Rozdźěle dale wulke
Düsseldorf (dpa/SN). Niwow derjeměća wšelakich kónčin Němskeje je dale jara rozdźělny. W po wšej Němskej najbohatšim wokrjesu Starnberg pola Mnichowa zasłuža kóždy wobydler nimale 35 000 eurow. To je dwójce telko dochodow kaž w poruhrskim Gelsenkirchenje, hdźež maja ludźo přerěznje 16 000 eurow wob lěto k dispoziciji. Wuchodne kraje wostanu tež 30 lět po přewróće daloko za zapadnymi. W Halle nad Solawu na přikład zasłužeja ludźo mjenje hač 18 000 eurow.
Weber přećiwo płunowodej
Waršawa (dpa/SN). Politikar CSU Manfred Weber chcył so w padźe wuzwolenja za šefa Komisije EU za to zasadźić, twar wjele diskutowaneho płunowoda Nord Stream 2 w Baltiskim morju přetorhnyć. Tole je wón pólskej nowinje Polska Times přilubił. Wón je přećiwo projektej, dokelž so tak wotwisnosć Europy wot ruskich surowiznow dale zwyša, Weber rjekny. Zwjazkowe knježerstwo porno tomu projekt podpěruje. USA pipelinu tohorunja wotpokazuja, dokelž chcyli Europje swój zemski płun předawać.
Rezolucija wosłabjena
Sewjerokorejski mócnar Kim Jong-un je sej dźensa na swój prěni ...
Na wiziće w Minsku pobył
Wulka inwesticija
Rjemjeslnicy zjawnje apeluja
Drježdźany (SN). Ze zjawnym listom je so Drježdźanska rjemjeslniska komora na předsydow frakcijow a regionalnych zapósłancow Zwjazkoweho sejma wobroćiła. W nim žadaja sej wolóženje předewzaćow, kotřiž wučomnikow wukubłaja. K 1. januarej 2020 ma so mjenujcy powołanski kubłanski zakoń změnić a minimalna mzda wučomnikam zawjesć, štož je zawodam wulke wužadanje. Tohodla měli so zapósłancy z předewzaćelemi wosobinsce rozmołwjeć.
„Njejsmy přećiwo minimalnej mzdy wučomnikam, ale žadamy sej wolóženje firmow na druhim městnje. Wukubłanje žada sej personelne a financielne nałoženje, štož rjemjeslnicy sami noša. Rjemjeslnistwo je za wšitke wobłuki hospodarstwa a tež zjawnu słužbu bytostne. Tuž wšitcy z wukubłanja profituja“, rěka we wčera wozjewjenej zdźělence Drježdźanskeje rjemjeslniskeje komory. Situaciju kóštow a produktiwitu předewzaćow měli do rozmyslowanjow zapřijeć.
Wjace psychiskich schorjenjow
Nowe přepytowanje chorobneje kasy nastupajo powołansku njekmanosć
Garching (dpa/SN). Burnout, depresije, strachi a druhe psychiske chorosće su po nowym přepytowanju chorobneje zawěsćernje Swiss Life najčasćiša přičina powołanskeje njekmanosće w Němskej. Po zwěsćenju zawěsćernje je psychiske schorjenje pola wjace hač třećiny – w 37 procentach wšěch padow – přičina dočasneho wotchada z powołanskeho žiwjenja na wuměnk.
„Jeničce w minjenych dźesać lětach smy runje na tutym polu rozrost 40 procentow registrowali“, rjekny Amar Banerjee, nawoda zawěsćernskeje produkcije němskeje wotnožki Swiss Life w Garchingu pola Mnichowa. Z tym zwjazane su po posudku předewzaća přiběracy stres, powołanski ćišć a pobrachowace wurunanje w powołanskim žiwjenju.
Zawěsćernja je daty swojich kupcow wuhódnoćiła. Po psychiskich chorosćach sćěhowachu schorjenja pohiboweho aparata ze 24 procentami a njezboža z nimale 14 procentami. Swiss Life je po swójskich informacijach na polu zawěsćernjow za powołansku njekmanosć sedme najwjetše předewzaće na němskich wikach.
