Podstupim (dpa/SN). Kóžda štwórta komuna w Braniborskej dyrbi přemało dochodow dla zawěsćenski koncept etata předpołožić. To płaći mjez druhim za wokrjes Hornje Błóta-Łužica, za bjezwo­krjesne města Choćebuz, Frankfurt nad Wódru a Branibor nad Habolu kaž tež za nimale sto dalšich gmejnow, kaž braniborske financne ministerstwo na naprašowanje frakcije Zelenych tamnišeho krajneho sejma zdźěli. Sćěh toho su hoberske změny nastupajo dobrowólne nadawki a wukony za wobydlerjow. W decembru 2018 wobzamknjeny wurunanski zakoń ma komuny a komunalne zjednoćenstwa w přichodnych lětach bóle wolóžić. Mnohe z nich pak nadźijeja so bórzomneho kónca tak mjenowaneho koncepta wěstoty.

Zhromadne posedźenje krajneju knježerstwow Sakskeje a Durinskeje

Erfurt/Drježdźany (dpa/SN). Knježer­stwje Sakskeje a Durinskeje žadatej sej do wólbow krajnych sejmow na wuchodźe widźomne inwesticije Zwjazka w tych krajach. „Durinske krajne knježerstwo a sakske statne knježerstwo wočakujetej, zo so tuchwilny niwow spěchowanja při natwarje přichodneho cyłoněmskeho spěchowanskeho systema zachowa“, cituja nowiny z naćiska wobzamknjenja do zhromadneho posedźenja wobeju kabinetow w durinskim Altenburgu.

Dotal za wuchodnu Němsku płaćiwy Solidarny pakt II kónc lěta 2019 wuběži. Zwjazkowe knježerstwo ma wotpohlad, za přiměrjenje žiwjenskich poměrow na wuchodźe a zapadźe nowy financny fonds zarjadować, kotryž pak měł po wuprajenjach zwjazkoweje swójbneje minis­terki Franziski Giffey (SPD) jako před­sydki knježerstwoweje komisije „Runohódne žiwjenske wuměnjenja“ nimo wucho­doněmskich tež strukturnje słabe kónčiny w zapadnej Němskej wobkedźbować.

Bjezmała bjezkónčna debata wo škiće klimy ma dalši kapitl. EU sej wot Němskeje žada, swójsce schwalene naprawy dodźeržeć. Poprawom to stary lac. Bjezradnosć politikarjow přewodźeja stajnje samsne argumenty, zo drje je wšěm wědome, zo měło so skónčnje něsto stać, ale prošu nic na kóšty dźěłowych městnow. A předrohe tež njesměło być. Přikład za to, kajku prioritu klima pola nas woprawdźe ma: Za brónjenje nałožujemy něhdźe 40 miliardow eurow – 20 króć telko kaž za wobswětoškit, a ministerstwo za zakitowanje chce etat přichodnje podwojić. Diskusija je mjeztym nažel chětro jednostronska. Fosilnych paliwow so wzdać je bjezdwěla dobra mysl a krótkodobnje prawy puć. Zasadny problem pak je lěto wob lěto globalnje stupaca přetrjebana energija. Wšojedne, kak sej ju zdobywamy: Trans­formacija je přeco tež ze sćoplenjom zwjazana. Ale to wšak jenož fyzikarjo měnja! Tež tajki stary lac. Bosćan Nawka

Brüssel (dpa/SN). Němska dyrbi so z wida komisije EU nastupajo škit klimy bóle napinać, chcyła-li swoje zaměry hač do lěta 2030 docpěć. Dotalne plany za wobchad, twarjenja a ratarstwo njedosahaja, zo móhła Němska swoje přilubjenja w Europskej uniji dodźeržeć, zdźěli komisija w Brüsselu. Wotstawk mjez planom a woprawdźitosću je chětro wulki. Komisija potwjerdźa posudk zwjazkoweho knježerstwa, kotrež tuchwilu přidatne naprawy zdźěłuje.

Zwjazkowe knježerstwo bě – kaž wšitke druhe knježerstwa EU – nachwilny plan naprawow za dobu 2021 do 2030 předpołožiło, kotryž komisija nětko pruwuje. Kritisce w Brüsselu zwěsćeja, zo njejsu ličby nastupajo wutwar wobnowjomnych energijow konkretne dosć.