To a tamne (03.08.21)
Z awtom nana na hrajkanišćo jěł je dźewjećlětny hólčec w Frankfurće nad Mohanom. Jězba skónči so po 50 metrach, jako wón do parkowaceho awta prasny. Štyri lěta młódši bratr sedźeše na pódlanskim sydle. Kak běštaj hólcaj ke klučikej awta z awtomatiskej kolesynu přišłoj, chce policija hišće zwěsćić. Při zražce so na zbožo nichtó njezrani. Wěcna škoda wučinja přiwšěm wjacore tysacy eurow. Nan móžeše swojeju synow hišće na městnje njezboža přewzać.
Wopity šofer je na zwjazkowej dróze pola Schwerina ze swojim busom do małotransportera zrazył a jón z dróhi storčił. Transporter so přećisny a ležeše skónčnje na třěše. Jeho 53lětna wodźerka so na noze zrani. Pola 38lětneho šofera linijoweho busa naměri policija něšto wjace hač promil alkohola w kreji. Jězbnu dowolnosć jemu nablaku sćaza.
Přewodźeja olympionikow
Tokio (B/SN). Přiběracych padow korony dla poskićeja němskim sportowcam na olympiskich hrach w Tokiju ekumeniske dušepastyrske słužby, zdźěli zamołwity teologa Thomas Weber ewangelskej powěsćerni epd. Nutrnosće wuhotuje wón zhromadnje z olympiskej zamołwitej za dušepastyrstwo Němskeje biskopskeje konferency Elisabeth Keilmann a ze zamołwitym za wobdźělnikow paralympiskich hrow Christianom Bode. Nimo toho dušepastyrjo olympionikam zmóžnjeja, jich kóždy čas zazwonić abo so přez widejo z nimi skontaktować.
Bjez biskopskeje swjećizny
Lauterbach: Dźěći šćěpić
Berlin (dpa/SN). Strowotniski fachowc SPD Karl Lauterbach ma šćěpjenje dźěći přećiwo koronawirusej wot dwanaće lět za přiměrjene. Najwažniše přepytowanja pokazuja, zo je šćěpjenje wunošniše hač čakanje na to, zo su wšitcy infekciju přetrali, rjekny Lauterbach do dźensnišeho wuradźowanja strowotniskich ministrow zwjazkowych krajow. Stajna šćěpjenska komisija poruča šćěpjenje dotal jeno za dźěći a młodostnych z wěstymi předschorjenjemi.
Skorži diskriminacije dla
Berlin (dpa/SN). Předsyda Centralneje rady němskich Sintow a Romow Romani Rose zwěsća diskriminaciju a potłóčowanje přisłušnikow ludoweje skupiny w mnohich čłonskich krajach EU. „Sintojo a Romojo měli runoprawnje w swojich domizniskich krajach bydlić směć, z móžnosćemi dźěła a kubłanja, rjekny Rose nowinarjam składnostnje dźensnišeho wopominanja holocausta na Sintach a Romach. „Njesměmy žanu apartheid před swojimi durjemi ćerpjeć.“
Zaso z nahubnikom
Runje hišće na přistawny mosćik wuchować móžachu so tući ...
Ambrozijaje dołhodobny problem
Wünsdorf (dpa/SN). Wutorhać, wotsyc abo z 85 stopnjow horcej wodu poleć: W Braniborskej spytaja ludźo z najwšelakorišimi metodami wupřestrěću ambrozije zadźěwać. Rostlina wuskutkuje alergije a astmu. Potrjechenych je něhdźe 500 kilometrow płoniny podłu dróhow kaž tež něhdźe 5 000 hektarow ratarskeje přestrjenje, zdźěli na naprašowanje braniborski zarjad za krajne wuwiće, ratarstwo a noworjadowanje zahonow (LELF).
Samsnu situaciju mějachu w zwjazkowym kraju hižo před něšto lětami. „Ambrozija je dołhodobny problem“, wuswětla koordinator LELF za bój přećiwo ambroziji Matthias Hoffmann. Rostlina wupada kaž njerodź, je pak chětro agresiwna. Hižo małe mnóstwa kćenjoweho próška móža strašne strowotne reakcije wuwabić. Tež ludźo, kotřiž žane alergije nimaja, móža ćeže dóstać. Dalši wulki problem je, zo rostlina wot julija hač do prěnich zmjerzkow kćěje.
