Wabitaj w Pólskej za Braniborsku
Dalše rakety
Gaza/Tel Aviv (dpa/SN). Po israelskich nalětach na Gazaske pasmo su militantni Palestinjenjo dalše rakety na israelsku pomjeznu kónčinu wottřělili. We wjacorych sydlišćach njedaloko Gazaskeho pasma běchu sireny słyšeć. W namjeznym měsće Sderot bu po informacijach medijow dom direktnje trjecheny, při čimž pak so nichtó njezrani.
Israelske wojerske lětadła běchu do toho tři domy w Gazaskim pasmje zničili, mjez druhim běrow šefa tam knježaceje Hamas Ismaila Hanije. Při israelskich nalětach so pjeć Palestinjanow zrani.
Parlament přećiwo knježerstwu
London (dpa/SN). Britiski parlament chce jutře přećiwo woli knježerstwa wo alternatiwach k zrěčenju wo wustupje kraja z Europskeje unije wothłosować. Wotpowědnu próstwu su wčera wječor z wjetšinu hłosow přiwzali.
Jako móžnosće wobjednawaja mjez druhim wuše přiwjazanje Wulkeje Britaniskeje k EU kaž tež dalši referendum wo wustupje kraja z EU. Samo direktne zwrěšćenje brexita přez cofnjenje deklaracije wustupa je móžne. Wotum za tajku wariantu drje njeby prawnisce zawjazowacy był, móhł pak pokazka na to być, što wjetšina parlamenta chce.
Premierministerka Theresa May bě do toho přiznała, zo njeje přeco hišće wjetšina w parlamenće za zrěčenje mjez Londonom a Brüsselom wo brexiće wotwidźomna. Tuž je wothłosowanje wo nim zaso z dnjoweho porjada wzała.
Přiwisnicy brexita reagowachu roznjemdrjeni. Jedyn z jich zastupnikow, weteran Bill Cash, rěčeše wo „konstitucionelnej rewoluciji, kotruž budźe tutón dom hišće wobžarować“.
Söder: Nowa wzajomnosć
Zhromadny program CDU a CSU za wólby Europskeho parlamenta
Berlin (dpa/SN). Dwaj měsacaj do Europskich wólbow 26. meje stej CDU a CSU wčera w Berlinje zhromadny wólbny program wobzamknyłoj. Předsyda CSU Markus Söder ma prěni zhromadny program toho razu za wažny signyl jednoty CDU a CSU, po tym zo běštej so stronje wjele lět wo migraciskej politice wadźiłoj. „Najwažniše poselstwo dźensa je, zo njeby sej nichtó před pjeć lětami tajke zarjadowanje w harmoniji a nutřkownej zestawje předstajić móhł“, rjekny Söder do zetkanja wodźacych zastupnikow CDU a CSU w Berlinje.
Zhromadny načolny kandidat EVP Manfred Weber ze stron CSU ma zwjazowacy element mjez stronomaj unije być, kaž Söder rjekny. Tež wuwiće w CDU „zmóžnja zaso nowu zhromadnosć“ praji Söder hladajo na nowu předsydku CDU Annegret Kramp-Karrenbauer. We wažnych prašenjach nutřkowneje wěstoty stej sej wobě stronje zaso přezjednej. Tež w powšitkownej europskej politice knježi „wulka přezjednosć“. Tuž je wólbny program zdobom „kusk započatka wzajomneho zhromadneho dźěła CDU a CSU“, předsyda CSU zwurazni.
To a tamne (26.03.19)
Zhubjene dźěćo je w Mnichowje wulkozasadźenje policije zawinowało. Mać bě pjećlětnu holcu w nocy samu w bydlenju wostajiła. Jako so 30lětna po hodźinomaj nawróći, bě dźěćo preč. Žona alarmowaše policiju, bórze pak so wukopa, zo njebě holčka ćeknyła, ale přebywaše pola susodow. Žona bě ju žałosćić słyšała a k sebi wzała. Nětko pruwuja, hač je mać winowatosć dohladowanja raniła.
W hotowym luksusu žiwy był je paduch cyły kónc tydźenja w Praskej wili. Přenocowaše w mandźelskim łožu wobsedźerjow, bě wšitko z chłódźaka zjědł a nadobnu garderobu šefa domu wupruwował. Wobydlerjej zadobywarja lepištaj a wołaštaj policiju. Jako jeho zastojnicy zajachu, měješe wón samo hišće elegantny šlips wobsedźerja wile. Za zadobywarjom běchu doma w Pólskej hižo pytali. Nětko pak jemu najprjedy raz jastwo hrozy.
