„Mamy z ludźimi činić, kotřiž su zdźěla w diktaturje socializowani, tak zo njejsu tež po 30 lětach hišće w demokratiji dóšli“, je społnomócnjeny za wuchod Marco Wanderwitz rjekł. Z druhim słowami: Tež 31 lět po kóncu NDR je wona přeco hišće zamołwita za bjezposrědnje towaršnostne wobstejnosće na wuchodźe. Tajke něšto twjerdźić je njezmysł, ma pak wěstu me­todu. Štóž je w Saksko-Anhaltskej 18 lět stary a póńdźe tam přichodnu njedźelu prěni króć k wólbam krajneho sejma, nima žanežkuli nazhonjenja z časa NDR, ale widźi wokoło sebje wšědny dźeń. Wšojedne, hač woli wón AfD abo satirisku „Stronu“: Wón čini to z nazhonjenja, zo je daloko preč wot wulkich městow towaršnostna wjazba mjez ludźimi dźeń a słabša a zo je cyłoněmska politiska prezenca wu­chod­neje Němskeje dale jara snadna. Na tym so tež 31 lět po kóncu NDR bohužel ničo­ změniło njeje. Zo ludźo we wólbnej kabinje swój hněw na to zwuraznja, njemóžeš jim za zło wzać. Marko Wjeńka

Drježdźany (dpa/SN). Sakska chce drobnowikowarjam nowostart po wobmjezowanjach swobodneho pohibowanja koronawirusa dla wolóžić. Hač do 18. junija móža iniciatiwy wikowarjow a přede­wzaćelow swoje ideje za wosebite nakupowanske dožiwjenje zapodać, kaž statna kenclija a hospodarske ministerstwo w Drježdźanach informujetej.

Połsta najkreatiwnišich namjetow chce­dźa po 5 000 eurach mytować. „Chcemy z mytom zmužitosć budźić a nowostart po lockdownje podpěrać. Naše wobchody, nakupowanske hasy a měšćanske centrumy wožiwić je skónčnje na dobro wšěch“, ministerski prezident Michael Kretschmer (CDU) potwjerdźa.

Namołwjene su předewšěm lokalne kooperacije w nutřkownych městach a na wobchodnych hasach, kotrež z na­dróžnymi swjedźenjemi, wuměłcami abo tematiskim nakupowanjom dundanje po wobchodach atraktiwniše sčinja. Tež wobhospodarjerjo kinow móža so wobdźělić. Hospodarski minister Martin Dulig (SPD) na to skedźbnja, zo maja tež hosćencarjo, rjemjeslnicy a dalši swój wužitk, hdyž su wobchody zaso wotewrjene.

Berlin (dpa/SN). Zwjazkowy prezident Frank-Walter Steinmeier je zwólniwy za druhu dobu zastojnstwa. To je 65lětny minjeny pjatk w Berlinje připowědźił. „Chcu za druhu dobu jako zwjazkowy prezident k wólbam kandidować“, Steinmeier rjekny. Wón chcył kraj po puću do při­choda přewodźeć, do přichoda po pandemiji. Dale by „chcył, zo pandemija towaršnosć pačenu njezawostaji, a při tym mosty twarić. Su to putace časy.“ Němska steji před wažnymi wólbami a politiskimi łamkami.

Zastojnski čas Steinmeiera klětu wotbě­ži. Zwjazkowa zhromadźizna bě jeho­ 12. februara 2017 z přihłosowanjom 75 procentow za 12. zwjazkoweho pre­zidenta wuzwoliła. Přećiwni kandidaća Lěwicy, AfD, Swobodnych wolerjow a Piratow njemějachu žaneje šansy. Steinmeiera namjetował a we wulkej koaliciji přesadźił bě tehdyši předsyda SPD Sig­mar­ Gabriel. Steinmeier, swój čas wonkowny minister, naslědowaše tehdy Joachima Gaucka, kiž nochcyše po prěnjej dobje zastojnstwa znowa kandidować. Postajaca tema skutkowanja Steinmeiera bě, demokratiju zachować a skrućić.

Slub porika tola hišće zmóžnił je 21lětny nurjer w Jendźelskej, po tym zo bě pjeršćeń w jězoru namakał. Tón bě so młodej žonje z porsta sunył, jako ju jeje přećel na kromje jězora wo mandźelstwo prošeše. Bjez wahanja skoči Angus Hosking do chětro mutneje wody jězora, hdźež je pjer­šćeń po 20 mjeńšinach namakał. Hač je přewšo zbožowny młody porik nurjerja na kwas přeprosył, njeje znate.

Smorčenje muža je w porynsko-pfalcskim Simmernje nócne zasadźenje po­licija­ zawiniło. Starosćiwy wobydler roz­pra­wješe wo spodźiwnych zwukach, kotrež běchu z wotewrjenych duri by­dlenskeho domu słyšeć. Zastojnicy mysteriozne zwuki tohorunja słyšachu. Skónčnje so wukopa, zo pochadźeja wone wot wobsedźerja. Tón drje bě alkohol pił a zabył durje za­činić. Zastojnicy to za njeho sčinichu, tak zo móžeše dale smorčeć.