Karlsruhe (dpa/SN). Towaršnosć za swobodniske prawa (GFF) ma planowany nócny zakaz, dom wopušćić, tež we wosłabjenej formje za wustawu ranjace a chce jón sudnisce wotstronić. GFF bój přećiwo koronapandemiji zasadnje podpěruje a njeje so dotalnym naprawam wobarała, rjekny jeje předsyda Ulf Buermeyer w Berlinje. Hranicy wustawy pak měli so při­wšěm zachować, štož njeje nětko wjace zaručene. Frakciji unije a SPD běštej so dojednałoj, naćisk knježerstwa za tak mjenowane nuzowe borzdźidło změnić. Zakaz ma nětko hakle wot 22 hodź. płaćić, hodźinu pozdźišo hač planowane. Joggować a wuchodźować so je dowolene, ale jeno sam/a. Zwjazkowy sejm chcyše to dźensa wobzamknyć.

Jězba sakskeho ministerskeho prezidenta Michaela Kretschmera do Ruskeje so na prěni pohlad scyła do dźensnišeho časa njehodźi. Zo je ruski prezident Wladimir Putin zły čłowjek a zo je Ruska agresiwny kraj, je dźě mjeztym tajke něšto kaž po­wšitkowna wěda kóždeho dźěsća. Pod ­tajkimi wuměnjenjemi za spomóžne němsko-ruske poćahi so zasadźeć žada sej hižo wulku zmužitosć. Kretschmer ma so po starej zasadźe: Europje je so stajnje najlěpje šło, hdyž bě poměr mjez Němskej a Ruskej dobry. Zapad – NATO a USA – pak trjebaja Rusku jako strategiskeho njepřećela a su minjene lěta wšitko činili, pěstować wobraz agresiwneje Ruskeje, přećiwo kotrejž dyrbiš so ze stajnje nowymi bró­njemi a wjetšimi wudawkami za wójsko ­wobarać. Jim by najlubšo było, bychu-li Němcy a Rusojo zaso na so třěleli. Rozmołwy sakskeho premiera w Ruskej na dosć wysokej runinje su dopokaz, zo sej tam ­jeho prócowanja wo dobre poćahi mjez krajomaj waža. Marko Wjeńka

Podstupim (dpa/SN). Braniborscy plahowarjo swini ćerpja přiběrajcy pod wuskutkami afriskeje swinjaceje mrětwy. Dyrbjeli-li so škody w ratarstwje a w po­trjechenych kónčinach wobmjezować, dyrbjeli wo to starać, zo je mrětwa ručež móžno přewinjena, zwurazni prezident krajneho zwjazka ratarjow Hendrik Wendorff póndźelu w Letschinje we wokrjesu Markowski kraj nad Wódru. Wón rjekny to na statoku ratarja, kiž bě runje swoje poslednje kormjene swinje do rězarnje dowjezć dał. Ratar so nětko plahowanja swini dospołnje wzda.

Kaž Wendorff potwjerdźi, dyrbjeli twar škitneho płotu skónčnje wotzamknyć. Wobstatk dźiwich swini w jadrowych kónčinach, kotrež běchu po namakanju wjacorych zahinjenych natyknjenych dźiwich swini zarjadowali, měli spěšnje na nulu redukować. Nimo hižo wobstejaceho płotu při pólskej mjezy, kiž ma dźiwim swinjam zadźěwać so do Němskeje předrěć, je dalši płót trěbny. Nastawace pasmo mjez płotomaj měli wot dźiwich swini swobodne dźeržeć. „Tak mamy snano šansu, zo smy ,bjez mrětwy‘ a zo móžemy mjaso předawać.“

Berlin (dpa/SN). Uniwersity Němskeje kritizuja planowane nuzowe borzdźidło Zwjazka koronapandemije dla. „Pawšalny a bjezwuwzaćny zakaz kóždehožkuli prezencneho formata wot incidencneje hódnoty 165 by wulkemu dźělej studowacych bjezposrědnje zeškodźało“, rjekny prezident konferency wysokošulskich rektorow, zastupnicy zajimow uniwersitow w Němskej, Peter-André Alt powěsćerni dpa. Konferenca sej žada, dotalne tak a tak hižo snadne móžnosće praksy we wukubłanju a studiju zachować. „Dźěło w laborach, praktiske wukubłanje, wuměłske zwučowanja a pruwowanja měli tež při wjetšich ličbach inci­dency móžne być.“

Alt kritizuje „dospołnje njewěcowne přenjesenje šulskeho modela na akademiski wobłuk“. Wysokošulske kubłanje njewotměwa so w rjadownjach. Zarjadowanja su zdźěla dospołnje digitalnje móžne, zdźěla pak scyła nic. „Wočakuju a žadam sej, zo Zwjazk a kraje tule wotpowědne móžnosće namakaja.“ W tak mjenowanym nuzowym borzdźidle su uniwersity šulam runostajene. Wot incidency 165 je prezencna wučba zakazana.