Kołojězba po wosadźe Michałskeje cyrkwje
Budyšin (CRM/SN). Štož je hišće dźensa za katolskich Serbow Budyšina a wokolnych wsow cyrkej Našeje lubeje knjenje blisko Bohateje wěže a zwonka srjedźowěkowskeje měšćanskeje murje, tajki wuznam ma za ewangelsko-lutherskich Serbow před 400 lětami wutworjena wosada z Michałskej cyrkwju na tamnej stronje stareho města. Lětuši jubilej wosady, kotraž njewopřijima jeno wšitke stare a nowše měšćanske dźěle, ale tohorunja wokolne wsy, bě Trudli Malinkowej, sobudźěłaćerce Serbskeho instituta a zdobom redaktorce měsačnika Pomhaj Bóh, z přičinu, ze stawiznami Božeho domu a serbskich wosadnych so bliže rozestajeć. Minjeny štwórtk wona wo tym w farskim domje přednošowaše.
Křiž – symbol swětła?
Budyšin (B/SN). Wuměłski projekt chcedźa Budyscy křesćenjo w póstnym a jutrownym času zwoprawdźić, zo bychu ze swojimi sobubratrami do rozmołwy přišli. Hłowne ćežišćo při tym rěka: Što dawa mojemu žiwjenju swětło? Što mje hnuje? Realizacija projekta ma swój spočatk w zhromadnej iniciatiwje katolskeje a ewangelskeje wosady, kotrejž wobě w mjezsobnosći cyrkej swj. Pětra w Budyšinje wužiwatej. Na ekumeniskej nutrnosći z ewangelskim krajnym biskopom Carstenom Rentzingom a biskopom Heinrichom Timmereversom su wuměłski projekt wotewrěli. Hač do jutrow steja nimale wšědnje zarjadowanja na programje: wot wodźenjow přez přednoški za dźěći, modlitwy wo měr, duchownu hudźbu hač k seminaram a dźiwadłowym kursam. Na mnohich terminach wuměłc Ludger Hinse sam sobu skutkuje.
Sankcije zběhnjene
Mjezynarodne prawo připóznać
Berlin (dpa/SN). Dwaceći lět po zahajenju nalětow NATO na Serbisku w zwisku z konfliktom w Kosowje je sej frakciska šefina Lěwicy Sahra Wagenknecht žadała, zo měła so němska politika jasnje wot USA wotmjezować a mjezynarodne prawo jako centralnu směrnicu swojeje wonkowneje politiki připóznać. To je „centralna wučba“ tutoho a druhich němskich wójnskich wobdźělenjow minjeneju lětdźesatkow, rjekny wona powěsćerni dpa. 24. měrca 1999 běchu lětadła NATO z wobdźělenjom Němskeje bjez mandata UNO Serbisku bombardować započeli. Tam su wčera wopory nalětow wopominali.
Raketa dom w Israelu trjechiła
Dobry tydźeń po zahubnym cyklonje „Idai“ w juhowuchodnej Africe ...
Namołwjeja k dostojnosći
Oświęcim (dpa/SN). Wopomnišćo bywšeho němskeho nacistiskeho zaničowanskeho lěhwa Auschwitz njedaloko pólskeho Oświęcima wopytowarjow napomina so dostojnje zadźeržeć. Tak njesměli ludźo po kolijach balansować a to hišće fotografować. „Myslće na to, zo sće na městnje, hdźež su wjace hač milion ludźi morili“, wopomnišćo twitteruje a namołwja, wopory holocausta z respektom wopomnić.
„Je lěpšich městnosćow, běhanje po wuskej žerdźi zwučować hač ta, kotraž symbolizuje deportaciju statysacow ludźi do smjerće.“ Tak rěka w internetnej zdźělence, kotrejž su wobrazy wopytowarjow připowěsnjene, balansowacych po kolijach smjertneho lěhwa. „Fotografowanje we wopomnišću nochcemy zakazać. Prosymy pak wopytowarjow, so při tym dostojnje zadźeržeć.“ W Auschwitzu běchu nacionalsocialisća wjace hač milion ludźi, zwjetša Židow, morili.
