Woidke: Kóšty mrětwy dźělić
Podstupim (dpa/SN). Braniborski ministerski prezident Dietmar Woidke (SPD) žada sej w boju přećiwo afriskej swinjacej mrětwje kóšty dźělić. Tak měli Zwjazk a tamne kraje wotwobaranske naprawy sobu financować, zwurazni rěčnik knježerstwa Florian Engel do zetkanja ministerskich prezidentow zwjazkowych krajow. Knježerstwowi šefojo chcychu tam tež digitalizaciju, wottwar běrokratije a cyłodnjowske zastaranje dźěći zakładnych šulow wobrěčeć.
Dotal su w Braniborskej 182 inficěrowanych mortwych dźiwich swini zličili, w Sakskej wosom. Mjeztym su nowe groćane płoty natwarili, mjez druhim podłu mjezy k susodnej Pólskej. Kóšty za to maja najprjedy raz kraje zarunać.
Schulze za wobdźělenje ludźi
Berlin (dpa/SN). Do wuradźowanja tak mjenowaneho klimoweho kabineta je zwjazkowa ministerka za wobswět Svenja Schulze (SPD) wobdźělenje wobydlerjow při wutwarje wobnowjomnych energijow do srjedźišća stajiła. „Energijowa změna so jenož radźi, hdyž móžemy wšitcy sobu skutkować“, rjekny wona w rańšim magacinje telewizije ZDF. Rozsudne je, zo kóždy něšto z toho ma, hdyž so wobnowjomne energije wuwiwaja.“
Schulze so mjez druhim za to zasadźa, zo nastanje wjace „wobydlerskeje energije“, na přikład ze załoženjom drustwowych organizowanych energijowych předewzaćow. Dalša móžnosć by była milinu z třěchi twarjenjow podružnikam direktnje dodawać. Nic naposledk dyrbjał so wutwar wětroweje a solarneje energije dale pohonjeć, ministerka měni. Unija je wuwiće předołho haćiła. Klimowy kabinet so dźensa schadźuje.
Njesmilny přewodźer
To a tamne (02.12.20)
Sportowe črije z kože a pórclina móhli při přesadźowanju w New Yorku cyły milion dolarow wunjesć. Toho su sej zamołwići awkciskeho domu Sotheby‘s wěsći. Swoje poskitki za jónkrótny eksponat, kotryž běštej producent sportowych wudźěłkow Adidas a Mišnjanska pórclinowa manufaktura zhromadnje wuwiłoj, móža zajimcy hač do 16. decembra zapodać.
Wjacore kilogramy tykanca a wjace hač sto zapakowanych płodowych poprjancow su paduši z jedneje ze Stuttgartskich pěstowarnjow pokradnyli. Dotal nima policija žane pokiwy na to, zo běchu za dalšimi hódnotnymi wěcami pytali. Njeznaći běchu so minjeny kónc tydźenja z woknom do rumnosćow pěstowarnje zadobyli. Kak je so jim poradźiło wokno wočinić, njeje hišće znate. Što pakostnicy z telko tykancom chcedźa, policija a kubłarjo tohorunja njewědźa.
Mjenje ludźi w krótkodźěle
Nürnberg (dpa/SN). Ličba krótko dźěłacych w Němskej dale woteběra. W septembru běchu předewzaća za 2,22 milionaj ludźi krótkodźěło připowědźili, Zwjazkowa agentura za dźěło w Nürnbergu zdźěla. W awgusće bě jich hišće 2,55 milionow. Na wjeršku prěnjeje žołmy koronapademije w aprylu bě nimale šěsć milionow přistajenych w krótkodźěle było. Wosebje wulki bě a je podźěl krótko dźěłacych w gastronomiji.
Zarjady korony dla přećežene
Berlin (dpa/SN). Dale a wjace strowotniskich zarjadow w Němskej njemóže w tuchwilnej koronapandemiji swoje nadawki přećeženosće dla hižo spjelnić, dokelž su ličby nowych infekcijow dale wysoke. Něhdźe 60 z cyłkownje 400 strowotniskich zarjadow su Roberta Kochowemu institutej zdźělili, zo maja wulke ćeže, infekciske rjećazy wuslědźić a kontaktne wosoby zwěsćić. Mjeztym je 17 dalšich strowotniskich zarjadow připowědźiło, zo docpěja drje přichodnje mjezu wukonitosće.
Maas nadźija so pomocy USA
Ze swojimi traktorami su ratarjo wčera w Drježdźanach nutřkowne ...
Přenocowanje přez hody móžne
Altmaier: Pomoc njeje bjezkónčna
Spahn: Prěnje šćěpjenja w januaru
Berlin (dpa/SN). Zwjazkowy minister za strowotnistwo Jens Spahn (CDU) z toho wuchadźa, zo móža w januaru prěnich ludźi přećiwo koronawirusej šćěpić. „Naš zaměr je, zo hižo w januaru prěnje rizikowe skupiny a přistajenych hladarnjow šćěpimy“, rjekny Spahn dźensa w rozhłosowym sćelaku Deutschlandfunk. Wón na tym wobstawa, zo tež starych a chorych sobu jako prěnich šćěpja. Tak běchu to etikowa rada, Narodna wědomostna akademija Leopoldina a stajna šćěpjenska komisija doporučili.
Załožba za škit pacientow reagowaše zadźiwana na připowědźenje Spahna. Wona chcyła, zo słušeja sobudźěłaćerjo hladarnjow a na koronu schorjeni k prěnim, kotřiž serum dóstanu. Runje tak bě to njedawno tež zwjazkowa kanclerka Angela Merkel (CDU) připowědźiła.
W durinskim Hildburghausenje su dźensa prěni króć w Němskej masowu akciju k testowanju wšitkich pěstowarskich a šulskich dźěći kaž tež kubłarjow zahajili. Třećina wšěch pěstowarnjow a šulow chcyše so na akciji wobdźělić.
Tesla smě dalši lěs pušćić
Twarc elektroawtow z USA trjeba płoninu za twornju južnje Berlina
Grünheide (dpa/SN). Ameriski twarc elektroawtow Tesla smě za swoju planowanu fabriku w Grünheide juhowuchodnje Berlina dalše 82,3 hektary lěsa trjebić. Krajny wobswětowy zarjad Braniborskeje je jemu po informacijach wobswětoweho ministerstwa wčera dočasnu dowolnosć sposrědkował. Tesla trjeba płoninu po swójskim podaću jako składźišćo.
Dočasny započatk pušćenja wotpowěduje zakonjej za škit před emisijemi. Kaž z derje informowanych kruhow wuchadźa, je Tesla trěbnu płoninu wo 17 hektarow redukował. Při prěnim pušćenju běchu hižo 92 hektarow lěsa wotstronili. Tesla chce w swojej prěnjej europskej tworni přichodnje kóždolětnje 500 000 elektroawtow twarić. Šef předewzaća Elon Musk chce w Grünheide zdobom najwjetšu baterijowu fabriku swěta natwarić. Dotal nima Tesla hišće doskónčnu twarsku dowolnosć a je z dźělnymi přizwolenjemi na swójski riziko twarić započał. Přirodoškitarjo boja so negatiwnych sćěhow za wobswět.
