Lipsk (dpa/SN). Hodowny čas je mnohim ludźom čas wjesołeje zhromadnosće – někotrym pak tež wosebje struchłeje samotnosće. Štóž je hody w tutej nuzy, móže so w Drježdźanach a Lipsku na wjacore kontaktne adresy wobroćić. Tež internetnje poskićuja móžnosće zetkawanja mjez ludźimi. Tak je Lipšćanska dwórnišćowa misija za čas hodownych swjatych dnjow wšědnje wot 9 hač do 13 hodź. přistupna. Tak přeprošuja tam k přebywanju z čajom a poprjancami. Poskitk měri so wosebje na bjezdomnych sobuwobydlerjow.

W Drježdźanach zarjaduje Johannstadtski kwartěr jutře, 12. decembra, ­zetkanje potrjechenych, zo bychu styki nawjazali. Tute nahromadźene kontakty móhli hody za zetkawanja wužić. Dale budu wjacore cyrkwje patoržicu swoje durje za potrěbnych wotewrěć.

Telefonaty z wulkim hłosom, harowaca hudźba a čuwy rubjace wideja z wótřerěčaka šmóratka – přećiwo tomu Berlinske wobchadne zawody nětko postupuja. Z wosebitymi wozjewjenjemi w busach wo to proša, so telefonatow wzdać a wideja njewothrawać. Hižo wot nalěća w busach za to wabja, na sobujěducych wjace kedźbnosće brać, so kruće dźeržeć a hladać, hač snadź něchtó druhi městno za sedźenje nuznišo njetrjeba.

Hrózbna namakanka we Wienje policiju a zjawnosć zaběra: Při twarskich dźěłach běchu w plastowym měše zapakowane ćěło něhdźe 30lětneho muža namakali, kotrež hižo 25 lět w pincy domu ležeše. Slědy na to pokazuja, zo jedna so wo mordarstwo. Kriminalisća nadźijeja so pomocy zjawnosće: Muž w joggingowym wobleku bě 1,70 metrow wulki a strowy.

Dešno (SN/mb). Wjace hač 1 300 ludźi w Braniborskej je so do lisćiny wolerjow za 7. Radu za naležnosće Serbow zapisać dało. To je nam dźensa rano předsydka wólbneho wuběrka Margit Neugebauer na naprašowanje zdźěliła. Kaž z oficielneho wozjewjenja gremija wuchadźa, je so doba za zapisanje zašłu njedźelu skónčiła. Nětko móža so registrowani wolerjo hač do 15. decembra, 12 hodź., na wólbach wobdźělić. Štóž chce hač do poslednjeje minuty dočakać, dyrbi sam swoje wólbne podłožki do póštoweho kašćika tyknyć, w Dešnje na „wohnjowym dworje Tylcyc“, Hłowna dróha 44.

„Wužijće šansu, tych wolić, kotřiž budu w přichodźe naše zajimy w Podstupimje zastupować“, piše Neugebauer w zdźělence. Zdobom skedźbnja na zjawne wuličenje hłosow 16. decembra wot 10 hodź. w rumnosćach wólbneho wuběrka w Dešnje. Samsny dźeń chce wólbny wuběrk wuslědk oficielnje wozjewić.

Wo pjeć městnach w serbskej radźe je so dźesać kandidatow požadało. W Braniborskej móža Serbja zastupjerjow swojich zajimow při krajnym sejmje sami z listowymi wólbami wolić. W Sakskej ma tónle nadawk dotal zwjazkowe předsydstwo Domowiny na starosći.