Morjenych Židow wopominali
Tel Aviv (dpa/SN). W Israelu wopominachu dźensa šěsć milionow Židow, kotrychž běchu němscy nacionalsocialisća zhromadnje z pomocnikami za čas holocausta morili. Dopołdnja su po wšěm kraju sireny wuli. Šoferojo awtow zastachu a wulězechu. W centralnym wopomnišću Yad Vashem w Jerusalemje wotmě so wulka wopominanska swjatočnosć. Hižo wčera bě tam statny prezident Reuven Rivlin před nowym antisemitizmom warnował.
Wojakow w Maliju wopytała
Ouagadougou (dpa/SN). Druhi dźeń swojeho wopyta w zapadnej Africe wopyta němska kanclerka Angela Merkel (CDU) dźensa wojakow Zwjazkoweje wobory na sewjeru Malija, kotřiž su tam we wobłuku stabilizowaceje misije UNO Minusma zasadźeni. Wčera je so Angela Merkel z prezidentami pjeć krajow Sahelskeje kónčiny zetkała a jim podpěru při jich prócowanjach wo skónčenje wobydlerskeje wójny w Libyskej přilubiła.
Mortwaj při protestach
Wučerjo w Floridźe wobrónjeni
Na posudk zwonkastejacych wo Budyšinje wćipni byli
Budyšin (CS/SN). Wjace hač 200 ludźi je zawčerawšim, njedźelu, do Němsko-serbskeho ludoweho dźiwadła přišło, zo bychu nowy rjad zarjadowanjow „K wěcy Budyšin“ dožiwili, kotryž běštej dźiwadło a nowina Sächsische Zeitung do žiwjenja zwołałoj. Ludźo běchu wćipni, kak wědomostnicy połoženje w měsće nad Sprjewju posudźuja. Wot intendanta Lutza Hillmanna a lokalneho redaktora Ullija Schönbacha moderěrowane zarjadowanje wosta wěcowne, dokelž moderatoraj na prawym městnje zasahnyštaj a naprašowanja z publikuma wobmjezowaštaj. Zarjadowanje měješe nastorki na zakładźe posudka zwonkastejacych dawać.
Sociologa Sebastian Kurtenbach z Münstera, lětnik 1987, bě 2017 w Budyšinje 112 rozmołwow wjedł, mjez nimi 30 z ćěkancami. Přihladowarjam pak jenož přikłady ze stron ćěkancow předstaji. Tam mjez druhim skoržachu, zo běchu njeznaći žonam muslimske rubiško z hłowy torhnyli. Tež pomocnicy ćěkancow běchu wuprajili, zo ćerpja mobbinga dla. Wumjezowanje je potajkim w Budyšinje dźěl wšědneho dnja.
To a tamne (02.05.19)
Zhubjena móšeń je jeje wobsedźerce w Halle wulke mjerzanje wunjesła. Policisća běchu při durjach bydlenja klinkali, zo bychu žonje móšeń wróćili. Jako 19lětna durje wočini, čujachu zastojnicy wóń konopje a so za tym prašachu. Přećel 19lětneje so do rozmołwy tykaše a bu agresiwny. Zastojnicy dyrbjachu popjerjowy spray zasadźić. Test alkohola pola muža wunjese 2,2 promilej. W bydlenju namakachu policisća na to symjo a kćenja konopje.
Z lubosću hladane awta typa VW Käfer a VW Bulli su wčera w Hannoveru tysacy zajimcow přiwabili. Něhdźe 3 000 jězdźidłow bě na „zetkanju mejskich brukow“ widźeć. W srjedźišću lětušeho zetkanja steješe małotransporter „Fridolin“. Wot bywšeho awta listonošow je po wšěm swěće jenož hišće 200 eksemplarow. Někotre z nich běchu wustajene.
Mamy pozitiwne za region wuzbytkować
Kamjenc (SN/MiR). Něhdźe 200 zajimcow bě wčera wječor na „Saksku rozmołwu“ do Kamjenskeho Lessingoweho gymnazija přišło. Sakski ministerski prezident Michael Kretschmer (CDU) bě z čłonami kabineta a knježerstwa na rozmołwu přijjěł. „Rozmołwa słuži tomu, starosće a pokiwy wobydlerjow přiwzać a z toho wotwodźeć, štož je za přichod wažne. Budyski wokrjes so derje wuwiwa. W towaršnosći pak su při wšěm diskusije, kotrež mamy wobkedźbować“, rozłožowaše Budyski krajny rada Michael Harig (CDU). Ministerski prezident wuzběhowaše, kak wažne je, wsam a małym městam dać perspektiwu: „Region steji před wobšěrnej strukturnej změnu. Dyrbimy pozitiwne wuzbytkować a přichod z dobrymi idejemi wuhotować.“ Zapósłanc sakskeho krajneho sejma Alojs Mikławšk (CDU) rjekny: „Je wažne, hdyž so na politiskej runinje rozsudy tworja, zo je ludnosći rozkładźemy. Jenož tak čuje so wobydler do politiskeho postupowanja zawjazany. Mam za hódne znamjo, zo je sakske knježerstwo tež do Kamjenca přišło, do města, kotrež njeje runjewon najwjetše w kraju.“
Japanski kejžor wotstupił
Tokio (dpa/SN). Japanski kejžor Akihito je dźensa z wjacorymi ritualemi po 30 lětach wotstupił. Hižo lěta 2016 bě dźensa 85lětny připowědźił, zo chcył so woteběracych mocow dla zastojnstwa wzdać. Je to prěni króć po 200 lětach, zo monarch hišće za čas žiwjenja zastojnstwo naslědnikej přepoda. Najstarši syn kejžora, Naruhito, ma trón přewzać. Po japanskej wustawje nima kejžor žanu politisku móc. Wón je symbol jednoty kraja.
