Planuja regionalne konferency
Berlin/Stuttgart (dpa/SN). Kandidaća za nawodnistwo strony SPD, mjez kotrymiž je tohorunja Budyski wyši měšćanosta Alexander Ahrens, maja so na dohromady 23 regionalnych konferencach ludźom předstajić. Prěnja tajka budźe 4. septembra w Saarbrückenje. Poslednja je za 12. oktober w Mnichowje předwidźana, rozjasnja komisariski předsyda SPD Thorsten Schäfer-Gümbel w dźeniku Stuttgarter Zeitung. „We wjetšich krajnych zwjazkach su hač do tři zarjadowanja planowane, tak zo móže sej po móžnosći jara wjele sobustawow wosobinski wobraz wo kandidatach tworić.“
Dotal je so něhdźe pjećina sobustawstwa SPD za online-wothłosowanje nastupajo předsydstwo strony přizjewiła. „Naš zaměr je ličbu 100 000 docpěć.“ Tuchwilu ma strona 426 000 čłonow. Woni móža nazymu online abo z listowymi wólbami wo přichodnym předsydstwje SPD rozsudźić. Na stronskim zjězdźe w decembru potom rozsudźa.
Za čiste dźěłowe wuměnjenja
Dźěłarnistwo warnuje před „horcym lěćom“ ze stawkami
Budyšin (SN). Mjenje dowolowych dnjow, šmórnjene přiražki, krótkodobne dźěłowe zasadźenje: Najwjac z cyłkownje 1 470 rjedźerjam a rjedźerkam Budyskeho wokrjesa hroža masiwne přisadźenja. Wo tym rozprawja dźěłarnistwo rjedźerjow IG BAU a namołwja přistajenych, skrótšenja njepřiwzać. „Tuchwilu předpołožeja šefojo swojim přistajenym nowe dźěłowe zrěčenja z jasnje hubjeńšimi kondicijemi. Te njeměł nichtó podpisać“, warnuje Peter Schubert z IG BAU wuchodneje Sakskeje. Dyrbjeli-li dźěłodawarjo dale tajku praksu wukonjeć a bórzomnym tarifowym jednanjam zadźěwać, postaraja so přistajeni branše wo „horce lěćo“, kaž z nowinskeje zdźělenki wuchadźa. „Tež w Budyskim wokrjesu móhli kubłanišća, běrowy abo chorownje njerjedźene wostać“, Schubert rozjasnja. Dojednany měr mjez IG BAU a dźěłodawarjemi je so 31. julija skónčił.
To a tamne (06.08.19)
Hnydom dźesać jězdźidłow při zaparkowanju swojeho awta wobškodźiła je 75lětna šoferka w Magdeburgu. Prěni pospyt drje bě so jej radźił. Dokelž pak zwěsći, zo awto křiwje steji, chcyše to změnić. Jako wona wróćo storči, wobškodźi hižo prěnjej awće. Naposledk zhubi kontrolu nad swojim wozom, kotryž jenož hišće w kruhu po parkowanišću jězdźeše a tak dalše sydom a tež jeje awto wobškodźi.
Wosobinski poćah mjez pjećlětnym a jeho nanom we Würzburgu je wobškodźeny. Hólčk bě minjeny pjatk na policiju zawołał a přizjewił, zo je jeho nan dwójce čerwjenu amplu přejěł a zo dyrbi policija jeho do jastwa tyknyć. Na zbožo móžeše zastojnik pjećlětneho při telefonje změrować a situaciju złahodnić.
Tempolimit hišće njezwrěšćił
Weimar (B/SN). Hačrunjež je peticiski wuběrk zwjazkoweho knježerstwa žadanje Ewangelskeje cyrkwje w srjedźnej Němskej, zawjesć tempolimit na awtodróhach, wotpokazał, nima iniciator Christian Fuhrmann naležnosć za zwrěšćenu. W cyrkwinskej nowinje Wěra a domizna wyši cyrkwinski rada měni, zo tuchwilu hišće jasne njeje, hač je tež zwjazkowy sejm peticiju wotpokazał. Dyrbimy nětko čakać, móžemy pak ze zapósłancami hišće rěčeć a jich přeswědčić spytać. Ze zjawnej peticiju je ewangelska cyrkej prašenja wobswěta a škita žiwjenja tematizowała. Wšako słuša tež to k jeje zakładnym naležnosćam.
Pomnik patronomaj města
Debatuja wo retorice Trumpa
El Paso/Dayton (dpa/SN). Po krawnym nadpadźe w texaskim měsće El Paso w nocy na njedźelu z 20 mortwymi přiběraja diskusije, zo retorika prezidenta USA Donalda Trumpa rasizm w kraju zesylnja. Mjeztym je Trump ludźom w El Pasu a Daytonje, hdźež bě dalši nadpad z dźewjeć woporami, swoje sobužarowanje wuprajił. „Hida nima žanoho městna w kraju, budźemy so wo to starać“, prezident přilubi. Mjeztym wuchadźeja slědźerjo w padźe El Paso z toho, zo jedna so wo nutřkokrajny terorizm.
Maja přemało lětanskich hodźin
Berlin (dpa/SN). Wjele pilotow Zwjazkoweje wobory njedocpěwa po rozprawje nowiny Bild minimalnu ličbu lětanskich hodźin. Po naprašowanju strony FDP absolwowaše jenož 512 z 875 abo 42 procentow pilotow Zwjazkoweje wobory falowacych lětadłow dla trěbne zwučowanske lěty. Zapósłanc FDP Alexander Graf Lambsdorff sej nětko wot noweje zakitowanskeje ministerki Annegret Kramp-Karrenbauer žada najspěšnišo jednać.