Söder: Spodźiwny wólbny bój
Nürnberg/Berlin (dpa/SN). Unija je po słowach předsydy CSU Markusa Södera swojeho pasiwneho wólbneho boja dla sama wina na woteběracej nahladnosći mjez wolerjemi. Kaž w kopańcy je trjeba „cyle jednorje raz sam nadběhować a ofensiwu wuwiwać“, rjekny bayerski ministerski prezident wčera w rozmołwje z telewiziju ZDF. W najnowšich woprašowanjach docpěwa unija CDU/CSU runje hišće 27 do 28 procentow. Minjeny čas bě wona wjace hač 30 procentow měła.
Markus Söder potwjerdźi, zo wočakuje we wólbnym boju přichodne tydźenje agresiwnišu strategiju. „Ta dyrbi so nětko wuwiwać.“ Po jeho posudku njeje žanych wobsahowych diferencow z kanclerskim kandidatom unije Arminom Laschetom. „Smój sej přezjednaj, zo trjebamy nětko wjetšu spěšnosć a power.“ Söder so starosći, zo so „spodźiwny wólbny bój“ CDU/CSU dale wjedźe a zo njebudźe unija po wólbach zwjazkoweho sejma sylna dosć knježerstwo wutworić móc.
To a tamne (02.08.21)
Lockdowna dla je Awstralčanka na loterijowy lisćik zabyła a hakle po dwěmaj tydźenjomaj pytnyła, zo je milionarka. Ličby běchu hižo 21. julija wulosowali. „Lockdowna dla pak njejsym lisćik scyła kontrolowała.“ Jako so skónčnje na lisćik dohlada, dyrbješe zwěsćić, zo je milion awstralskich dolarow (618 000 eurow) dobyła. Z pjenjezami chce najprjedy swój dom wotpłaćić a potom dowol planować.
W nutřkownych rumnosćach awtodróhoweho mosta je policija technoparty rozpušćiła. Wobydlerjo sewjerorynsko-westfalskeho Engelskirchena běchu so nócneje hary dla hóršili. Policisća zwěsćichu, zo přińdźe hara z katakombow mosta. Tam bě wšitko profesionalnje wuhotowane: bara, hudźbna připrawa ze swěcu a milinowymi agregatami. 20lětny bě w socialnych syćach na party přeprosył. Jako zastojnicy přijědźechu, bě so hižo 20 ludźi zhromadźiło. Tež dalšich sto hosći, kotřiž hišće přijědźechu, je policija domoj pósłała. Rozpušćena bu party na kóncu kaženja domoweho porjada dla.
Šćěpjenja mytować
Washington (dpa/SN). Zo móhli šćěpjensku kwotu w USA polěpšić, žada sej prezident Joe Biden mytowanje we wobjimje 100 dolarow, štož wotpowěduje 85 euram. Zwjazkowe kraje, wobwody a komuny měli srědki z konjunkturneho paketa z měrca wužiwać, zdźěli wčera financne ministerstwo USA. Pjenjezy měli ludźi wabić, so šćěpić dać a tak towaršnosć škitać a žiwjenje ludźi wuchować. Ministerstwo pak je nimo toho zwólniwe, krajne knježerstwa při zwoprawdźenju podpěrać.
Čakaja na analyzu
Leverkusen (dpa/SN). Tři dny po njezbožu w Leverkusenje liča tam nuznje z wuslědkom wobswětoweje analyzy, kotruž sewjernorynsko-westfalski wobswětowy zarjad zdźěłuje. Po eksploziji w chemijowym parku su so tanki palili, hdźež składowachu organiske maćizny. Tuž so fachowcy starosća, zo su so jědojte srědki do powětra dóstali. Měšćanski zarjad je ludźi warnował, sad a zeleninu ze swójskeje zahrody jěsć, jeli su płody zapróšene.
Wot poćeženjow so zhrabali
