Sudnistwo jedna wo skóržbje AfD
Lipsk (dpa/SN). Sakske wustawowe sudnistwo chcyše dźensa popołdnju wo skóržbje AfD přećiwo skrótšenju jeje krajneje lisćiny za wólby Sakskeho krajneho sejma 1. septembra jednać. Wčera bě strona ze samsnej skóržbu na Zwjazkowym wustawowym sudnistwje w Karlsruhe zwrěšćiła. Sudnistwo bě na to pokazało, zo su kraje za škit wólbneho prawa zamołwite. AfD bě skóržbu přećiwo rozsudej Sakskeho wólbneho wuběrka runočasnje w Karlsruhe a Lipsku zapodała.
Po rozsudźe sakskeho krajneho wólbneho wuběrka smě AfD 1. septembra jenož z prěnimi 18 kandidatami swojeje krajneje lisćiny k wólbam nastupić a nic kaž planowane z 61. Gremij bě spočatk julija zestajenje krajneje lisćiny formalnych njedostatkow dla za njepłaćiwe deklarował. Tak mjez druhim na to pokazachu, zo bě AfD swojich kandidatow na dwěmaj stronskimaj zjězdomaj postajiła a za to spočatnje wobzamknjene wólbne postupowanje změniła. Dyrbjało-li při rozsudźe wostać, dyrbjała strona wjele direktnych mandatow zdobyć.
Šule Braniborskeje digitalizować
Krajne knježerstwo w Podstupimje wobšěrny program připowědźiło
Podstupim (dpa/SN). Na braniborskich šulach ma so přichodnje digitalne wuknjenje zmóžnić. Za to chcedźa přichodne pjeć lět we wobłuku tak mjenowaneho digitalneho pakta Zwjazka a krajow nimale 168 milionow eurow nałožować, kubłanska ministerka Britta Ernst (SPD) w Podstupimje zdźěli. Tak móža sej šule swójski W-lan zarjadować, digitalne šulske tafle (whiteboards) kupić a šulerjow z tabletami wuhotować.
„Dźěći, kotřiž lětsa do šule zastupja, maja prawdźepodobnje hač do lěta 2080 dźěłać“, Ernst rjekny. „Tohodla dyrbimy šulam do přichoda sahace wuhotowanje zmóžnić.“ Přichodne lěta chcedźa nimo toho wšitke šule k spěšnej internetnej syći přizamknyć.
Při tym njesměli žadyn čas brojić, namołwješe kubłanski fachowc opoziciskeje CDU w krajnym sejmje, Gordon Hoffmann. „Krajne knježerstwo dyrbješe přiznać, zo nima tuchwilu 80 procentow wšěch šulow ani spěšny internet, njerěčo scyła wo druhej modernej technice na polu digitalizacije.“
Spjećuje so nowemu muzejej
Gdańsk (dpa/SN). Měšćanostka Gdańska, Aleksandra Dulkiewicz, je pólskeho prezidenta namołwjała, plany za twar dwělomneho muzeja na Westerplaće zadźeržeć. Wona je Adrzeja Dudu prosyła, weto přećiwo zakonjej zapołožić abo jón wustawowemu sudnistwu předpołožić, rjekny Dulkiewicz sćelakej TVN24.
Přičina zwady je wot pólskeho parlamenta schwaleny zakoń, kotryž narodnokonserwatiwnemu knježerstwu twar muzeja w Gdańsku zmóžnja, hdźež knježi opozicija. Kritikarjo wočakuja, zo w nowym muzeju stawizny jednostronsce interpretuja. Po swojim nastupje w lěće 2015 sadźa knježerstwowa strona Prawo a sprawnosć (PiS) w stawiznach Pólskeje nowe akcenty. Knježacy propaguja hódnoty kaž narodnu identitu a patriotizm. Dulkiewicz kritizuje, zo njeje knježerstwo PiS měnjenje stawiznarjow, swědkow časa a wobydlerjow wobkedźbowało. Knježerstwo argumentuje, zo město Gdańsk historisce wažne wopomnišćo zanjechuje. Z wobtřělenjom Westerplaty přez němsku wójnsku łódź bě so 1. septembra 1939 Druha swětowa wójna zahajiła. Pólscy wojacy so tehdy zmužiće wobarachu.
To a tamne (25.07.19)
Sobujěduceho w kabinje lokomotiwnika sobu wzał je železnicar w Ruskej. Hósć smědźeše mjez Pětrohrodom a Moskwu pódla njeho sedźeć. Lokomotiwnika su mjeztym nachwilnje suspendowali. Sobujěducy bě swoju jězbu na francoskej platformje za sobujěducych Blablacar knihował. Zetkać chcyštaj so w sewjeroruskim měsće, hdźež lokomotiwnik po sobujěduceho přińdźe.
