Wučbnu maćiznu nachwatać
Berlin (dpa/SN). Zwjazkowe knježerstwo je dźensa program schwaliło, z kotrymž móža dźěći a młodostni wučbnu maćiznu nachwatać. Z fondsa dweju miliardow eurow chcedźa přidatnu pomocnu wučbu a socialne naprawy financować, zo bychu negatiwnym wuskutkam koronakrizy dla zadźěwali. Šulska wučba a wólnočasne poskitki su hižo cyłe lěto jara wobmjezowane abo so docyła njewotměwaja.
Weidel a Chrupalla nastupitaj
Berlin (dpa/SN). Frakciska předsydka AfD w zwjazkowym sejmje Alice Weidel chce swoju stronu jako načolna kandidatka do wólbneho boja za zwjazkowy sejm wjesć. Zhromadnje z njej chcyše so stronski předsyda Tino Chrupalla za načolnu dwójku přizjewić, zdźěli Weidel wčera wječor w sćelaku ZDF. AfD bě wobzamknyła, móžnu načolnu dwójku hač do dźensnišeho připołdnja přizjewić. Doskónčnje rozsudźić maja čłonojo strony.
Dalša pomoc za Indisku
Z poslednimi wobrjadami rozžohnuje so muž wot swojeho na koronawirus ...
Minister Günther: Kónc brunicyhižo do lěta 2038
Drježdźany (dpa/SN). Po najnowšim wusudźe Zwjazkoweho wustawoweho sudnistwa nastupajo škit klimy liči sakski minister za energiju a wobswět Wolfram Günther (Zeleni) z jasnje dočasnym kóncom zmilinjenja brunicy. „Pod nowymi ramikowymi wuměnjenjemi dale na terminje skónčenja zmilinjenja brunicy 2038 wobstawać, kaž to wjacori zwjazkowi politikarjo činja, je swětacuze“, rjekny Günther nowinarjam. Njeje trjeba so wo politisce postajenym terminje kónca brunicy wadźić, wobswětowy minister zwurazni. „Milina z wětřika a słónca je na wikach hižo nětko najtuńša. To čini wudobywanje a zmilinjenje brunicy dale a njerentabelniše. Přidatna płaćizna za wuhlikowy dioksid ćišć na klimje škodźace wudobywanje miliny dale zesylnja.“
Podobnje widźi to saksko-anhaltska wobswětowa ministerka Claudia Dalbert (Zeleni): „Čim prjedy zmilinjenje brunicy skónčimy, ćim lěpje. Runočasnje dyrbimy wudobywanje miliny z wětrnikow a solarnych připrawow masiwnje rozšěrić“, Dalbert potwjerdźi.
Planuja wolóženja za šćěpjenych
Berlin/Drježdźany (dpa/SN). Zwjazkowe knježerstwo chce wobmjezowanja koronawirusa dla za dospołnje šćěpjenych a wustrowjenych spěšnje zběhnyć. Wotpowědne rjadowanje je kabinet wčera schwalił, zdźěli justicna ministerka Christine Lambrecht (SPD). Sćazane zakładne prawa, kaž wobmjezowanje kontaktow a zakaz dom wopušćić, dyrbja ludźom zaso wróćić. Hižo tutón tydźeń chcetej zwjazkowy sejm a Zwjazkowa rada doskónčnje wo tym rozsudźić. „Je to wažna kročel k normaliće“, rjekny Lambrecht. Su-li naprawy schwalene, móhli wone hižo kónc tydźenja płaćiwe być.
Sakska chce dospołnje šćěpjenych a wustrowjenych wot 10. meje runje tak wobjednać kaž negatiwnje testowanych. To je socialna ministerka Petra Köpping (SPD) připowědźiła. Z tym zwjazane su wotewrjenja we wonkownej gastronomiji a w turistiskim wobłuku.
To a tamne (05.05.21)
Model Würzburgskeje katedrale natwarił je muž w bayerskim Kitzingenje – a to z 2,5 milionami lego-klockow. 72lětny Reinhold Dukat je poł lěta wšědnje dźesać hodźin na nim dźěłał, tež njedźelu. Dohromady je to 1 800 dźěłowych hodźin. Planował bě Dukat swoje předewzaće cyłe lěto. Tak je stajnje zaso ke katedrali jězdźił a wšitke nadrobnosće dokumentował. Nastała je tři metry dołha a tři metry šěroka podobizna cyrkwje.
Dospołnje ze złoćanej foliju polěpjene sportowe awto je policija w Drježdźanach sćazała. Po měnjenju fachowcow njebě folije dla wobchadna wěstota hižo zaručena, dokelž móhli druzy šoferojo chětro slepjeni być. Nimo toho běchu wšitke wokna a swětłomjetaki z čornej foliju zakryte, štož je zakazane. 29lětny šofer dyrbi nětko kóšty wotwlečenja, posudka kaž tež pjenježnu pokutu płaćić.
