Wěšće wy, što su „słowjanske hody“ a „słowjanske jutry“, pěstujeće „swjedźeń zawróta słónca z chodojtypalenjom“ jako słowjanski nałožk? Jeli nic, móžeće do słowjanskeho hrodźišća putnikować, hdźež Dawid Chmelík nowe kulturne žiwjenje Słowjanow w Němskej wozrodźa. To w interviewje z regionalnej nowinu wobkrući. Kak dołho budźe jeho putniske městno wobstać, pak jasne njeje. Dopominaće so na jeho „europski projekt Lusatia Glow“, nowinske konferency ze Serbskim sejmom, wustup z britiskej prawniskej kencliju we wojowanju za „indigeny lud“ Serbow? Haj wšak, tež ja sym rady z tutym zajimawym čłowjekom bjesadował, tola nažel njejsmy jako nowinarjo konkretnu substancu za gigantiskimi wizijemi spóznawali, kotrež je ze Serbskim sejmom wupjekł, doniž ­njejstaj so dźěliłoj. Nětko so najskerje dalši pucher puknje, štož je drje škoda. Přiwšěm je wuraz wěrnosće, zo nam nowi „Jězu­sojo“ njepomhaja, kotřiž porno njemu raj na zemi lubja. Marcel Brauman

Zhorjelc (AK/SN). Gerharta Hauptmannowe dźiwadło w Zhorjelcu dospołnje ponowja. Tole su radźićeljo Zhorjelskeho wokrjesneho sejmika minjeny tydźeń wobzamknyli. Nimo toho ponowja centrum za dźiwadłowu pedagogiku Apollo w Zhorjelcu. Stare nakładne dwórnišćo słuži dźiwadłu nachwilnje jako přechodne hrajnišćo.

Dźiwadło dyrbja po wjele lětach dźěła modernizować, krajny rada dr. Stephan Meyer (CDU) rozłoži. Mjez druhim trjebaja modernu techniku, wohnjoškit a bjezbarjernosć. Diskusija wo ponowjenju saha hač do časa do katastrofy zapławjenja wróćo, Meyer rozłoži. W nowembru 2022 bě defekt wěstotneho systema awtomatiski hašenski system aktiwizował. Na to wukidny so 18 000 litrow wody na jewišćowu techniku, swětłomjetaki, zwukowu připrawu a elektriku. Wšo to dyrbja nětko ponowić. Historisku techniku za zběhanje zawěška z lěta 1925 dyrbja tohorunja modernizować – wšitko pod krutym dohladom škitarjow pomnika.

„Apollo“ – wažne městno dźěćaceho a młodźinskeho dźěła, je tohorunja dodźeržane. Tam ponowja jewišćowu techniku. Nimo toho zhotowja probowej rumnosći a bydlenje za hosći.

Ćopły nazymski wětr na Dnju jednoty Němskeje su minjeny pjatk mnozy wužili, zo bychu zmije pušćeli. Na kromje noweho Liškowskeho jězora sewjernje Choćebuza zhromadźichu so wulcy a mali fanojo zmijow. Hač wulke profesionalne abo samo paslene nastroje, wšitko bě pódla. Zo bě wětřik na kóncu słabši hač wočakowany, ­ludźi njemyleše. Najebać to so zajimawe zmijowe konstrukcije w powětře hibachu. Na zarjadowanje přeprosyli běchu město Choćebuz, sportowe towarstwo Liškowskeho jězora a Choćebuska bydlenjetwarska towaršnosć. Foto: Michael Helbig

Zaměnjenej ćěšenkaj staj swojeju woprawdźiteju staršeju namakałoj – po nimale 35 lětach. Mjeztym dorosćenej žonje stej so zeznałoj a rodźićelow zetkałoj. Holčce stej so 1990 w chorowni w awstriskim Grazu dočasnje narodźiłoj a dyrbje­štej najprjedy raz w tepjenym kašćiku přebywać. Tam su jej přistajeni chorownje ­zaměnili. Při darjenju kreje so pola jedneje z holcow wukopa, zo bydli pola wopačneju staršeju. Tamna žona zhoni samodruhosće dla wo zaměnjenju. Skónčnje stej so namakałoj a „čujetej so kaž sotře“.

Započatk měrniweje rewolucije w NDR před 36 lětami su w Plauenje wopominali. Tam běchu 7. oktobra składnostnje 40. róčnicy załoženja NDR prěnju protestnu demonstraciju přewjedli. Tehdy žadachu sej swobodne wólby, swobodu měnjenja a prawo na pućowanje. 9. oktobra 1989 bě rozsudna masowa demonstraciji w Lipsku.