Sobudźěłaćerjam radnicy lód wudał je měšćanosta najhorcyšeho města Němskeje w Geilenkirchenje. Wčera běchu w měsće při nižozemskej mjezy na wojerskim terenje 40,5 stopnjow naměrili. Dyrbjała-li Němska wjedrarnja tole potwjerdźić, by nowy rekord horcoty w Němskej nastajeny był. Dotalny pochadźa ze 40,3 stopnjemi z bayerskeho Kitzingena. Geilenkirchenski měšćanosta Georg Schmitz je sej wěsty, zo rekord připóznaja.
Pomjenuje noweho premiera
London (dpa/SN). Britiska kralowna Elizabeth II. chcyše dźensa dwělomneho bywšeho wonkowneho ministra Borisa Johnsona za noweho premierministra kraja pomjenować. Po planje měješe wona konserwatiwneho politikarja popołdnju w Buckinghamskim palasće witać. Johnson bě w boju wo naslědnistwo Theresy May jako dobyćer wušoł. 55lětny chcył Wulku Britanisku z Europskeje unije wjesć, w nuzy bjez zrěčenja z EU.
Wurjadne posedźenje sejma
Berlin (dpa/SN). Tydźeń po jeje powołanju za nowu zakitowansku ministerku měješe předsydka CDU Annegret Kramp-Karrenbauer dźensa w zwjazkowym sejmje přisahu złožić. Za to běchu wšitkich 709 zapósłancow z dowola na wurjadne posedźenje zwołali. Zeleni a FDP dwělujetej, zo je wurjadne posedźenje scyła trěbne. Kramp-Karrenbauer móhła přisahu jako ministerka tež na přichodnym prawidłowym zeńdźenju parlamenta złožić.
Minister před wuběrkom
Swoje wjeselo maja Philip (14), Friedrich (11) a Fabian (10) z ...
Kritizuja plany za nowy haćenski schodźenk
Praha (dpa/SN). Čěski zličbowanski zarjad NKU je plany wobchadneho ministerstwa w Praze za dwělomny nowy haćenski schodźenk za nakładne łódźe na Łobju njedaloko němskeje hranicy kritizował. Zasadźenje dawkowych srědkow za wutwar rěki njeje ani efektiwny ani na zaměr wusměrjeny, rěka w rozprawje. Podźěl nakładneho wobchada na rěkach wostawa hladajo na cyłkowny transport tworow w Čěskej dale jara snadny.
Do planowanja haćenskeho schodźenka pola Děčína su po informacijach kontrolerow hižo 24,5 milionow eurow inwestowali. Tola tež po 14 lětach njejsu pruwowanja znjesliwosće hladajo na wobswět hišće wotzamknjene. Konflikt mjez zjawnym zajimom za škit wobswěta a přerjadowanje transporta tworow na wodu je dale njerozrisany. Haćenski schodźenk ma łódźam jězdźenje w časach niskeje wody wolóžić. Wobswětoškitarjo warnuja zdobom před negatiwnymi wuskutkami za ryby a za wegetaciju při pobrjohach. Z přepytowanjom su zwěsćili, zo njejsu wočakowane škody z druhimi naprawami narunajomne.
Nadpady hackerow přiběraja
Berlin (dpa/SN). Nadpady kompjuterowych zadobywarjow na němske koncerny dale přiběraja. Po rešeršach bayerskich a sewjeroněmskich rozhłosownikow bě minjeny čas znajmjeńša wosom wulkich předewzaćow potrjechenych. Nimo toho su hackerojo wjace hač dźesać dalšich předewzaćow nadpadnyli.
Industrijowy koncern Siemens je mjeztym wobkrućił, zo bě spočatk lěta 2016 z woporom internetnych zadobywarjow. Tež chemijowy koncern Bayer tajki nadpad wobkrući. Tam běchu spočatk 2018 zwěsćili, zo je interna kompjuterowa syć firmy ze škódnej software zanjerodźena, kotruž bě hackerowa skupina „Winnti“ skradźu instalowała.
Fachowcy na to tukaja, zo pochadźa skupina ze Chiny. Dokładne informacije pak nimaja. Samsna skupina je tež za hackerowy nadpad na koncern Thyssenkrupp zamołwita. Specialisća maja postupowanje hackerow za wulce profesionalne. Jich nadpady potrjecheni hakle pozdźe spóznaja. Hackerojo měrja so přiběrajcy tež na srjedźostawske firmy.
LEAG wita rozsud za Łužicu
W Čornej Pumpje chcedźa wodźikowu technologiju wupruwować
Čorna Pumpa (SN). Projekt „Referencna milinarnja Łužica“, kotryž předewzaći Łužiske energijowe hórnistwo a energijowy zastaraćel LEAG podpěrujetej, słuša k dobyćerjam idejoweho wubědźowanja „Realne labory energijoweho přewróta“ zwjazkoweho hospodarskeho ministerstwa, kaž minjeny kónc tydźenja zdźělichu. Koordinator projekta, w kotrymž dalši partnerojo industrije a wědomosće sobu skutkuja, je Zaměrowy zwjazk industrijneho parka Čorna Pumpa.
