Wochozy (AK/SN). Strukturna změna ma ze zaměrnymi naprawami potrjechenych we Łužicy direktnje docpěć. „Za to so knježerstwo zasadźa, a to z dwěmaj zakonjomaj. W septembru chcemy zakoń wosylnjenju struktury wobzamknyć. Wón rjaduje perspektiwy přichoda. Tamny zakoń ma kónc zmilinjenja brunicy organizować. Za wobaj zakonjej z połnej paru dźěłamy“, přilubi Thomas Bareiß, zapósłanc CDU w zwjazkowym sejmje, na swojim njedawnym wopyće we Wochožanskim parku błudźenkow. Bareiß je zdobom społnomócnjeny zwjazkoweho knježerstwa za naležnosće turizma. Zaměr wopyta bě, potrjechenych we łužiskim regionje sylnišo sensibilizować.
Chětro napadny nalěpk na kófrje je paducha wačokow w ćahu přeradźił. Sobujěduca 26lětna parowaše swój kófer, po tym zo bě na nuzniku była. Železnicar, kotrehož wo tym informowaše, móžeše so dopominać, zo bě muž runje w Bad Oeynhausenje z kófrom z intercityja wulězł. Na to informowachu nawodu naslědneho ćaha. A woprawdźe: W regionalnym ekspresu do Hamma železnicar wopisany wačok nańdźe. W Hammje policija paducha hižo wočakowaše. Kófer su žonje mjeztym zaso wróćili.
Cyłu kuchnju pokradnyli su njeznaći mužej w Hornjej Frankskej. Muž bě kuchnju při přećahu do druheho bydlenja nachwilnje na chódniku wotstajił. Jako chcyše ju po štyrjoch hodźinach bjez dohlada do noweho bydlenja dowjezć, bě kuchnja fuk. Wona měješe po informaciji wobkradnjeneho hódnotu 500 eurow.
Mnichow (dpa/SN). W aferje manipulowanych dieselowych awtow dla je Mnichowske statne rěčnistwo něhdyšeho nawodu koncerna Audi Ruperta Stadlera wobskoržiło. Jemu a třom dalšim wobskorženym wumjetuja „jebanstwo, falšowanje wopismow a chłostajomne wabjenje“, statne rěčnistwo zdźěla. 56lětnemu Stadlerej wumjetuja, zo je wot lěta 2015 wo manipulowanjach wědźał, ale přiwšěm awta dale předawał a za nje wabił. Hač proces zahaja, rozsudźi sudnistwo.
Něšto wjace bjezdźěłnych
Nürnberg (dpa/SN). Ze zahajenjom lětnjeje přestawki je ličba bjezdźěłnych w Němskej snadnje na 2,275 milionow rozrostła. To je 59 000 wjace hač w juniju a 49 000 mjenje hač před lětom, kaž Zwjazkowa agentura za dźěło dźensa informuje. Kwota bjezdźěłnosće je wot 4,9 na 5,0 procentow přiběrała. Wjetša bjezdźěłnosć w juliju je typiski zjaw, tež wosłabjaca so konjunktura pak so wuskutkuje, zdźěli čłon předsydstwa agentury Daniel Terzenbach nowinarjam.
Elektro awta spěchować
Berlin/Waršawa (dpa/SN). Zwjazkowy wonkowny minister Heiko Maas (SPD) je so dźensa do Pólskeje podał, zo by so tam na swjatočnosćach składnostnje 75. róčnicy Waršawskeho zběžka wobdźělił. Dnja 1. awgusta 1944 běchu so wobydlerjo z pomocu ilegalnje skutkowaceje Armije Krajoweje přećiwo němskim okupantam pozběhnyli. Při wojowanjach a masakrach němskeje SS přećiwo ciwilnej ludnosći je tehdy 200 000 Polakow zahinyło. Po krawnym poraženju zběžka 2. oktobra 1944 němske jednotki Waršawu systematisce zničichu. Sowjetske wójsko, kotrež steješe na tamnym pobrjoze Wisły, njeje zapřimnyło.
Heiko Maas chcyše so dźensa we Waršawje z pólskim statnym prezidentom Andrzejom Dudu a z wonkownym ministrom Jacekom Czaputowiczom k rozmołwam zetkać. Jutře chce wón zhromadnje ze swojim pólskim kolegu při pomniku za wopory zběžka wěnc połožić a w Muzeju Waršawskeho zběžka porěčeć.
Kopate natykane wosobowe awto je policija na awtodróze A 9 w Hornjej Frankskej zadźeržała. Dwuwosobowy wóz bě tak z domjacej nadobu nakładowany, zo šofer lědma hišće něšto widźeše. Samo wokoło płunoweho pedala a borzdźidła bě wšitko połne čapora. Dokelž njeměješe šofer ani jězbnu dowolnosć ani přizjewjenje awta při sebi, dyrbješe awto najprjedy raz stejo wostajić. Čehodla bě wone tak natykane, njeje znate.
Ćeknjeneho kenguruwa su w parku w Chołmje nad Kwětanečanskim jězorom popadnyli. Wobydlerjo běchu jeho póndźelu wuhladali a policiju informowali. Ta prošeše direktora Zhorjelskeho zwěrjenca wo pomoc. Direktor móžeše skoćo z narkozowym kłokom pohłušić, na čož dowjezechu je do zwěrjenca. Policija pyta nětko za jeho wobsedźerjom. Dźeń a wjace ludźi sej dźensa kenguruwy dźerži.
Wojerecy (AK/SN). Z tak mjenowanym zakonjom wo sylnjenju struktury chcedźa Zwjazk a kraje strukturnu změnu w brunicowych rewěrach zawjazujcy spěchować. „Hač do kónca septembra ma naćisk předležeć. Mjeztym je dowothłosowanje ze zwjazkowym hospodarskim ministerstwom zaběžało. Hišće lětsa chcemy zakoń schwalić“, podšmórny społnomócnjeny sakskeho statneho knježerstwa za Łužicu a nawoda wotrjada za natwar a strukturnu změnu dr. Stephan Rohde wčera we Wojerecach. Tam wuradźowaše interministerielny wuběrk za strukturne wuwiće w sakskich brunicowych rewěrach. Zastupnicy Zwjazka, kraja, komunow – mjez druhim Běłeje Wody, Slepoho, Mužakowa, Wojerec, Sprjewineho Doła – kaž tež wokrjesow Budyšin a Zhorjelc, zastupjerjo Regionalneho planowanskeho zwjazka Hornja Łužica-Delnja Šleska, Domowiny a dalšich gremijow běchu wobdźěleni. Hač do 2038, tak dr. Rohde podšmórny, je za Łužicu 2,408 miliardow eurow za změnu struktury k dispoziciji. To su 120,4 miliony eurow wob lěto. Nimo zakonja wo sylnjenju struktury Zwjazk a kraje tež zakoń wo pospěšenym planowanju zaměrnje rozjimuja, rjekny Rohde.