Dźak lěkarjam a hladarjam
Berlin (dpa/SN). Zwjazkowa kanclerka Angela Merkel (CDU) dźakuje so lěkarjam a hladarjam za jich „njesprócniwe zasadźenje“ w koronakrizy. Woni činja wšitko, zo bychu tež w třećej žołmje koronapandemije pacientow testowali a šćěpili. To rjekny Merkel w postrownym poselstwje k zahajenju zjězda lěkarjow Němskeje. Po wudyrjenju krizy lěkarjo internetnje wuradźuja, po tym zo bě zjězd loni wupadnył. Poprawom chcychu jón w Rostocku přewjesć.
Minister wolóženy
Wiesbaden (dpa/SN). Po zajeću pozdatneho spisarja prawicarskoekstremnych hroženjow z podpismom „NSU 2.0“ ma hessenski nutřkowny minister Peter Beuth (CDU) po dotalnych dopóznaćach hessensku policiju za wuwinowanu. Hroženja běchu podhlad zbudźili, zo pochadźa spisar z rjadow policije. Nětko pak su 53lětneho bjezdźěłneho w Berlinje zajeli. Wón bě wot awgusta 2018 mejlki z ranjacym a hrožacym prawicarskim wobsahom po wšej Němskej rozesłał.
Wuradźuja wo konfliktach
Znajmjeńša 20 ludźi je minjenu nóc žiwjenje přisadźiło, po tym ...
Madźarski parlament podpěruje MSPI
Budapest (SN/JaW). Madźarski parlament je so minjeny tydźeń nimale jednohłósnje za to wuprajił, wobydlersku iniciatiwu Federalistiskeje unije europskich narodnych mjeńšin (FUEN) Minority SafePack (MSPI) podpěrać.
Kaž FUEN w nowinskej zdźělence piše, je 157 zapósłancow za rezoluciju hłosowało, jenički přećiwo njej. W dokumenće nimo wudobyćow iniciatiwy tohorunja wuzběhuja, zo bě ju wjac hač jedyn milion ludźi podpisało a zo je Europski parlament rezoluciju wobzamknył. „Parlament je hłuboko přesłapjeny, zo je komisija EU přećiwo woli z wulkej wjetšinu přiwzate wobzamknjenje EU-parlamenta za Minority SafePack iniciatiwu cyłotnje wotpokazała. Tak jenož měnjenje Europskeho parlamenta njeignoruje, ale tež wolu wobydlerjow Europy zańč nima“, cituje FUEN z wobzamknjenja.
Dale je parlament w Budapesće připowědźił, madźarske zhromadźenstwa we wukraju kaž tež narodne mjeńšiny, kotrež wšak wučinjeja nimale dźesać procentow wobydlerstwa EU, dale podpěrać.
Olaf Scholz dale optimistiski
Berlin (dpa/SN). Najebać poměrnje špatne wuslědki naprašowanjow je kanclerski kandidat SPD Olaf Scholz nastupajo wólby zwjazkoweho sejma dale optimistiski. „Jedne z wuměnjenjow je hižo spjelnjene. CDU a CSU wěstej, zo njezmějetej wjace hač 30 procentow. Móžemy tuž z wuslědkom w hornim wobłuku 20 procentow tež přichodne knježerstwo nawjedować“, rjekny zwjazkowy financny minister wčera wječor w sćelaku ZDF.
SPD ma po słowach Olafa Scholza „prawe namjety“, kak měło w Němskej dale hić. „Tohodla wěrimy, zo budźemy wuspěšni.“ Strona je so tuž jara wědomje za to rozsudźiła, kanclerskeho kandidata zahe nominować, hinak su to unija a Zeleni činili. SPD ma w aktualnych naprašowanjach něhdźe 15 procentow hłosow wolerjow. Naposledk běchu Zeleni jasnje sylniši. Scholz je sej přiwšěm wěsty, zo móže strona we wólbnym boju zastatk nachwatać. Swoje nazhonjenja w knježerstwje ma wón za wosobinsku lěpšinu – zhromadnje „z prawej wutrobu“ a jasnym planom do přichoda.
Wolóženja hišće tutón tydźeń
Zwjazkowe knježerstwo planuje rjadowanja za šćěpjenych a wustrowjenych
Berlin (dpa/SN). Po wšej Němskej płaćiwe zběhnjenje tuchwilnych wobmjezowanjow swobody za dospołnje šćěpjenych chcedźa hišće tutón tydźeń wobzamknyć. CDU/CSU a SPD su so po informacijach powěsćernje dpa wčera na to dorozumili, wotpowědne změny zajutřišim, štwórtk, w zwjazkowym sejmje a pjatk w Zwjazkowej radźe wobzamknyć. To rěka, zo móhli wot soboty prěnje wolóženja za šćěpjenych a wustrowjenych płaćić. Nadźiju na bórzomne spěšne wolóženja w gastronomiji a turizmje pak zastupnicy knježerstwa zbudźili njejsu. Tež swjatkowny dowol je chětro njewěsty.
