Woidke: Połoženje dramatiske
Braniborska přiwótřa wot jutřišeho naprawy korony dla
Podstupim (dpa/SN). Wot jutřišeho płaća tež w Braniborskej krućiše wobmjezowanja koronapandemije dla. Knježerstwo SPD, CDU a Zelenych je wčera wotpowědne naprawy wobzamknyło. K nim słušeja zakaz, w nocy mjez 22 a 5 hodź. dom wopušćić, zawrjene wobchody nimo tych za wšědne zastaranje a zakaz silwesterskich praskotakow na centralnych městnach. Ministerski prezident Dietmar Woidke (SPD) rěčeše wo hłubokich zasahach. „Połoženje w Braniborskej je dramatiske.“ Wón pak ludźi namołwja naprawy akceptować a so po nich měć. Nowe prawidła płaća najprjedy raz hač do 10. januara. Wot jutřišeho smědźa wobydlerjo Braniborskeje jenož hišće dom wopušćić, hdyž dyrbja na dźěło, nakupować, do šule a pěstowarnje, k lěkarjej abo na zarjady. W nocy mjez dźesaćich a pjećich stej tež wuchodźowanje abo sport zwonka domu zakazanej. Wuwzaća su hody a silwester. Alkohol wostanje w zjawnosći zakazany. Policija a porjadniske zarjady chcedźa dodźerženje prawidłow kontrolować, warnowaše nutřkowny minister Michael Stübgen (CDU).
Naprawy wirusa dla přiwótřene
Drježdźany (dpa/SN). Sakska so planowanym cyłoněmskim rjadowanjam přećiwo rozšěrjenju koronawirusa přizamknje a swoje wobmjezowanja na krajnej runinje přiwótřa. Tak dyrbja wot jutřišeho w swobodnym staće tež frizerske salony zawrjene wostać, kaž hospodarske ministerstwo w Drježdźanach zdźěli. Dotal běchu salony wot zawrjenjow wuwzate byli. „Wěmy, zo sej hižo płaćiwe a planowane wobmjezowanja wot rjemjesła, wikowanja a kóždeho jednotliweho wobydlerja wjele mocy a sćerpnosće žadaja“, pisa hospodarski minister Martin Dulig (SPD) w zdźělence. „Najwažniše pak nětko je, žiwjenje wuchować a dźěłakmanosć strowotniskeho systema zaručić. To je w dźělach Sakskeje mjeztym jara wobćežne.“ Tak su wot 16. decembra hač do 10. januara 2021 „njetrjebawše ćěłu bliske posłužby zakazane“.
Tež hodowne rjadowanja w Sakskej dale přiwótřa, statna kenclija informuje. Dotal bě předwidźane, zo smě so přez hodowne swjate dny dźesać wosobow zetkać. Nětko smědźa so jenož hišće štyri wosoby z najwušeho swójbneho kruha swójskej domjacnosći přidružić.
To a tamne (15.12.20)
Dyrdomdejskeje jězby z jetskijom na britisku kupu Isle of Man dla dyrbi muž wjacore tydźenje do jastwa. 28lětneho su zajeli, dokelž njeje koronaprawidła zańč měł. Muž jědźeše kónc tydźenja ze Šotiskeje ze swojim motorizowanym nastrojom na kupu, zo by tam swoju přećelku wopytał. Za něhdźe 40 kilometrow dołhu čaru přez morjo trjebaše wón dobre štyri hodźiny. Jeho próstwa, legalnje ze Šotiskeje přijěć směć, bu do toho wotpokazana.
Pjany 14lětny je w Słowakskej z awtom jěł a znjezbožił. Při wotbočenju na křižowanišću we wuchodosłowakskim měsće Dobšiná zrazy wón do domu a wobškodźi fasadu, a to z 1,5 promilemi alkohola w kreji. Hólcej hrozy nětko sudniske jednanje jězdźenja bjez jězbneje dowolnosće a wodźenja awta pod wliwom alkohola dla. Kak je k awtowemu klučikej přišoł, nochcyše wón policiji přeradźić.
Bamž kardinalow powołał
Rom (B/SN). Prěni króć w stawiznach je bamž Franciskus dweju duchowneju přez internet za kardinalow powołał. Dokelž njemóžeštaj biskopaj Cornelius Sim z Bruneija a Jose Fuerte Advincula z Filipinow koronapandemije dla do Roma přijěć, wobdźělištaj so wobaj přez widejo na Božej mši. Biret, kardinalski pjeršćeń a pomjenowanske wuswědčenje na kardinala přepodaštaj jimaj wotpowědnaj zastupjerjej Vatikana. Nimo mjenowaneju je Franciskus w Pětrowej cyrkwi jědnaće dalšich muži na kardinalow powyšił. Cyłkownje pomjenowa wón z dotal 95 najwjace kardinalow, Jan Pawoł II. porno tomu w 26 lětach skutkowanja jako pontifeks jenož 65 a Benedikt XVI. štyrjoch wjace. Z tuchwilnych 229 kardinalow ma jeno 128 prawo, bamža wolić.
Kritizuja znjewužiwanje křiža
Memorandum z awgusta 1990 wulkotny pokład
Čłonojo Serbskeho sejma su napjateho połoženja koronapandemije dla swoje poslednje zetkanje lěta 2020 minjenu sobotu jako widejokonferencu wotměli.
Budyšin/Njebjelčicy (SN/at). Ćežišćowa tema wuradźowanja bě znowa naćisk statneho zrěčenja mjez Zwjazkowej republiku Němskej, Swobodnym statom Sakskej a krajom Braniborskej ze serbskim ludom. Do toho zaběrachu so z rozprawami wo rozmołwach z biosferowym rezerwatom Hornjołužiska hola a haty, wo postupje, serbske zajimy w sakskim koaliciskim zrěčenju zeskutkownić, a wo zapodatej próstwje Załožbje za serbski lud, zo by jednaćelnju sejma financowała. Wo tym Serbski sejm informuje.
