Legendarne spěchanje po schodach New-Yorkskeho Empire State Buildinga, kotrež dyrbjachu loni koronapandemije dla wotprajić, chcedźa zaso přewjesć. Mjeztym 43. wubědźowanje planuja lětsa 26. oktobra. Pandemije dla je ličba wobdźělnikow na 125 wobmjezowana, a tak chcedźa jich wulosować. W lěće 2019 bě Polak Piotr Łobodziński 1 576 schodźenkow wysokodomu w dźesać minutach a pjeć sekundach zmištrował.

Njedorozumjenje wopačneje pizzy dla je w delnjobayerskim Grafenauwje k namócnym rozestajenjam wjedło. We wjaceswójbnym domje běchu wobydlerjo wšelakich domjacnosćow pola wšelakich posłužbow pizzu skazali. Po tym zo bě 26lětny posoł pizzu wopačnemu adresatej wotedał, so wobydlerjo z nim wadźachu a storkachu do njeho. Nimo toho su awto dodawarja pizzy wobškodźili.

Vatikan (B/SN). Koronapandemija wjedźe ke chudobje a k wuzamknjenju z dźěłowych wikow. To bój wo pódu, bydlenje a dźěło mjez bědnymi a zanjecha­nymi hišće bóle přiwótřa, rjekny bamž Franciskus njedawno w sćelaku Dom­radio. W populistiskich systemach njejsu „ludźo protagonisća swojeho wosuda, ale njewólnicy ideologije“. Bamž wob­stawa na tym, zo ma kóždy čłowjek prawo na dostojne žiwjenje. Za katolsku ­cyrkej je socialna sprawnosć njedźě­lomnje z připóznaćom – tež spritualnych – hódnotow a kulturu kóždeho ludu zwjazana.

Bamž přećiwo namocy

Vatikan (B/SN). Na dnju maćerjow je bamž Franciskus we wobłuku připołdnišeho modlenja na Pětrowym naměsće namóc přećiwo žonam wótrje kritizował. Runje nětko stawa so wjele žonow z woporom „choreje formy lubosće. Štóž sej čłowjekow wokoło sebje česći, dyrbi jich swobodu akceptować“, praji Franciskus. Tež w zašłosći je wón stajnje zaso změnu nastajenja k žónskim a wobchada z nimi namołwjał.

Zwólniwosć so šćěpić rozdźělna

Berlin (dpa/SN). Po zahajenju šćěpjenja přećiwo koronawirusej w Němskej je zwólniwosć so šćěpić dać jasnje přiběrała. Nimale tři štwórćiny (74 procentow) wobydlerjow Němskeje nad 18 lětami chcedźa so nětko šćěpić dać. Do zahajenja kampanje w decembru 2020 bě so runje 65 procentow za šćěpjenje rozsudźiło. Po oficialnych informacijach su dotal 30,4 miliony ludźi znajmjeńša jónu šćěpjene, to je 36,5 procentow wobydlerjow.

Lisćinu žadanjow přepodali

Bogotá (dpa/SN). Po dwěmaj tydźenjomaj zdźěla krawnych protestow w Kolumbiskej su nawodźa narodneho stawka knježerstwu lisćinu žadanjow přepodali. Woni žadaja sej mjez druhim kónc zasadźenja wójska přećiwo demonstrantam a wužiwanja bróni ze stron policije, naprawy za kónc splažneje namocy wěstotnych mocow přećiwo žonam a zawjazanje UNO a cyrkwje do rozmołwow mjez demonstrantami a knježerstwom. Při protestach je dotal 50 wosobow žiwjenje přisadźiło, 500 ludźi je zhubjenych.

Dołhe dźěłowe časy strašne