Kónčna debata wo etaće 2024
Hospodarstwo dale bjez rozmacha
Wiesbaden (dpa/SN). Hospodarstwo Němskeje dźe bjez widźomneho rozmacha do noweho lěta. Nutřkokrajny bruttoprodukt je štwórty kwartal 2023 porno třećemu wo 0,3 procenty woteběrał, Zwjazkowy statistiki zarjad dźensa na zakładźe dotalnych datow zdźěla, wobkrućejo prěnje trochowanja. Fachowcy hospodarstwa wočakuja tež 2024 wobćežne hospodarske lěto. Loni bě najwjetše hospodarstwo Europy do snadneje recesije přišło. Přičiny słabeho wuwića widźa fachowcy předewšěm w lutowanskich naprawach zwjazkoweho knježerstwa, ale tež w stawkach lokomotiwnikow a w přetorhnjenych dodawanskich rjećazach jako sćěh wojerskeho konflikta w Čerwjenym morju. Tuž wočakuja, zo so hospodarstwo tež prěni kwartal 2024 wosłabi.
Nadźija za nowe lěto spožča wočakowany lóšt ludźi na konsum. Přiběrace mzdy a runočasnje woteběraca inflacija móhli naladu mjez kupcami zaso widźomnje polěpšić. Tuchwilne połoženje je inflacije, krizow a wójnow na swěće dla chětro zaćěmnjene, fachowcy zwěsća.
Pruwuja wumjetowanja
Pomocny skutk UNO zhromadneho dźěła z teroristami podhladny
Tel Aviv/Gaza (dpa/SN). Skandal pozdatneho wobdźělenja někotrych sobudźěłaćerjow pomocneho skutka UNO za Palestinjanow na masakru islamistiskeje Hamas w Israelu dla so dale rozšěrja. Něhdźe dźesać procentow wšěch 12 000 w Gazaskim pasmje přistajenych sobudźěłaćerjow pomocneho skutka UNRWA ma zwiski k Hamas abo k islamistiskemu Dshihadej, rozprawja nowina Wall Street Journal w USA, powołujo so na dopóznaće israelskeje tajneje słužby. Sobudźěłaćerjo su so na wojerskich abo politiskich akcijach wobdźělili.
Rjemjesło twori zakład
Protest rjemjeslnikow w Choćebuzu
CDU/CSU: Ciwilny škit njezanjechać
Berlin (dpa/SN). Politikarjo CDU/CSU warnuja, ciwilny škit zanjechać a wotpowědne planowanja jeničce zwjazkowej woborje přewostajić. „Derje, zo zwjazkowa wobora plany pohonjuje, štó w padźe napjatosćow a zakitowanja što čini“, rjekny zastupowaca frakciska předsydka frakcije CDU/CSU w zwjazkowym sejmje Andrea Lindholz powěsćerni dpa. Konkretny „operaciski plan“ pak njeje jenož za wojerske zakitowanje trěbny, ale tež za škit ciwilistow, wona rjekny.
Minjeny štwórtk běchu w Berlinje „Operaciski plan Němskeje“ předstajili, kiž bě zwjazkowa wobora zestajała. Tón předwidźi lěpše splećenje wěstotnych zarjadnišćow, organizacijow za škit ludźi před katastrofami a industrijnych předewzaćow. Za katastrofowy škit su w Němskej zwjazkowe kraje zamołwite. Wo ciwilny škit – potajkim škit ludnosće w padźe wójny – dyrbi so Zwjazk starać.
Zwjazkowa nutřkowna ministerka Nancy Faeser (SPD) ciwilny škit zanjecha, Lindholz kritizuje. Wona je wot unije nastorčeny plan na dobro škita ludźi zběhnyła a spušća so jenož hišće na pomocne organizacije, wona rjekny.
To a tamne (30.01.24)
Ćeknjena wopica je w šotiskich horach wulke rozpjeršenje zawinowała. Makaka bě minjeny kónc tydźenja ze zwěrjenca twochnył a w dźewjeć kilometrow zdalenej wsy wobydlerjam napadnył. Mjeztym je „mustwo nazhonitych hladarjow zwěrjenca“ wjes přeslědźiło. Wopica njeje wobydlerjam žane wohroženje, najebać to ludźom radźa, so wot njeje zdalować. Makaka je mjeztym nawuknył, zo namaka w ptačich chěžkach dosć picy.
