Manama (dpa/SN). Diskusija wo škiće tankowcow w Persiskim zaliwje nabywa konkretne wojerske dimensije. Zastup­nicy ameriskeho a britiskeho wójska su dźensa w stolicy Bahraina Manamje wo móž­nym zasadźenju wojerskich srědkow za škit ciwilnych łódźow w kónčinje wuradźowali, kaž powěsćernja dpa rozprawja. Zakitowanske ministerstwo w Londonje rěčeše wo „wjacorych mjezyna­rodnych partnerach“, kotřiž chcedźa so na projektće wobdźělić. Wulka Britaniska a USA chcedźa po wjacorych nadpadach na łódźe na Hormuskej mórskej dróze transport zemskeho wolija w regionje zaručić. Njedawno běchu iranske jednotki britiski tankowc wobsadźili a nachwilnje sćazali. Mjeztym su so USA Němsku oficialnje prašeli, hač nochcyła so na wo­jerskej misiji w Persiskim zaliwje wob­dźělić. Wonkowne ministerstwo w Ber­li­nje wčera zdźěli, zo njeje němski přinošk k planowanej misiji USA „Sentinel“ (straža) předwidźany. Tež knježerstwowej stronje CDU a SPD planowanu misiju pod nawodom USA wotpokazujetej.

Dopominaće so hišće na lěto 2002? Tehdy pytaše prezident USA George W. Bush za zwjazkarjemi, kotřiž bychu z nim do wójny přećiwo Irakej ćahnyli. Z „koaliciju zwólniwych“ wón lěto pozdźišo kraj woprawdźe nadpadny, na zbožo bjez wobdźělenja Němskeje. Nětko wuwiwa so něšto podobneho, tónraz přećiwo Iranej. Při tym­, kaž hižo 2002, zwěsćamy, zo USA fakty tak dołho zhibuja, doniž so do wobraza njehodźa. Kóždy rěči wo tym, zo su iranske jednotki britiski tankowc wobsadźili a sćazali. Zo běchu Britojo do toho iranski tankowc wobsadźili a sćazali, je so z pomjatka ludźi a medijow na spodźiwne wašnje zhubiło. Dyrbimy drje z tym ličić, zo Američenjo wonu koaliciju za „škit“ łódźow w Persiskim zaliwje ze­stajeja. Potom njetrjebamy dołho na někajku „prowokaciju“ Irana čakać. Njehrozy nam ničo druhe hač nowa wójna – z fa­­tal­nymi wuskutkami za nas wšěch. Strašne to wuwiće! Marko Wjeńka

Kopate natykane wosobowe awto je policija na awtodróze A 9 w Hornjej Frankskej zadźeržała. Dwuwosobowy wóz bě tak z domjacej nadobu nakładowany, zo šofer lědma hišće něšto widźeše. Samo wokoło płunoweho pedala a borzdźidła bě wšitko połne čapora. Dokelž njemě­ješe šofer ani jězbnu dowolnosć ani přizjewjenje awta při sebi, dyrbješe awto najprjedy raz stejo wostajić. Čehodla bě wone tak natykane, njeje znate.

Ćeknjeneho kenguruwa su w parku w Chołmje nad Kwětanečanskim jězorom popadnyli. Wobydlerjo běchu jeho póndźelu wuhladali a policiju informowali. Ta prošeše direktora Zhorjelskeho zwěrjenca wo pomoc. Direktor móžeše skoćo z narkozowym kłokom pohłušić, na čož dowjezechu je do zwěrjenca. Policija pyta nětko za jeho wobsedźerjom. Dźeń a wjace ludźi sej dźensa kenguruwy dźerži.

Wojerecy (AK/SN). Z tak mjenowanym zakonjom wo sylnjenju struktury chcedźa Zwjazk a kraje strukturnu změnu w brunicowych rewěrach zawjazujcy spěchować. „Hač do kónca septembra ma naćisk předležeć. Mjeztym je do­wothłosowanje ze zwjazkowym hospodarskim ministerstwom zaběžało. Hišće lětsa chcemy zakoń schwalić“, podšmórny społnomócnjeny sakskeho statneho knježerstwa za Łužicu a nawoda wotrjada za natwar a strukturnu změnu dr. Ste­phan Rohde wčera we Wojerecach. Tam wuradźowaše interministerielny wuběrk za strukturne wuwiće w sakskich brunicowych rewěrach. Zastupnicy Zwjazka, kraja, komunow – mjez druhim Běłeje Wody, Slepoho, Mužakowa, Wojerec, Sprjewineho Doła – kaž tež wokrjesow Budyšin a Zhorjelc, zastupjerjo Regionalneho planowanskeho zwjazka Hornja Łužica-Delnja Šleska, Domowiny a dalšich gremijow běchu wobdźěleni. Hač do 2038, tak dr. Rohde podšmórny, je za Łu­žicu 2,408 miliardow eurow za změnu struktury k dispoziciji. To su 120,4 miliony eurow wob lěto. Nimo zakonja wo sylnjenju struktury Zwjazk a kraje tež zakoń wo pospěšenym planowanju zaměrnje rozjimuja, rjekny Rohde.