Najebać wulku zahoritosć za Dubaisku šokolodu jewja so prěnje warnowace hłosy. W jednotliwych probach w laborach su zanjerodźenja, barby, alergeny a cuzy tuk namakali, strowotniske ministerstwo Badensko-Württembergskeje zdźěla. Ličba zanjerodźenych probow je drje snadna, wuslědki pak zamołwitych starosćeja. Nětko chcedźa Dubaisku šokolodu po wšěm kraju pruwować.

Gigantiski swětoznaty wohnjostroj w awstralskim Sydneyju je lětsa wohroženy. Přičina je hrožacy stawk železnicarjow silwester. Tež lětsa wočakuja zaso něhdźe milion wopytowarjow w po­brjóžnej metropoli, kotřiž chcedźa spektakl před kulisu sławneje Harbour Bridge a opery dožiwić. Ludźo přijědu z wulkeho dźěla z ćahom. Hrožaceho wobchadneho chaosa dla so zamołwići chutnje z myslu noša, wohnjostroj lětsa wotprajić.

Sakski krajny sejm ministrow noweho krajneho knježerstwa spřisahał

Drježdźany (dpa/SN). Po znowawuzwolenju ministerskeho prezidenta Michaela Kretschmera (CDU) su dźensa dopołdnja čłonow noweho knježerstwa w krajnym sejmje spřisahali. Do toho bě Kretschmer nowym ministram w statnej kencliji ­wopismo powołanja přepodał. Bjezpo­srědnje po tym zeńdźe so nowy kabinet na prěnje posedźenje. Medije běchu ­spekulowali, kajke zasadne personalne změny Kretschmer přesadźi. Zwoprědka bě jasne, zo dotalny hospodarski mi­nister Martin Dulig (SPD) zastojnstwo přisadźi.

Po spřisahanju knježerstwa je krajny sejm ze swojim dźěłom pokročował. W aktualnej hodźinje wobjednawachu zaručenje socialnych poskitkow za dźěći a młodostnych, namóc přećiwo žonam kaž tež zapłaćomne podruže. Po tym ­zasadźichu na próstwu mjeńšinoweje koalicije CDU a SPD enquetowu komisiju za předźěłanje koronapandemije. Přepytowanski wuběrk za tutu temu bě krajny sejm hižo zasadźił.

Drježdźany (SN). Tež Sakska ma nowu radu za serbske naležnosće: Wčera wolachu zapósłancy wšěch kandidatow, kotrychž je Domowina na zakładźe wothłosowanja w zwjazkowym předsydstwje namjetowała. Tak přisłušeja w nowej wólbnej periodźe Diana Šołćina, Julian Nyča, Dawid Statnik a Jan Ryćer poradźowacemu gremijej. Tež namjet Zwjazka sakskich městow a gmejnow su wobkrućili. Stefan Anders, předsyda zarjadniskeho zwjazka „Při Klóšterskej wodźe“, zastupuje serbske komuny. Smy z.t., spěchowanske towarstwo za Serbski sejm, njemóžeše so ze swojim namjetom dr. Tomašom Wornarjom, kiž je z čłonom Serbskeho sejma, we wothłosowanju přesadźić. Kulturna ministerka Barbara Klepsch (CDU) gratulowaše wolenym a mjenowaše jich „wažnych akterow zastupnistwa serbskich zajimow“. Parlamentariska jednaćelka SPD Laura Stellbrink praješe: „Serbska rěč ma widźomna być – tež zwonka Łužicy.“ Ze swojej zdźělenku, horjeka serbski, deleka němski tekst, wona tomu dopomha.

Damaskus (dpa/SN). Ruska je po powalenju swojeho zwjazkarja Bashara al-Assada swój powětrowy škit ze wšelakich dźělow Syriskeje cofnyła. Tež tankowe jednotki su swoje zepěranišća wopušćili. Pječa pohibuja so ruske jednotki do směra na Libysku. Tam knježi po powalenju mócnarja Muammara al-Gaddafija w oktobru 2011 chaos a wobydlerska wójna. Zapadne kraje wobkedźbuja minjeny čas dokładnje, kak Ruska na nowe poměry w Syriskej reaguje.

Trump žada sej blokadu

Washington (dpa/SN). Přichodny prezident USA Donald Trump zadźěwa krótko do postajeneho termina schwalenju přechodneho etata. Tak hrozy dospołna blokada dźěła knježerstwa. Trump namołwja wšěch republikanskich zapósłancow, z demokratami hižo dojednany etat wotpokazać. Elon Musk, kotryž změje w knježerstwje Trumpa wažnu funkciju, republikanow tohorunja k tomu namołwja. By-li showdown wudyrił, móhł Trump prezidentej Bidenej winu připisać.

20 lět jastwa za wumocowarja