Z mobilnym telefonom za woknom je dźewjećlětny hólc we Verdenskim wokrjesu pola Bremena zasadźenje policije zawinował. Na displayju steješe „Pomhajće mi!“ Na to zawoła nimoduca žona policiju. Zastojnikam hólc rozkładźe, zo chcyše scenu napodobnić, kiž bě w kinowym filmje widźał a „kiž měješe za wosebje lóštnu“. Policisća dźewjećlětnemu konsekwency tajkeje hry wuwědomichu.
Přesćěhanje přiběra
Kelkheim (B/SN). Rozprawa pomocneje organizacije Open Doors dokumentuje, zo su lěta 2023 po wšěm swěće 365 milionow křesćanow přesćěhali, tež křesćanske mjeńšiny we wjace hač 70 krajach. Cyłkownje bu 4 998 křesćanow morjenych, z toho w Nigeriji 4 118. Sćěhuja kónčiny w Sewjernej Koreji, Somaliji, Libyskej a Eritreji.
Krućiše rjadowanja
Vatikan (B/SN). Bamž Franciskus je postupowanje w pjenježnych a administratiwnych naležnosćach kurije přez přidatnu kontrolu swojeho hospodarskeho sekretariata z dwěmaj nowymaj postajenjomaj krućišo rjadował. Při přizwolenju zjawnych nadawkow maja so přidatna kontrola za transparencu, runoprawosć poskićerjow a spěchowanje wubědźowanja zaručić. Bamž chce tak wjace dynamiki, fleksibelnosće a eficiency docpěć.
Róla katolskeje cyrkwje
Snadny zajim za e-mobilitu
Drježdźany (dpa/SN). W Sakskej je mnoho wodźerjam jězdźidłow nakup awta, kotrež so dospołnje přez bateriju ćěri, přenjewěsty.
Po wuprajenju centralneho zwjazka Němskeho přemysła za awta přizjewi so loni 2,45 milionow jězdźidłow. Wot tutych bě wjace hač 254 000 ryzy elektriskich. W Sakskej bě to wot cyłkownje 89 000 nowych awtow 11 900 ryzy přez bateriju ćěrjenych. Běše to přiwšěm 1 300 wjace hač hišće w lěće 2022.
Dla jasnje wyšeje płaćizny za tute awta porno z bencinom a dieselom ćěrjenym je zajim skerje snadny. Tež šmórnjenje tak mjenowaneho wobswětoweho bonusa srjedź decembra zašłeho lěta njeje k powyšenju předawanskich ličbow přinošowało. Wodźerjo boja so tež móžnych wysokich porjedźenskich kóštow abo přespěšnje spadowaceje hódnoty za móžne dalepředawanje.
Awtotwarcy kaž VW, Audi, Tesla abo Mercedes přewzachu statne přiražki abo přewzaja wěsty podźěl płaćizny při nakupje ryzy elektriskich jězdźidłow. Dokładne ličby namakaće online abo po direktnym naprašowanju.
Kandidat AfD tola podležał
Schleiz (dpa/SN). Najebać jasny předskok w prěnim wólbnym kole je AfD wólby krajneho rady we wuchododurinskim wokrjesu Solawa-Orla w rozsudnym kole přěhrała. Kandidat CDU Christian Herrgott je so z 52,4 procentami hłosow přesadźił. Kandidat AfD Uwe Thrum dósta 47,6 procentow. AfD bě so nadźijała, zo Thrum dalši wokrjes za stronu zdobudźe. W Sonnebergskim wokrjesu je Robert Sesselmann (AfD) hižo krajny rada.
Wólby bjez dobyćerja
Helsinki (dpa/SN). Nowy prezident Finskeje rěka pak Alexander Stubb abo Pekka Haavisto. Bywši konserwatiwny ministerski prezident a něhdyši wonkowny minister čłonskeho kraja EU a NATO žněještaj w prěnim kole prezidentskich wólbow Finskeje najwjace hłosow. Cyłkownje dźewjeć kandidatow bě k wólbam nastupiło. Rozsudne koło wotměje so 11. februara.
Sonda na měsačku zaso dźěła
