Athen (dpa/SN/K). Jónu wolóženje, jónu poćeženje: Z dźensnišim wotewrjenjom bankow po třoch njedźelach móža Grjekojo zaso wjace hač 60 eurow wšědnje wotzběhnyć, wob tydźeń wšak nic wjace hač 420 eurow. We wukraju smědźa woni tež zaso z kreditnej kartku płaćić. Brěmjo so jim z tym njemało poćeži, zo so nadhódnotowy dawk za cyrobizny z 13 hnydom na 23 procentow zwyši. To je jedne z bolostnych žadanjow mjezynarodnych pjenjezydawarjow. Zdobom nabudu płaćiwosće wšelake zwyšenja dawkow we wobłuku naprawow lutowanja a reformowanja.
Drježdźany/Waršawa (dpa/SN). Ćežke njewjedra ze sylnymi zliwkami su wčera w Sakskej wulke škody zawostajili. W Běłej Wodźe wobškodźi wichor třěchu hamtskeho sudnistwa. Třěšne cyhele wobškodźichu wjacore parkowace awta. Na Bjerwałdskim jězoru su so při wichoru wjacore płachtakowe čołmy powróćili. W zdźěla dramatiskej wuchowanskej akciji móžachu wšitkich potrjechenych njezranjenych z wody wućahnyć.
W susodnej Pólskej je wichor kónc tydźenja nimale 800 twarjenjow wobškodźił. Wohnjowa wobora dyrbješe 6 000 króć pomhać, kaž zdźělichu. 17 wosobow so zrani. W zapadopólskim wojewódstwje Lubuskie zemrě žona, jako štom na jeje awto padny.
Tajny přihot slěborneho kwasa je sobotu w mecklenburgsko-předpomorskim Runowje zasadźenje policije zawinił: Žona bě wokoło 23 hodź. dwě „podhladnej postawje“ na susodnej ležownosći wobkedźbowała. Tukajo na paduchow zawoła wona policiju. Při přepruwowanju so wukopa: „Paduchaj“ běštaj syn susoda a toho towarš. Wonaj chcyštaj składnostnje slěborneho kwasa dom ze slěbornej foliju wupyšić.
Wopica je prošerjam w jednym z indiskich templow njewočakowany pjenježny dar wobradźiła. Do toho bě wona móšeń žony spakosćiła. Na muri sedźo mjetaše wopica na to pjenjezy w hódnoće wjace hač 2 000 eurow mjez ludźi, kotřiž bankowki dźakownje zezběrachu. Wobsedźerka zamó jedno snadny dźěl swojich pjenjez zaso zhromadźić, kaž indiske nowiny rozprawjeja.
Njewjedro howriło
Choćebuz (dpa/SN/ch). W běhu jenož dweju hodźin dyrbjachu wohnjowi wobornicy sobotu popołdnju na juhu Braniborskeje na něhdźe 25 zasadźenjach spowróćane štomy a zwottorhane hałzy rumować, informuje rěčnik regionalneho běrowa Łužica w Choćebuzu. Nóc pak wosta měrna. Nichtó njebu zranjeny. Němska wjedrowa słužba bě za wokrjesaj Łobjo-Halštrow a Sprjewja-Nysa před njewjedrami warnowała. Na železniskej čarje Choćebuz–Lipsk dyrbješe blisko Schöneberga wosobowy ćah zastać, dokelž bě štom horni milinowód potorhnył.
Přirodoškitarjo zwrěšćili