Wjacore awta rozbuchnyli
Kur wohenjow dusy Sibirsku
Moskwa (ČŽ/K/SN). Wohenje lěsow w aziskim dźělu Sibirskeje njejsu w lěću ničo wosebite. Lětsa su pak so wone tak rozšěrili, zo bywa to njesměrna přirodna katastrofa. Mjeztym zachadźeja wone na płoninje dobrych třoch milionow hektarow, štož wotpowěduje něhdźe 40 procentam teritorija Čěskeje republiki Najwjace wohenjow howri w irkutskim a jakutskim regionje. Ruske ministerstwo za wurjadne podawki zdźěla, zo hašeja wohnjowi wobornicy 147 płomjenišćow a zo je něhdźe 500 dalšich wohnišćow. W prěnim rjedźe škitaja pomocnicy wobydlene sydlišća.
Prezident Wladimir Putin je za podpěru hašerjow a za skutkowne wobmjezowanje wohenjow kónc tydźenja wójsko do kónčin inferna pósłał. Te nětko ze specialnymi lětadłami a helikopterami přećiwo płomjeniskam postupuje. Po ruskim rozhłosu běchu so ludźo w socialnych syćach mócnje hóršili, zo „wyšnosće přihladuja, kak wohenje lěsy niča“.
Dlěje za Zelenymi njeběhać
Berlin/Drježdźany (dpa/SN). Bayerski ministerski prezident Markus Söder (CSU) je so hladajo na strukturnu změnu nastupajo kónc wudobywanja brunicy za wosebite hospodarske cony wuprajił. We wčerawšim lěćnym interviewje w telewizijnym sćelaku ARD je wón šansowy plan za nowe kraje namjetował. Tak dźe wo wjac inowacijow a technologijow, wo zaměstnjenje hospodarskich strukturow a nowych uniwersitow. Do wosebitych hospodarskich conow měli z nišimi danowymi sadźbami nowych mjezynarodnych inwestorow wabić. Dale Söder podšmórny, zo měli wo tym rozmyslować, hižo w lěće 2030 wudobywanje brunicy zakónčić. Komisija zwjazkoweho knježerstwa bě je na lěto 2038 datěrowała.
Nastorčenu diskusiju nima sakski ministerski prezident Michael Kretschmer (CDU) za spomóžnu a chce ju zakónčić, wšako je lětoličba hižo jasna. Njeměli ludźom strach načinjeć. „Unija dyrbi přestać, za Zelenymi běhać. Hewak steji nadobo na městnje, na kotrež njesłuša.“
Podpěruja kandidaturu
Alexander Ahrens a Simone Lange přilubjataj čerstwy wětřik
Budyšin/Berlin (SN/BŠe). W požadanskim procesu wo nawodnistwo zwjazkoweje SPD so tuchwilu tójšto hiba. Dźensa hakle bu zjawne, zo chce tež wiceprezident hospodarskeho foruma SPD Robert Maier za nadawk kandidować.
To a tamne (05.08.19)
Město do parkowanskeho domu staj so francoskaj mandźelskaj w Mnichowje na schody podzemskeje dóstałoj. 66lětny šofer bě zachod železnicy w nutřkownym měsće wčera dopołdnja z parkowanskim domom zaměnił. Snano je jeho kłok, pokazowacy na parkowanišćo za zbrašenych, zamylił. Zranił so na zbožo nichtó njeje, awto pak dyrbjachu wotwlec.
Ze skokom do rěki Mosel chcyše pjany šofer awta bjez jězbneje dowolnosće policiji w porynsko-pfalcskim Bernkastelu-Kuesu wućeknyć. Policajskej patruli bě wčera w rańšich hodźinach napadnyło, zo awto jara njewěsće jědźe. Po přesćěhanju drje wone zasta, ale sobujěducaj ćeknyštaj. Jeju su lepili a nachwilnje zajeli. Tež šofer zastojnikam twochny, skoči do Mosele a spyta ju přeprěčić. Wohnjowa wobora we wuchowanskim čołmje pak muža z wody wućahny.
Jenož hišće snadna wjetšina
London (dpa/SN). Tak a tak hižo snadna wjetšina britiskeho premierministra Borisa Johnsona w Londonskim parlamenće je na jenički hłós zeškrěła. Při dodatnych wólbach dyrbjachu konserwatiwni swoje městno za region Brecon a Radnorshire na wuchodźe kraja liberalnym demokratam přewostajić. Konserwatiwni maja nětko w delnjej komorje parlamenta zhromadnje z koaliciskom partnerom DUP ze Sewjerneje Irskeje jenož hišće 320 mandatow porno 319 zapósłancam cyłeje opozicije.
Nowe cła USA kritizowane
Peking (dpa/SN). Wonkowny minister Wang Yi je připowědźene nowe chłostanske cła USA zasudźił. „Zwyšenje cła njeje definitiwnje žana konstruktiwna naprawa, rozrisać hospodarske a wikowanske napjatosće“, rjekny wón w chinskej telewiziji. Prezident USA Donald Trump bě wčera nowe dźesaćprocentowske cła na chinske twory w cyłkownym wobjimje 300 miliardow dolarow připowědźił. Do toho běchu jednanja mjez USA a Chinu wo tym zwrěšćili.
Von der Leyen w Italskej