To a tamne (24.04.19)
Strach wohenjow přiběra
Kamjenica (dpa/SN). Strach lěsnych wohenjow w Sakskej ma dale jasnje přiběrać. Prognoza statneho zawoda Sachsenforst a Němskeje wjedroweje słužby wěsćeja dźensa w dźělach štyrjoch wokrjesow najwyši schodźenk pjeć. W sewjernych kónčinach wokrjesow Sewjerna Sakska, Mišno, Budyšin a Zhorjelc njesmědźa ludźo hižo do lěsow chodźić. Mjeztym zo budźe so połoženje jutře trochu wolóžić, ma so situacija zajutřišim zaso přiwótřić.
Šćěpjensku kampanju zahajili
Johannesburg (dpa/SN). Po nimale třoch lětdźesatkach dźěła zahaja w Africe wot dźensnišeho šćěpjensku kampanju přećiwo malariji. We wobłuku pilotneho pospyta chcedźa w Malawiju, Ghanje a Keniji hač do lěta 2022 kóžde lěto něhdźe 360 000 mjeńšich dźěći přećiwo strašnej chorosći šćěpić. Lěto wob lěto su něhdźe 250 000 dźěći chorosće dla zemrěli. Koordinatorka programa Mary Hamel zdźěli, zo maja wulku nadźiju dźesać tysacy dźěći wuchować.
Maas debatu nawjeduje
Wot „hrateho“ k prawemu prezidentej
Kijew (UŽ/K/SN). Z runjewon přemóžacym wuslědkom je předstajer „prezidenta“ w telewizijnej komediji „Słužownik naroda“, dźiwadźelnik-njepolitikar Wladimir Zelenskij prezidentske wólby na Ukrainje dobył. We wurisanskim kole nažnja wón 73 procentow hłosow, mjeztym zo so za dotalneho prezidenta Petra Porošenka jeno 25 proc. wupraji. Wólbny wuspěch tajkeho kalibra před Zelenskim hišće žadyn kandidat na prezidenta njeje docpěł, a k tomu je wón z 41 lětami najmłódša hłowa stata něhdyšeje sowjetskeje republiki. Čućiwa poražka Porošenka ma so porno tomu jako kwitowanje Ukrainjanow za jeho njespjelnjene lubjenja nastupajo hospodarski postup, masiwne pohubjeńšenje žiwjenja, podróšenja, njeskónčenje wojowanjow w Donbasu. W Donjeckim a Luganskim regionje njejsu wolili. Po čěskich medijach je Zelenskij we wšěch wólbnych wokrjesach dobył. We wuchodźe wučinja přihłosowanje zdźěla wjac hač 80 procentow, w zapadnych regionach něšto wjac hač 50, w stolicy Kijewje dobrych 60 %.
Sri Lanka: Nuzowy staw wuwołali
Colombo (dpa/SN). Dwaj dnjej po seriji cyłkownje wosom nadpadow na cyrkwje a hotele w Sri Lance je so ličba mortwych na 310 zwyšiła, policija dźensa rano zdźěli. Wjac hač 500 zranjenych su w chorowni. Mjeztym je policija hižo 35 wosobow zajała. Wjac hač 20 domow su zastojnicy přepytali. W nocy na dźensa bu nuzowy stał wuwołany. Tak su wjacore nuzowe postajenja płaćiwe. Statny prezident Maithripala Sirisena wozjewi, zo su w zajimje wěstoty a zachowanja zjawneho porjada a zastaranja nuznje trěbne. Dźensniši dźeń wuwołachu jako žarowanski. Hižo rano wotměchu tři mjeńšiny ćišiny. Tohorunja su prěnje chowanja ćěłow předwidźane.
Mjez wjac hač 30 mortwymi wukrajnikami je tež Američan němskeho pochada, wonkowne ministerstwo zdźěli. Knježerstwo w Sri Lance je gremij zasadźiło, kotryž ma nadpady přepytować. Prěnja rozprawa měła hižo za dwaj tydźenjej předležeć. Mjezynarodna organizacija Interpol připowědźi, skupinu fachowcow do kraja pósłać.
