Cambridge (dpa/SN). Z jara emocionalnej narěču na elitnej uniwersiće Harvard w USA je so zwjazkowa kanclerka Angela Merkel (CDU) za mjezynarodne zhromadne dźěło a mjezsobny respekt zasadźiła a so zdobom raznje wot prezidenta USA Donalda Trumpa wotmjezowała, byrnjež jeho ani jónu z mjenom njemjenowała. „Změny na dobro su móžne, hdyž so zhromadnje na nje zwažimy“, Merkel wčera w swojej stajnje zaso wot přikleska a wyskanja přetorhnjenej narěči absolwentam sławneje wysokeje šule zwurazni. Wona napominaše murje we hłowach potorhać, ignorancu přewinyć, demokratiju zakitować a swědomiće z wěrnosću wobchadźeć. „Bóle hač hdy do toho dyrbimy multilateralnje a nic unilateralnje myslić a jednać“, rjekny Merkel pod wyskom 20 000 absolwentow. Jednać měli globalnje město nacionalnje, swětej wotewrjenje město izolacionistisce, zhromadnje města sami. „K tomu słuša, zo njemjenujemy łžě wěrnosće a wěrnosće łžě.“

Kijew (dpa/SN). Prěnja wukrajna jězba powjedźe noweho ukrainskeho prezidenta Wolodimira Zelenskeho přichodny tydźeń do Brüssela. Planowane su wutoru a srjedu mjez druhim zetkanja z prezidentom Rady EU Donaldom Tuskom, ze šefom komisije EU Jeanom-Claudeom Junckerom a z generalnym sekretarom NATO Jensom Stoltenbergom, zdźěla prezidialny zarjad w Kijewje. Hłowna tema maja wěstotne połoženje na wuchodnej Ukrainje a reformy być. Zapadej přichileny politikar bě před tydźenjom zastojnstwo nastupił. Hižo we wólbnym boju bě Zelenskij přilubił, so runje tak kaž jeho předchadnik Petro Porošenko wo čłonstwo bywšeje sowjetskeje republiki w EU a NATO zasadźeć. Po namócnym powalenju bywšeho woleneho ruskej přichileneho prezidenta Wiktora Janukowiča, přewodźanym wot krawnych protestow z dźesatkami mortwych, je so Ukraina Europskej uniji přiwobroćiła a so wot tradicionalneho partnera Ruskeje dźěliła. Přiswojenja čornomórskeje połkupy Krim přez Rusku a wójny na wuchodźe Ukrainy dla wobdźěla so Kijew na sankcijach přećiwo Ruskej.

Wóslika z juchoweje jamy wuswobodźili su wohnjowi wobornicy w awstralskim Morayfieldźe njedaloko Brisbane na wuchodnym pobrjohu. Pjeć lět stare skoćo bě so přełamało a steješe hač k šiji w njerjedźe. W hodźiny trajacej akciji wobornicy jamu wuklumpachu a wóslika skónčnje wuzběhnychu. Tón je akciju derje přetrał. Jeho myć pak wobornicy wotpokazachu a přewostajichu to wobsedźerjej.

Wosrjedź wučby w bayerskim Weidenje je mać dwanaćelětneho šulerja wučerku nadběhowała. Nimo toho muž, kiž mać přewodźeše, 24lětnu wučerku plisto­waše. Hólc njebě swoje nadawki spjelnił a bě za to porok dóstał. Z mobilnym telefonom zawoła wón swoju mać, kotraž hnydom přińdźe. 41lětna wučerku naswari a storkaše do njeje, zo dyrbjachu ju ambulantnje zastarać. Policija přećiwo maćeri a jeje partnerej nětko přepytuje.

Podstupim (dpa/SN). Z prokom a kłokom na dźiwje swinje třěleć chcedźa wot junija w gmejnomaj Stahnsdorf a Kleinmachnow we wokrjesu Podstupim-Srjedźna marka. Wotpowědne dowolnosće nimale wšitke předleža, zdźěli rěčnik wobswětoweho ministerstwa w Podstupimje. Gmejnje bědźitej so hižo lěta z dźiwimi swinjemi, kotrež po wsach ćahaja, zahrodki zapusćeja a wobchadne njezboža zawinuja. Hońtwy z třělbami njejsu dotal prawy wuspěch wunjesli. Prok a kłok hodźitej so nimo toho tež w bydlenskich štwórćach lěpje wužiwać.

Němska njeatraktiwna

Berlin (dpa/SN). Wulce kwalifikowanym dźěławym z wukraja njeje Němska najatraktiwniši kraj. To wujewja přepytowanje Organizacija za hospodarske zhromadne dźěło a wuwiće OECD, kotruž su dźensa w Berlinje předstajili. Awtorojo zwěsćeja, zo zaběra Němska na lisćinje atraktiwnych krajow za fachowcow z masterskim wotzamknjenjom abo doktorskim titulom jenož dwanate městno. Na prěnim městnje steji Awstralska, za njej Šwedska a Šwicarska.

Chorownju nadpadnyli