Sejmar Hajko Kozel staji naćisk statneho zrěčenja do zwiska ze swojim bywšim skutkowanjom jako zapósłanc: „Naše prócowanja, sakski serbski zakoń wobnowić, buchu dotal blokowane.“ Kozel zwěsći, zo su so město toho „wo wjele wjetše durje wočinili“. Tohodla wón statnemu zrěčenju přicpěwa, zo wone „móžnosće na jedyn zwjazkowy kraj wobmjezowaneho serbskeho zakonja daloko přesahuje“.
Rozsudźa wo zjězdźe CDU
Berlin (dpa/SN). Nawodnistwo CDU chcyše dźensa rozsudźić, kak měli za srjedź januara planowany zjězd strony k wuzwolenju noweho předsydy wotměć. Generalny sekretar Paul Ziemiak je za to wjacore móžnosće zdźěłał, wot dospołneho digitalneho zjězda hač k hybridnemu schadźowanju, na kotrymž móhło so 1 000 delegatow na wjacorych městnosćach kraja zeńć. Wo zastojnstwo předsydy prócuja so Friedrich Merz, Armin Laschet a Norbert Röttgen.
Kretschmer hody bjez kemšow
Drježdźany (dpa/SN). Sakski ministerski prezident Michael Kretschmer (CDU) njepóńdźe lětsa Božu nóc kemši – prěni króć w swojim žiwjenju. „Dołhož móžu myslić a pod wšěmi wobstejnosćemi sym hody do cyrkwje šoł“, rjekny wón powěsćerni dpa. Samo jako student je jenož kemšow dla do Zhorjelca a po tym zaso wróćo do Drježdźan jěł. Koronakrizy dla pak wostanje wón doma. Na jeho wěrje to ničo njezměni. „Marija a Józef běštaj Božu nóc z Jězusom tež samaj.“
Wuzwola prezidenta USA
Spektakularny wuspěch přećiwo ilegalnemu wikowanju z brónjemi je ...
Strowotnistwo wosebje wohrožene
Glasgow (dpa/SN). Strach, na koronawirus schorjeć, je mjez lěkarjemi, hladarjemi a wuchowanskimi sanitetarjemi wosebje wulki, rěka wuslědk přepytowanja britiskich wědomostnikow. We Wulkej Britaniskej je kwota schorjenja mjez mjenowanymi powołanjemi wo sydom króć wjetša hač w druhich powołanskich skupinach, su epidemiologojo Glasgowskeje uniwersity zwěsćili.
Swětowa strowotniska organizacija bě hižo w septembru rozprawjała, zo su wot 14 procentow wšitkich přizjewjenych koronainfekcijow po wšěm swěće sobudźěłaćerjo strowotniskich powołanjow potrjecheni. W někotrych krajach wučinja kwota samo 35 procentow, byrnjež podźěl tychle powołanjow hladajo na cyłe wobydlerstwo mjenje hač tři procenty wučinjał.
Analyza britiskich wědomostnikow so k mjenowanym ličbam hodźi. Woni wužiwachu mjez druhim britisku biobanku, wobsahowacu daty poł miliona ludźi kaž tež daty, kotrež běchu za čas prěnjeje žołmy koronapandemije zběrali.
„Přińdu zaso lěpše časy“
Wot srjedy cyłoněmske wobmjezowanja – w Sakskej wot dźensnišeho
Berlin (dpa/SN). Razne wobmjezowanja zjawneho žiwjenja koronawirusa dla wot srjedy změja widźomne wuskutki na nutřkowne města. Wo tym je hłowny jednaćel zwjazka městow Němskeje Helmut Dedy přeswědčeny. Problemy wobchodnikow w nutřkownych městach su starše hač koronawirus, lětsa su pak wosebje razne, rjekny Dedy powěsćerni dpa. „Tuž so prašenje ćim chutnišo staja, kak móhli nutřkowne města atraktiwniše sčinić. Z debatu dyrbimy w nowym lěće ze wšěmi wobdźělenymi pokročować. Najwažniša je nětko pjenježna pomoc Zwjazka a krajow. Wona dyrbi potrjechenych spěšnje docpěć.“
FDP kritizuje přihoty šćěpjenja
Nürnberg (dpa/SN). Zwjazkowy minister za strowotnistwo Jens Spahn (CDU) je sej wěsty, zo dawa serum přećiwo koronawirusej „perspektiwu na normalitu w druhej połojcy přichodneho lěta“. Za to zarjaduja 400 šćěpjenskich centrumow.
Porno tomu FDP kritizuje, zo je zwjazkowe knježerstwo přihoty w zwisku ze šćěpjenskimi srjedźišćemi zaspało. „Hižo měsacy słyšimy z kanclerskeho zarjada a wot ministerskich prezidentow, zo liča w zymje z nowej žołmu koronainfekcijow a zo chcedźa potom wobydlerjow šćěpić započeć“, rjekny zastupowacy předsyda frakcije FDP w zwjazkowym sejmje Stephan Thomae powěsćerni dpa. Hižo dawno by móžno było prózdne wjacezaměrowe hale jako šćěpjenske centrumy zarjadować a personal wotpowědnje wukubłać. To njeje so zdźěla scyła hišće stało abo přepozdźe, nutřkowny politikar šwika.
Njedostatki su w tym nastupanju runje tak wulke kaž w šulach Thomae rjekny. Tam bychu lětnje prózdniny wužić móhli, přewětrjenske nastroje zatwarić a wučerjow dale kubłać, kotřiž maja ćeže z internetnej šulskej wučbu.
