Berlin (dpa/SN). Šěsć tydźenjow do wólbow zwjazkoweho sejma su politiske strony horcu fazu wólbneho boja za­hajili. Tak je SPD zwjazkoweho kanclera Olafa Scholza na zjězdźe w Berlinje z jenož pjeć přećiwnymi hłosami oficialnje za načolneho kandidata wuzwoliła. Scholz kritizowaše předsydu CDU Friedricha Merza a jemu wumjetowaše, zo nima kmane koncepty za wuwiće kraja.

Křesćanscy demokraća su na klawsurnym posedźenju předsydstwa centralne temy wólbneho boja wobzamknyli. Merz při tym zwurazni, zo je w opoziciji skutkowaca CDU zwólniwa, knježerstwowu zamołwitosć přewzać.

Na zjězdźe BSW w Bonnje žadachu sej kónc wojerskeje pomocy za Ukrainu.

Waršawa (dpa/SN). Zakitowanski mi­nister Boris Pistorius (SPD) je dźensa ze swojimi kolegami-ministrami z Pólskeje, Francoskeje, Italskeje a Wulkeje Brita­niskeje wo dalšim postupowanju nastupajo europsku zakitowansku politiku wuradźował. Zetkawanski format tutych pjeć ministrow běchu po wólbnym dobyću Donalda Trumpa w USA zarjadowali.

Hłowny zaměr je, europsku wěstotu a zakitowansku hotowosć skrućić. Trump bě ze swojimi wuprajenjemi stajnje zaso dwěle zbudźił, hač budu USA tež přichodnje spušćomny partner. Tež wo dalšej ­pomocy na dobro Ukrainy chcychu rěčeć. Ze zajimom wočakowachu, hač so wobdźělnicy tež k žadanjam Trumpa nastupajo Grönlandsku a Kanadu wupraja. Wobě stej zwjazkarce w NATO.

Riesa (dpa/SN). Z wobzamknjenjemi k swójbnej politice je AfD swój zwjazkowy zjězd w Riesy zakónčiła. Delegaća roz­sudźichu, zo do wólbneho programa zapisaja, zo je „swójba, wobstejaca z nana, maćerje a dźěći, zarodk towaršnosće“. W naćisku programa dotal steješe, zo je „swójba zarodk towaršnosće“.

Přetorhnjenje samodruhosće w prěnich dwanaće tydźenjach ma bjez chłostanja wostać, je-li so žona do toho poradźować dała. Tam maja so jej wobrazy wuwiwaceho so dźěsća pokazać.

Na zjězdźe w Riesy su delegaća cyłkowny program za wólby zwjazkoweho sejma 23. februara wobzamknyli. Dale rozsudźichu, zo „Młodu alternatiwu“, ­dorostowu organizaciju AfD rozpušća a zdobom nowu młodźinsku organiza­ciju załoža, kotraž je krućišo z nawodnistwom strony zwjazana. Wuprajenje předsydki Alice Weidel, zo chcedźa wšitke milinowe wětrniki w Němskej zwottorhać, zbudźi wjele diskusijow. Kaž strona zdźěli je wona pječa jenož wětrniki měniła, za kotrež dyrbja lěsy pušćeć.

Po wudyrjenju pochromy wuradźuja zamołwići wo móžnych naprawach

Podstupim (dpa/SN). Po wudyrjenju ­pochromy (Maul- und Klauenseuche) pola wodowych buwołow (Wasserbüffel) w Braniborskej su zamołwići dźensa wo dalšim postupowanju přećiwo natykliwej chorosći wuradźowali. Zo je so mrětwa na druhe zwěrjata wupřestrěła, to ­minjeny kónc tydźenja njejsu zwěsćić móhli. Tež zwjazkowy minister za ra­tarstwo Cem Özdemir (Zeleni) je dźensa zastupnikow branše do ministerstwa zwołał, zo by z nimi wuradźował.

Wudyrjenje mrětwy, kotraž je w Němskej jako MKS znata, móhło eksport němskich ratarskich wudźěłkow haćić. Zwjazkowe ratarske ministerstwo z toho wuchadźa, zo budźe lědma hišće móžno mloko, mlokowe wudźěłki, mjaso a mjasowe wudźěłki do krajow zwonka EU eksportować, budźe-li mrětwa jako oficialny pad wobkrućena.

Někotre kraje su hižo konsekwency z njewěsteje situacije sćahnyli. Tak Južna Koreja aktualnje swinjace mjaso z Němskeje njeimportuje. Nižozemska je zakazała ćelata po kraju transportować.