Puć njeje tajki wopačny
Jan Gólč
Wo porodźe powěsćow
Pod hesłom „Pórod powěsćow“ su wčera w Choćebuskim Serbskim domje nowu wustajeńcu wotewrili. Prěni raz předstaji Lubinska wuměłča Monika Schubert po přehladkach w Berlinje, Jenje a Lubinje nětko Choćebuskemu publikumej, kak su ju łužiske powěsće zakuzłali. Předsyda Braniborskeje rady za serbske naležnosće Torsten Mak přednjese wčera lawdaciju, spěwny poet Bernd Pittkunings wobrubi wječor hudźbnje. Hač do 17. februara je wustajeńca přistupna. Foto: Michael Helbig
Herbert Nowak na CD słyšomny
Wo knihach a kniharni (14.10.16)
Lětni dowolowy čas je nimo. Hač drje je sej tón abo tamny we wulkich prózdninach snano do Šwedskeje, do kraja Småland, wulećał. To je domizna Astrid Lindgren a jeje dźěćacych knihow. Wosebje za dźěći je to krasny wulět, wšako móža tam swět woneho „Michela z Lönneberga“ awtentisce dožiwić. Kajki idyliski to swět a kajki přećiwk, zaběraš-li so z wosobinu awtorki. Loni nazymu su wušli jeje wójnske dźeniki, nastate w lětach 1939 do 1945, a předleža nětko jako wjazane wudaće a jako słuchokniha. Sym so za słuchoknihu rozsudźiła, kotraž ma kaž ćišćana wersija titul „Čłowjestwo je rozum zhubiło“. Dźiwadźelnica Eva Mattes wjedźe słucharja ze swojim hłosom do swojorazneho kužoła a spožča tekstam, zboka wšeje poetiskosće a idylki, sylny wuraz.
Pytaja tež serbske šulerske kapały
Budyšin/Lipsk (SN/mwe). Lipšćanske towarstwo KulturLounge wuhotuje tež lětsa zaso hromadźe ze statnym ministerstwom za kultus wubědźowanje, hdźež pytaja najlěpše šulerske kapały Sakskeje. Wubědźowanje mjenuja „Band Clash – back to school“, kotrež je wotewrjene wšěm hudźbnym stilam. To rěka wot melodiskeho rocka k popej přez metal hač k punkej, crossoverej a hip hopej. Přizjewjenja su pod adresu www.band- clash.de hač do soboty, 15. oktobra, móžne. Na prašenje, hač su do toho tež serbske kapały z maćernorěčnymi tekstami zapřijate, jednaćel KulturLounge Pierre Eichner praji: „Na kóždy pad bychmy so přez nje wjeselili, słušeja dźě k Sakskej.“ Nimo toho, tak Eichner, měli skupiny z hač do dźewjeć hudźbnikami we wobłuku swojeho 20mjeńšinskeho programa ze swójskimi tekstami wustupić. Wšojedne, w kotrej rěči.
Našim čitarjam
Filmowanje wo Łužicy a za nju
Choćebuz/Berlin (SN/MiR). Na lětušim Filmowym festiwalu Choćebuz wotměje so 11. a 12. nowembra we wobłuku sekcije „Łužica“ dwudnjowa homaža na Berlinskeho filmowca Konrada Herrmanna. Pod hesłom „Poezija napřećiwka.“ W sekciji „Łužica“ předstaja produkcije łužiskich awtorow, filmy wo Łužicy kaž tež we Łužicy nawjerćane filmy.
Styki a tworjenje serbskich awtorow rozjimali
Katowice (DY/SN). W srjedźišću mjezynarodneje wědomostneje konferency, wotměwaceje so minjeny pjatk a sobotu w Šleskej bibliotece w Katowicach, stejachu tworjenje a skutkowanje serbskich spisowaćelow Jurja Brězana, Antona Nawki a Benedikta Dyrlicha kaž tež pólsko-serbsko-němske styki w zašłosći a přitomnosći. K tomu jimachu so w połhodźinskich přednoškach wjacori wědomostnicy a spisowaćeljo słowa. Tak předstaji prof. dr. Tadeusz Lewaszkiewicz z Poznanja staw slědźenja wo Jurju Brězanu, prof. dr. Piotr Pałys z Opola pak rozjima angažement a politiske mjezy najznaćišeho serbskeho spisowaćela při organizowanju brigadowanja Serbskeje młodźiny wot lěta 1946 do 1948 w Juhosłowjanskej. Přednošk prof. dr. Dietricha Šołty wo Jurja Brězanowym zhladowanju a skutkowanju w přewrótnej dobje do zjednoćenja Němskeje přečita dr. Monika Blidy z Katowic něhdźe 30 wobdźělnikam konferency.
Lessingowe myto Kurtej Drawertej
Drježdźany/Kamjenc (SN). Basnikar, dramatikar, powědar a esejist Kurt Drawert dóstanje z 13 000 eurami dotěrowane Lessingowe myto Swobodneho stata Sakska 2017. Spěchowanskej myće w hódnoće dohromady 11 000 eurow spožča Thomasej Freyerej a Anny Kaleri. To zdźěli sakski statny ministerij za wědomosć a wuměłstwo.
W swojich tekstach staji Kurt Drewer wěstosće do prašenja a rozeznawa njedowěrliwje wěrnosć a łžu. Wón warnuje před wopačnymi metaferami, kotrež wopačne mysle rodźa. Wón praša w rozwětlacym zmysle za zničenjom inidiwiduuma a za móžnym wobchowanjom toho rjaneho, a to z wulkej poetiskej mocu, kaž rěka we wopodstatnjenju jury. 1956 narodźeny Kurt Drawert wotrosće w Berlinje a Drježdźanach. Po wukubłanju na fachoweho dźěłaćerja za elektroniku a maturje studowaše na Lipšćanskim literarnym instituće. Wot lěta 1986 skutkuje jako swobodny spisowaćel. Myta chcedźa 21. januara we wobłuku 51. Kamjenskich Lessingowych dnjow přepodać.
