Nowe naprawy
Třećina ludźi mjeztym šćěpjena
Zadźiwaca kreatiwnosć
To a tamne (23.06.21)
Paducha w swojim bydlenju přewinyłoj staj mandźelskaj w Berlinje Charlottenburgu. 27lětny bě pozdatnje z wotewrjenymi durjemi terasy do bydlenja w přizemju zalězł. Mandźelski słyšeše podhladne zwuki a wuhlada paducha, kak je runje nachribjetnik muža přeborkał. Přewiny a dźeržeše jeho, doniž wot mandźelskeje přiwołana policija njepřijědźe. Ta dyrbješe 27lětneho jenož hišće sobu wzać.
Čwěle myšow dla dyrbja na juhowuchodźe Awstralskeje jastwo ewakuować. Naprawa je trěbna, zo bychu strowotu jatych a přistajenych škitali, zdźěli nawodnistwo jastwa njedaloko Wellingtona w staće New South Wales. Hrymzaki su hižo milinowody a izolaciski material wobškodźili. W New South Walesu bědźa so z najhóršej myšacej kwaklu minjenych 40 lět. Zwěrjatka su wosebje w ratarstwje hižo hoberske škody načinili.
Stadion bjez tučelowych barbow
Mnichow (dpa/SN). Mnichowski koparski stadion njesmě při jutřišej hrě němskeje narodneje koparskeje wubranki přećiwo Madźarskej w tučelowych barbach wobswětleny być. To je europska koparska unija UEFA dźensa rozsudźiła a wotpowědnu próstwu Mnichowskeje měšćanskeje rady wotpokazała. Ta bě sej wobswětlenje jako „signal mnohotnosće a samopostajowaneje formy žiwjenja splažneje orientacije“ žadała.
Heil: Žadyn koronowy lětnik
Berlin (dpa/SN). Zwjazkowy minister za dźěło Hubertus Heil (SPD) widźi němske wukubłanske wiki po měsacy trajacej koronapandemiji w kritiskej fazy. „Ličba wukubłanskich městnow kaž tež požadarjow je hižo loni woteběrała. Pruwowanski čas budźe w lěću“, rjekny Heil nowinarjam. Dźěłowy minister zawody namołwja, statne poskitki podpěry kaž wukubłansku premiju bóle wužiwać. „Njesměmy dopušćić, zo nastanje koronowy lětnik we wukubłanju.“
Kanclerscy kandidaća prašani
80. róčnicu nadpada nacijow wopominali
Moskwa (dpa/SN). W Ruskej, na Ukrainje, w Běłoruskej a dalšich bywšich sowjetskich republikach su dźensa nadpad nacionalsocialistiskeje Němskeje před 80 lětami wopominali. Z nadpadom je so za komunistow swój čas Druha swětowa wójna zahajiła, kotruž mjenuja w bywšim Sowjetskim zwjazku Wulku wótčinsku wójnu. W Berlinje je zwjazkowy prezident Frank-Walter Steinmeier dźensa dopołdnja při wopomnišću za padłych sowjetskich wojakow wěnc połožił. Krjeml nimo toho připowědźi, zo ma artikl ruskeho prezidenta Wladimira Putina w jednej z němskich nowin wuńć.
Sowjetski zwjazk měješe ze 27 milionami mortwych hač do lěta 1945 telko woporow kaž žadyn druhi kraj w Druhej swětowej wójnje. Nadpad nacijow 22. junija 1941 bě zdobom započatk dotal njesłyšaneje zaničowanskeje wójny přećiwo Słowjanam. Zwjazkowa kanclerka Angela Merkel (CDU) bě róčnicu němskeho nadpada njedawno „přičinu hańby“ mjenowała.
Von der Leyen šek EU přepodała
Berlin (dpa/SN). Nimale lěto po wobzamknjenju Europskeje unije nastupajo pomocny program koronawirusa dla přepoda prezidentka komisije EU Ursula von der Leyen dźensa zwjazkowej kanclerce Angeli Merkel (CDU) šek EU za spěchowanske srědki na dobro Němskeje.