Trump skorži přećiwo bance
New York (dpa/SN). We zwadźe wo přepodaće financnych podłožkow je prezident USA Donald Trump zhromadnje ze swojimi dźěćimi Němsku banku kaž tež amerisku banku Capital One wobskoržił. Prezident a toho dźěći Donald jr., Eric a Ivanka chcedźa po tutym puću tomu zadźěwać, zo mjez druhim Němska banka financne podłožki komitejomaj kongresa USA přepoda. Demokraća w kongresu sej podłožki žadaja, dokelž chcedźa wědźeć, hač druhe kraje spytaja, politiku USA z pjenjezami wobwliwować.
Bolsonaro Maasa witał
Kabinet zwyšenje rentow wobzamknył
Berlin (dpa/SN). Zwjazkowe knježerstwo je dźensa zakład za dalše čujomne zwyšenje rentow połožił. K tomu su čłonojo kabineta wukaz socialneho ministerstwa k postajenju rentowych směrnicow wobzamknyli. Po tym maja dochody rentnarjow wo 3,18 procentow na zapadźe a wo 3,91 procent na wuchodźe Němskeje rozrosć. Niwow renty tak snadnje na 48,16 procentow přerěznych dochodow přiběra. Niwow wuchodnych rentow so wot 95,8 procentow na 96,5 procentow aktualneho stawa na zapadźe zwyši. Hłowna přičina za přirost je wuwiće mzdow, štož je zakład prawidłowneho awtomatiskeho wobličenja.
Kabinet je so tež z kóždolětnej rozprawu wo prócowanjach knježerstwa nastupajo kontrole brónjenja zaběrał. Po informacijach instituta Sipri su wudawki za brónjenje po wšěm swěće rekordny staw docpěli. Němska zaběra wosme městno.
Prěnje swjate woprawjenje přijeli
SPD žada sej k 1. meji wyše mzdy
Drježdźany (dpa/SN). Dźěłarniska rada sakskeje SPD je sej na předwječoru 1. meje lěpše tarifowe přiwjazanje předewzaćow a wjace zawodneho sobupostajowanja žadała. Niske mzdy a dlěše dźěłowe časy su njesprawne a njelěpšina za region w boju wo fachowcow za přichod, zdźěli krajny předsyda SPD Martin Dulig wčera w Drježdźanach při předstajenju swojeho dźesaćdypkoweho strategijoweho programa. „Hłowna přičina je po wšej Němskej najsłabša kwota po tarifje płaćacych předewzaćow w Sakskej. Tole dyrbimy nuznje změnić“, rjekny Dulig tež hladajo na to, zo drje w Sakskej w lěće 2030 něhdźe 300 000 dźěłowych mocow pobrachuje. Po informacijach Duliga dźěłaja ludźo w swobodnym staće dwaj tydźenjej dlěje, dóstawaja pak přerěznje 700 eurow brutto mjenje hač kolegojo na zapadźe. „Žadamy sej samsne pjenjezy za samsne dźěło.“ Tole je w swobodnym hospodarstwje jenož z wjace tarifowymi zrěčenjemi a sylnymi dźěłarnistwami a zawodnymi radami přesadźomne.
Dźěłarniska rada je forum zhromadneho dźěła krajneho nawodnistwa SPD a nawodow dźěłarnistwow.
To a tamne (30.04.19)
Horce pomfritki z ketchupom je pinčnik w badensko-württembergskim Müllheimje 22lětnej žonje mjezwoči ćisnył. Žona bě sej w hosćencu jědź skazała. Dokelž pak bě w lokalu wjele ludźi, dyrbješe wona 90 mjeńšin čakać. Mjeztym bě wona hosćenc skrótka wopušćiła a druhdźe pojědła. Jako pinčnik pomfritki skónčnje přinjese, žona wo nje hižo njerodźeše. Na to so wón rozłobi a jej taler z jědźu do mjezwoča stłóči.
Wopasanu wjelrybu su norwegscy rybarjo našli a wuswobodźili. Zwěrjo bě so dny dołho jich čołmej bližiło. Při tym wuhladachu mužojo pas wokoło žiwota ryby, při kotrymž bě kamera připrawjena. Tam namakachu tež napis „Pětrohród“. Prawdźepodobnje bě něchtó zwěrjo dresěrował a ze žratwu mytował. Tak hodźi so rozkłasć, čehodla je so ryba čołmej bližiła. Hač móže sama přežiwić, njewědźa.
