Za mjezsobnu podpěru wabił
Kamjenica/Drježdźany (dpa/SN). W swojej wčerawšej nowolětnej narěči je so ministerski prezident Sakskeje Michael Kretschmer (CDU) za wjace wotewrjenosće a zhromadnosće w našej towaršnosći wuprajił. „Pomhajmy sej mjez sobu, w swójbje, susodstwje, mjez kolegami, w sportowym towarstwje“, podšmórny politikar w Kamjenicy, lětušej Europskej kulturnej stolicy. „Chcemy přećelnu, so błyšćacu a optimistisku Saksku“, wón praji. Generacija měrliweje rewolucije w lěće 1989 je dźensniša generacija staršich. „Tući móža tehdyši duch změny, jich wotewrjenosć a jich zwólniwosć so gratu přimać na nowu generaciju dale dawać.“
Kretschmer wuzběhny wuznam industrije za město Kamjenicu a cyłu Saksku, skedźbni pak tež na aktualne wužadanja němskeho hospodarstwa a z tym zwisowace financne wobmjezowanja Swobodneho stata w nowym lěće. „Hospodarsku situaciju pak móžemy sami pozitiwnje wobwliwować“, wón zwurazni. Statne knježerstwo chce wšitko činić, zo by hospodarski trend do praweho směra zahibnyło.
Nowinki we wšěch wobłukach
Wjac pjenjez za někotrych – wyše kóšty za druhich
Budyšin (dpa/SN/VaŽ). Wuměnkarjo smědźa so nad wjac pjenjezami wjeselić, mjeztym zo budźe porto za listy dróši. Lětsa so tójšto prawidłow změni, štož změje čujomne wuskutki na dochody mnohich ludźi. Lěto 2025 přinjese najprjedy mnoho lěpšinow: Za dochody hač do wysokosće 12 096 eurow njetrjebaja so dawki płaćić. Bjezdawkowa suma dźěći pak je 9 600 eurow. Minimalna mzda zwyši so wo 41 centow na 12,82 eurow. Tež wukubłacy w prěnim wukubłanskim lěće móža so wjeselić, woni zasłuža nětko měsačnje znajmjeńša 649 eurow. 18 eurow wjace hač dotal, mjenujcy 556 eurow smědźa ludźo z minijobom měsačnje zasłužeć. Wot julija móža seniorojo ze zwyšenjom rentow wo něhdźe 3,5 procentow ličić. Dźěćacy pjenjez zwyši so wo 5 eurow na 255 eurow a přiražka za dźěći w swójbach z niskimi dochodami na 25 eurow. Wot 1. meje smědźa mandźelscy zhromadne dwójne mjeno z wjazawku abo bjez njeje wjesć. Hladanski personal dóstanje wot julija wyšu minimalnu mzdu. Online-shopy dyrbja wot junija za wšěch ludźi, tež za kupcow z handicapami, bjez barjerow być.
A lětnje strowi bobak
Ludźo mjenje telewizy hladali
Berlin (dpa/SN). W Němskej su ludźo 2024 znowa něšto mjenje klasiskeje linearneje telewizy hladali. Tak wučinješe přerězny čas hladanja po informacijach Dźěłoweho zjednoćenstwa za telewizijne slědźenje (AGF) mjez ludźimi wot třoch lět přerěznje 171 mjeńšin wšědnje – jědnaće minutow mjenje hač lěta 2023.
171 mjeńšin wšědnje, to stej dwě hodźinje a 51 mjeńšin. Młodźi ludźo (14 do 49 lět) hladaja wšědnje 79 mjeńšin, hodźinu a 19 mjeńšin. To je wo wjele mjenje hač přerězk. Wosebje ludźo nad 50 lětami so wo to postaraja, zo je přerězny čas hladanja wo wjele wyši.
Před štyrjomi lětami, 2020, słušeše klasiska telewiza k dobyćerjam prěnjeho lěta koronapandemije. Přerězna doba telewizijneho časa rozrosće tehdy wot 210 mjeńšin 2019 na 220 minutow. 2021 spadny doba na 213 mjeńšin, w lěće 2022 potom na 195 a 2023 na jenož hišće 182. Dotalny rekord wužiwanje telewizy minjenych lětdźesatkow docpěchu lěta 2011 z 225 mjeńšinami. Hłowna přičina woteběraceho konsuma klasiskeje telewizy je po měnjenju fachowcow raznje přiběracy wuznam interneta.
Znowa wjeselo na lodźe w Bórkowach
To a tamne (02.01.25)
W Grjekskej a na Cypriskej su so kónc lěta „ćiche wohnjostroje“ zasadźili. Moderna pyrotechnika skići jónkrótne rakety ze wšěmi woblubowanymi efektami, ale bjez wobćežowanja hary tradicionalnych wohnjostrojow. W Athenje su nimo toho tež truty efekty na njebjo molowali. Kaž fachowcy zdźěla, bě zasadźena pyrotechnika wobswětej přichileniša hač dotal wužiwane wohnjostroje.
Přez eksploziju Cybertrucka předewzaća Tesla před hotelom Donalda Trumpa w Las Vegasu je jedyn čłowjek žiwjenje zhubił. Wjacore wosoby so zranichu. Eksplozija sta so srjedu rano, jako wodźer z awtom před hotelom pozasta a so tute naraz paleše. Zarjady přepytuja podhlada terora dla a pruwuja, hač eksistuje zwisk k nadpadej w měsće New Orleans. Hotel bu po podawku ewakuěrowany. Jězdźidło so dospołnje wupali.
Pomjezne kontrole wostanu
Berlin (dpa/SN). Zwjazkowa nutřkowna ministerka Nancy Faeser (SPD) chce pomjezne kontrole tež po měrcu 2025 dale wjesć. „Wobšěrne naprawy k wobmjezowanju njeregularneje migracije a w boju přećiwo kriminelnym pašowarjam su skutkowne“, rjekny Faeser Augsburgskim nowinarjam. Kontrole su trěbne, doniž njejsu wonkowne mjezy EU widźomnje zesylnjene. W boju přećiwo ilegalnej migraciji bě Němska w septembru pomjezne kontrole wo šěsć měsacow podlěšiła.
Tež 2026 wyše přinoški
Berlin (dpa/SN). Zakonske chorobne kasy po posudku swojeho třěšneho zwjazka tež 2026 přinoški dale zwyša. Wona je optimistiska, zo zwyšene přinoški chorobnych kasow za lěto 2025 dosahaja, rjekny nawodnica předsydstwa zwjazka chorobnych kasow GKV Doris Pfeiffer nowinarjam. Hižo dźensa pak je jasne, zo je tež 2026 dalše zwyšenje přinoškow trěbne. Jeničce za reformu chorownjow, kotruž wšak maja kasy sobu financować, je tole trěbne, wona rjekny.
Milanović z wulkim předskokom
