Španiske knježerstwo dźewjeć katalanskich aktiwistow z jastwa pušćiło

Barcelona (dpa/SN). Wot španiskeho knježerstwa wobhnadźeni separatisća z Katalonskeje su připowědźili, zo chcedźa dale wo njewotwisnosć konfliktneho regiona wojować. „Chcemy wonka za swobodu, za amnestiju, za samoposta­jo­wanje a za republiku dźěłać“, rjekny by­wši katalanski wonkowny minister Raül Romeva, jedyn z dźewjeć pušćenych aktiwistow, pod wyskom stow přiwisnikow. Před jastwom w měsće Lledoners njedaloko Barcelony witaše wobhnadźenych tež regionalny prezident Pere Aragonès. Separatist žada sej wot centralneho knježerstwa w Madridźe zelenu swěcu za legalny referendum wo njewotwisnosći.

Romeva, bywši zastupowacy regionalny šef Oriol Junqueras a pjećo dalši wobhnadźeni nawodźa ilegalneho pospyta wotpačenja nazymu 2017 dźeržachu plakat z hesłom „Swobodu za Katalonsku“ w rukach. „Njedamy sej hubu zakazać“, woni wołachu. Dalšeju separatistow witachu wyskacy přiwisnicy w Puig de les Basses njedaloko mjezy k Francoskej.

Wočakowanja běchu wulke, kotrež je sakske­ knježerstwo nastupajo strukturnu změnu w brunicowymaj rewěromaj zbudźiło. Nětko ma sakska Łužica z hornca Zwjazka 4,5 miliardow eurow k dispo­ziciji. Zapodate namjety bychu wo wjele wjetšu sumu wučinjeli. Wězo je połoženje za wšěch wobdźělenych nowe a wužadace. Ministerski prezident Michael Kretsch­mer rěčeše wčera wo „wuknjenskim procesu“, kotremuž maja předewšěm rozsudźerjo wotpowědować, a přirunowaše to před nowinarjemi w Budyšinje ze započatkom Leader-spěchowanja. Přez lěta sta so wone ze spušćomnym stołpom regionalneho wuwića. Rozdźěl pak tči w tym, zo maja pjenjezy strukturneje změny za předewzaća, kotrež regionalny přewodny wuběrk schwali, w kruće postajenym ča­so­wym wobłuku přetrjebane być. Při wšej kritice: Ze schwalenjom projektow zahaja so faza jich zwoprawdźenja. Za lěto wšitcy zawěsće wjace wědźa a móža ze zmylkow lěpje wuknyć. Axel Arlt

Wosrjedź jězby z kófroweje rumnosće awta padnyłoj staj mužej w starobje 19 a 24 lět njedaloko bayerskeho Obergünzburga. 19lětneho dyrbjachu zranjeneho w chorowni zastarać. Po prěnich dopó­znaćach bě wosobowe awto njedźelu rano­ tak połne, zo dyrbještaj mužej, kotrajž­ chcyštaj z awtostopom sobu jěć, do wotewrjeneje kófroweje rumnosće zalězć.­ Jako šofer raznje pospěši, padny­štaj wonaj na asfalt. Awto je dale jěło. Policija nětko swědkow pyta.

Sta litrow jabłukoweho sirupa zhubiło je wčera nakładne awto w Frankfurće nad Mohanom. Na lěpjatej maćiznje so wjacore motorske, mopedy a kolesa wobsunychu a znjezbožichu. Tank ze sirupom měješe dźěru. Hakle po pjeć kilometrach Lkw zasta. Wohnjowi wobor­nicy dźěru zapłatachu. Sirup na dróze dyrbjachu z wodu wotmyć.

Mainz (B/SN). Biskop diecezy Mainz Peter­ Kohlgraf chce so přichodnje sobu za to zasadźeć, zo smědźa žónske při zakładnych rozsudach na wšěch runinach biskopstwa sobu rěčeć a mužam runo­stajeni być. Na digitalnej konferency je wón z 260 žónskich dwanaće do wose­biteje skupiny wuzwolił. Komisija je na dwě lěće wuzwolena. Biskop Kohlgraf na zhro­madźiznje wu­zběhny: „Njeru­no­stajenje žonow je cyłotowaršnostny problem. Myslu sej, zo mamy šansu, we wosebitych wobłukach stać so z doprěd­karjemi w Němskej a na cyłym swěće.“ Dušepastyrski decernent z Mainza Hans Jürgen Dörr zwurazni, zo „trjeba cyrkej na kóždy pad zhladowanje žonow na wšelke zjawy a jich zamołwity angažement na wšěch runinach.“

Namrěwcy Bycanca