Von der Leyen je wot minjeneho tydźenja w Europje po puću, zo by so z knježerstwami wo pomocnych programach rozmołwjała. Programy knježerstwow su zakład rozdźělenja 750 miliardow eurow. Přiměrjenja na inflaciju dla je pomocny fonds EU mjeztym na 800 miliardow eurow rozrostł. Wčera poby von der Leyen mjez druhim w Awstriskej.
Wšitke kraje dyrbja nadrobne plany nowonatwara předpołožić. Zwjazkowe knježerstwo bě swój plan kónc apryla schwaliło. Po nim wočakuja nimale 26 miliardow eurow z Brüssela.
Zeleni němski plan raznje kritizuja. Fachowča za europske naležnosće Franziska Brantner knježerstwu wumjetuje, zo njesadźa žane impulsy, ale zo z pjenjezami stare projekty financuje.
SPD šwika program CDU/CSU
Wodźace gremije unije wólbny manifest schwalili – Söder: Kónčny spurt
Berlin (dpa/SN). Jednohłósnje su wodźace gremije CDU a CSU swój program k wólbam zwjazkoweho sejma schwalili. Předsydaj wobeju stronow, Armin Laschet (CDU) a Markus Söder (CSU) staj jón wčera popołdnju na nowinarskej konferency předstajiłoj. 140 stron wopřijacy manifest steji pod hesłom „Program stability a ponowjenja – zhromadnje za modernu Němsku“.
Nimale sto dnjow do wólbow pokazaštaj so Laschet a Söder optimistiskaj. „Nětko je runje hišće 98 dnjow a nětko dźemy do kónčneho spurta“, rjekny Laschet, kiž je hladajo na wobzamknjeny program „widźomnje wolóženy“. Po jeho słowach jedna so wo dosć konkretny program. Wón je socialnje wuwaženy a pokazuje puć, kak móhła so Němska na lěpšu klimu wusměrjeny industrijny kraj wuwić, bjez toho zo by to dźěłowe městna płaćiło, Söder rjekny. Z nim chcyła unija stabilitu a runočasne ponowjenje zwjazać. Ludźo móhli so na to spušćeć, zo unija tež přichodnje na nowe wužadanja reaguje. Z ludźimi pak nochcyła při tym jako mudry wyši wučer wobchadźeć, předsyda CSU přilubi.
„Kóčka w měše“
Kraje měli same rozsudźić
Drježdźany (dpa/SN). Sakska strowotniska ministerka Petra Köpping (SPD) je zmylki při dotalnej organizaciji za čas pandemije přiznała. W diskusijnym kole na dnju sakskich lěkarjow naspomni wona problematiku zetkanjow mjez zwjazkowymi krajemi wot lońšeje nazymy. „To je z mojeho wida jasny zmylk, dokelž měli kraje same rozsudźić.“
Hižo w prěnim lockdownje běchu po słowach politikarki CDU kraje w dalokej měrje samostatnje jednali. Tež rozdźělne regionalne naprawy w zwjazkowym kraju w druhej žołmje pandemije njeby wona dźensa wjace dowoliła. „Trjebamy cyłokrajne naprawy.“
Nimo toho bychu mjezu k Čěskej wulkeje ličby infekcijow dla nazymu prjedy zawrěć dyrbjeli. Tak móhli natyknjenjam lěpje zadźěwać. Köpping připowědźi lěpše personalne, financielne a digitalne zastaranje strowotniskich zarjadow. Měšćanske a krajne zarjadnistwa njeběchu hač do spočatka pandemije žanu wulku wažnosć na wuhotowanje tychle zarjadow kładli. Ministerka Petra Köpping wupraji so w tym zwisku za to, zarjadować krajny strowotniski zarjad.
