su zastojnicy nětko w kónčinje wokoło Žitawy zasadźeni.
Trěbnych je miliardow eurow
Při ćežkim njezbožu dweju ćahow w Nižozemskej je znajmjeńša ...
Günther: Žadyn přećiwk
Trump dźensa před sudnistwom
Washington/New York (dpa/SN). Bywši prezident USA Donald Trump je do swojeho sudniskeho termina k wozjewjenju skóržby přećiwo njemu do New Yorka dolećał. Priwatne lětadło Trumpa je wčera popołdnju na New Yorkskim lětanišću LaGuardia přizemiło, medije rozprawjeja. Po tym jědźeše kolona awtow z Trumpom do Manhattana srjedź New Yorka.
Trump dyrbi so jako prěni prezident w stawiznach USA w chłostanskim jednanju zamołwić. Statne rěčnistwo bě skóržbu přećiwo njemu minjeny štwórtk wozjewiło. Skóržbu chcychu w běhu dnja na sudnistwje předstajić. Trump je winowaty, wosobinsce přitomny być. Skóržba wopřija 30 wumjetowanjow přećiwo 76lětnemu. Tak je Trump pječa hrajerce pornografiskich filmow pjenjezy płaćił, zo by wo aferje z nim mjelčała.
New York hotuje so na demonstracije a namócnosće ze stron přiwisnikow Trumpa. Wjace hač 35 000 policistow ma wěstotu a porjad w měsće zaručić.
Habeck: Signal Ukrainje
Minister Zelenych z delegaciju hospodarstwa do Kijewa dojěł
Kijew (dpa/SN). Wicekancler Robert Habeck chce němsko-ukrainske energijowepartnerstwo wožiwić. Tole je politikar Zelenych wčera po wopyće w jednej z transformatorowych stacijow energijoweho koncerna „Ukrenergo“ připowědźił, kotraž wulke dźěle Ukrainy z milinu zastara. Habeck bě so wčera k politiskim rozmołwam do Ukrainy podał. Politikar Zelenych dojědźe rano z małej delegaciju zastupnikow hospodarstwa do ukrainskeje stolicy. Hłownje dźe při jězbje wo znowanatwar wot Ruskeje nadpadnjeneje Ukrainy a zhromadne dźěło na polu energije.
Při tym je wažne, Ukrainje jasny signal posrědkować, rjekny Habeck na Kijewskim dwórnišću, po tym zo bě ćah dojěł. Je to znamjo, „zo do toho wěrimy, zo Ukraina dobudźe, zo ju znowa natwarimy a zo nochce Europa Ukrainu jenož w nuzy podpěrować, ale zo mamy ju přichodnje tež za hospodarsce sylneho partnera.
Wjac zjawnje serbować
Njedawno je Julian Nyča na swojim Twitter-kanalu wo najrjeńšim dožiwjenju kónc tydźenja rozprawił – w němskej železnicy, štož by hižo překwapjenki dosć było. K tomu je widejo z ćaha pokazał, z wótřerěčaka słyšiš hłós žony: „Kamjenc. Wutrobny dźak, zo sće z našim Drježdźanskim ćahom sobu jěli. Na zasowidźenje!“ Při wčerawšim słyšenju wuběrka sakskeho krajneho sejma nastupajo rozprawu statneho knježerstwa wo połoženju serbskeho ludu je Nyča jako jedyn z přeprošenych serbskich fachowcow na sćěhowacy fakt skedźbnił: Je ćežko, dźěći a młodostnych k wužiwanju rěče pozbudźować, kotraž so w zjawnosći njenałožuje.
Wo jednotliwych naprawach 2plus a Witaj móhli drje wěčnje debatować. Zo je pak na zjawnych zarjadowanjach najebać mjeńši abo wjetši dźěl serbsce njerozumjacych wobdźělnikow wjac hač „dobry dźeń“ a „božemje“ słyšeć, móžemy sami wobstarować – jako nowu normalitu we Łužicy. Marcel Brauman
