Merz: Němska na dobrym puću
Berlin (dpa/SN). Zwjazkowy kancler Friedrich Merz je sej wěsty, zo je hospodarstwo Němskeje na dobrym puću a zo tuchwilnu krizu přewiny. Němska je zaso atraktiwna městnosć za inwesticije, rjekny předsyda CDU wčera do zahajenja klawsury kabineta w Berlinje. To pokazuja mnohe inwesticiske přilubjenja předewzaćelskeje iniciatiwy „Made for Germany“. Zawody chcedźa hač do lěta 2028 něhdźe 735 miliardow eurow w Němskej inwestować. Njejasne při wšěm je, kelko srědkow su woprawdźe nowe inwesticije a kajke projekty hižo dlěje planuja.
„Koncentrujemy so na to, zo so němske hospodarstwo zaso zhraba a rozrosće. Němska dyrbi za inwestorow zaso atraktiwna być. Sylnjenje hospodarstwa, kmanosć wubědźowanja, wottwar běrokratije a socialne reformy su ćežišća, na kotrychž ma knježerstwo přichodnje dźěłać. Statne wudawki chcedźa pruwować.
Knježerstwo chce z 80 projektami běrokratiju wottwarić a z tym 16 miliardow eurow zalutować.
Brunčenje a juskanje
Sedźo we wosobowym awće so hustohdy hóršiš, hdyž dołhi rynk motorskich přesćehnješ. Wšako je dołha kolona zwjetša tež pomału po puću. Dohladaja-li pak so šoferojo awtow sobujěducych na motorskich, to so njemało dźiwaja. Přetož na sociusu abo w pódlanskim wozu brunčakow sedźa dźěći a młodostni. Z wočinjenym woknom, jich juskanje słyšiš. Mali a młodźi husto tež nimo jěducym kiwaja. Tak so trochu zmoršćene čoło spěšnje zhubi. Za to pak je w mjezwoču posměwk widźeć. Abo njebyšće tež wy rady w tutej kolonje sobu jěli? Kajka to rjana tradicija, kotruž bikerojo z bliska a daloka, ale tež tójšto Serbja, wuhotuja.
Za chowancow dźěsćownje we Wuježku a Marije Marćineho domu w klóštrje Marijina hwězda w Pančicach-Kukowje je to kóždolětny wjeršk. Přewšo drohotny to dar bikerow, policije a socialnych zarjadnišćow tym, kotrychž swět je husto wobmjezowany.
Milenka Rječcyna
Čěscy šulerjo w Serbskim muzeju
Elektroniska akta nětko winowatosć
To a tamne (01.10.25)
Wo wodaće prosył je Mnichowski wyši měšćanosta Dieter Reiter wopytowarjow Oktoberskeho swjedźenja, kotřiž dožiwjachu minjenu sobotu wuskutki přepjelnjeneho swjedźenišća. Syły ludźi dla běchu mjez druhim swójby z dźěćimi panisce reagowali, dokelž čujachu so wohroženi. „Tole njesmě so stać“, rjekny politikar SPD w internetnym poselstwje. Dźensa dopołdnja bě swjedźeń hroženja z bombu dla znowa zawrjeny.
Betonowu platu a zdónk na awtodróhu mjetałoj staj mužej z Durinskeje. Nětko je jeju statne rěčnistwo w Lüneburgu wobskoržiło. Jimaj wumjetuje pospyt mordarstwa. Wobaj běštaj wot kónca meje hač do srjedź junija we wjacorych zwjazkowych krajach strašne objekty na awtodróhu mjetałoj. Na zbožo njeje so nichtó zranił. Zawinowałoj pak staj přiwšěm wěcne škody a snadne zranjenja.
Chinski spion dyrbi do jastwa
Drježdźany (dpa/SN). Bywši sobudźěłaćer Drježdźanskeho zapósłanca AfD w zwjazkowym sejmje Maximiliana Kraha, Jian G., dyrbi spionaže dla štyri lěta a dźewjeć měsacow do jastwa. Drježdźanske wyše krajne sudnistwo je dźensa dopokazało, zo je Jian G. w nadawku chinskeje tajneje słužby zaměrnje dowěrliwe dokumenty zapósłanca zběrał a Chinje dale dawał. Nimo toho je chinskich disidentow w Němskej wobčušlił.
Namóc mjeztym wšědny zjaw
Berlin (dpa/SN). Němski dźěłarniski zwjazk DGB skorži přiběraceje namocy přećiwo sobudźěłaćerjam zjawneje słužby dla. Ta je mjeztym dźěl wšědneho dnja dźěłaćerjow, rjekny DGB na konferency wo problemach sobudźěłaćerjow zjawneje słužby w Berlinje. Nowe naprašowanje DGB pokazuje rozměr digitalnych ranjenjow, wumjetowanjow a hroženjow. Tak je 13 procentow přistajenych w swojim dźěle hižo raz pod tak mjenowanej digitalnej namocy ćerpjeł.
Wiki drogow njezměnjene
Na sewjeru Vietnama je tropiski tajfun „Bualoi“ ze sylnymi ...
YouTube płaći Trumpej pjenjezy
Šwikaja znowa brojenje dawkow
Knježerstwo skruća zhromadnosć
Berlin (dpa/SN). Nimale pjeć měsacow po swojim spřisahanju je so zwjazkowe knježerstwo CDU/CSU a SPD dźensa na swoje prěnje klawsurne posedźenje zešło. Po wobćežnym spočatku dźěła chcedźa nětko wosebje swoju zhromadnosć skrućić. Na dwaj dnjej trajacym zetkanju we wili Borsig nad Tegelskim jězorom na sewjerozapadźe Berlina wuradźuja wosebje wo wottwarje běrokratije a wo nowych impulsach za wožiwjenje hospodarstwa Němskeje. „Předewzaća su w jara chutnym połoženju. Tohodla dyrbimy spěšnje rozsudźić“, rjekny zwjazkowy kancler Friedrich Merz (CDU) do zahajenja zetkanja. Jutře wobzamknu „agendu modernizowanja za stat a zarjadnistwa“. Z njej chcedźa kóšty běrokratije wo 25 procentow znižić a po tutym puću 16 miliardow eurow wuzbytkować. Mjez druhim ličbu přistajenych stata wo wosom procentow zniža.
W hóstnym domje wonkowneho ministerstwa je njedawno francoski prezident Emmanuel Macron přenocował.
