Přeńdźenja raznišo chłostać
Saarbrücken (dpa/SN). Wobchadni ministrojo zwjazkowych krajow chcedźa smalerjow, nuzowarjow a naduwakow w nadróžnym wobchadźe přichodnje raznišo chłostać. Tež na druhe přeńdźenja z „wosebitym potencialom wohroženja“ chcedźa z wyšimi pokutami reagować. To wuchadźa z naćiska wobzamknjenja, kotrež chcedźa jutře a pjatk na konferency wobchadnych ministrow w Saarbrückenje wobjednawać. K tomu słuša jězdźenje pod wliwom alkohola kaž tež wužiwanje mobilnych telefonow za wodźidłom. Razniše chłostanja maja „wottrašacy efekt“ měć a wěstotu na dróhach Němskeje powjetšić.
Ministrojo chcedźa po naćisku dźěłowu skupinu wutworić, kotraž ma so z tak mjenowanym „auto-posingom“ rozestajeć. Při tym dźe wo wupěranje ze sylnymi jězdźidłami, wo „bjezzmysłowe tam-a-sem-jězdźenje“ a wo „techniske naprawy we wobłuku tuninga“. Što móhli z toho jako delikty zastopnjować, ma so hišće rozjimać. Fakt pak je, zo su tajcy šoferojo-naduwacy w někotrych městach mjeztym chutny problem, na přikład w Mannheimje.
To a tamne (03.04.19)
Pjeršćenjej z porsta zemrěteje pokradnył je sobudźěłaćer kěrchowa w porynskim Oberhausenje. Dźowce 88lětneje běštej policiju wołałoj, jako mać na marach žane debjenki na ruce wjace njeměješe. Dokelž měješe jenož mało ludźi přistup do ćěłownje, móžachu spěšnje 30lětneho sobudźěłaćerja jako skućićela zwěsćić. Pjeršćenjej su zastojnicy mjeztym swójbje wróćili. Paduch bě jej hižo na zastawk dał (verpfänden).
Byrnjež 162 milionow eurow w loteriji dobyła, chodźi Šwicarka dale na dźěło, kaž tamniše nowiny rozprawjeja. Z tipowanku 22 eurow bě žona, kotraž chce anonymna wostać, loni w oktobru 162 milionow eurow w loteriji „Euro-Millions“ dobyła. Tež swojej wsy w kantonje Aargau wostanje wona swěrna, byrnjež sej Zwjazk, kanton a gmejna wot dobyćerki tójšto dawkow za dobyće žadali.
„Steve Jobs regiona“ dom kónc měsaca wopušći
Smochćicy (SN/BŠe). „Institucija w Smochćicach so rozžohnuje“, zwurazni nowinski rěčnik Drježdźansko-Mišnjanskeho biskopstwa Michael Baudisch na wčerawšej nowinskej rozmołwje, na kotrejž su noweho nawodu Domu biskopa Bena Sebastiana Kieslicha předstajili a wjace hač dwacećilětne dźěło dotalneho šefa zarjadnišća dr. Petera-Paula Strauby hódnoćili. Kaž nawodnica pastoralneho wotrjada ordinariata Elisabeth Neuhaus wuzběhny, „njehodźi so jeho žiwjenski skutk scyła dospołnje zapřimnyć. Wón dźě je profil wutworił, kotryž daloko přez mjezy biskopstwa skutkuje.“ Za kompetencu dr. Strauby su tuž jara dźakowni. Nimo tójšto twarskich naprawow zašłych 24 lět je wón njeličomne poskitki w kubłanskim wobłuku iniciěrował kaž tež politiske a wuměłstwowe zarjadowanja organizował. Runje tak je z přewjedźenymi, tak mjenowanymi Wuchodoeuropskimi seminarami nowe rumy wotkrył. „Wón je ‚Steve Jobs regiona‘, hdźež je hižo wobstejace wěcy hromadu zwjedł, z kotrychž su zmysłapołne nowe wěcy nastali“, radźićelka biskopskeho ordinariata rozłoži.
Brunicy dlawsy dale njeničić
Hodźij (SN). Namjet, wudobywanje brunicy we Łužicy hnydom zakónčić, je mjez čłonami Serbskeho sejma na posedźenju spočatk měsaca w Hodźiju horcu diskusiju zbudźił. Skónčnje pak su wobzamknjenje schwalili, kaž wuchadźa z nowinskeje zdźělenki sejma, kotraž bu hakle po podpisanju zakładneho zrěčenja wo přesydlenju Miłoraza wozjewjena.
Z wobzamknjenjom sej sejmarjo wot Němskeje, wot zwjazkoweju krajow Sakskeje a Braniborskeje kaž tež wot hórniskich předewzaćow žadaja, zo brunicoweho hórnistwa dla žane dalše serbske wsy wjace njeniča. Sejm poruča, „potrjechene zawody a dźěłopřijimarjow prawomyslnje financnje wotškódnić za straty w dochodach, rentach a wobsydstwje“, w zdźělence rěka.
Sejmarjo maja za njewobeńdźomne, zo so wšitke kulturne, ekologiske, materielne a imaterielne škody, kotrež su wudobywanja brunicy dla nastali, zarunaja. Zo byštej hospodarska strukturna změna a derjeměće Łužicy spěchowanej byłoj, maja so statne naprawy zeskutkownić a při tym wužiwanje resursow w serbskim sydlenskim rumje zaručić.
Böhmermann přećiwo Merkel
Berlin (dpa/SN). Telewizijny satirikar Jan Böhmermann je zwjazkowu kanclerku Angelu Merkel (CDU) kritiskeho posudka swojeje „hanjaceje basnje“ přećiwo turkowskemu prezidentej Erdoğanej wobskoržił. Satirikar bě baseń kónc měrca 2016 w telewiziji přednjesł. Merkel bě na to přez swojeho rěčnika zdźělić dała, zo ma baseń za „wědomje česć ranjacu“. Böhmermann chce jej sudnisce zakazać dać to dale twjerdźić.
Žadyn material Turkowskej
Washington (dpa/SN). USA najprjedy raz Turkowskej žadyn material za ameriske bojowe lětadło F-35 njedodawaja. Pozadk je dwělomna nakup ruskeho lětadławotwobaranskeho systema přez knježerstwo w Ankarje. Ruski system hodźi so tež přećiwo lětadłam F-35 zasadźić. Turkowska bě so z Moskwu dojednała, zo kupi ruski raketowy system S-400. Samsny čas chcedźa w USA dalše F-35 kupować. Ruski system ma w oktobru zasadźomny być. Tak by Turkowska jako prěni kraj NATO ruski brónjowy system zasadźiła.
Mjenje njeskutkow zličili
Zwjazk wjelka dla zamołwity
Maas posedźenje UNO nawjedował
New York (dpa/SN). Zwjazkowy wonkowny minister Heiko Maas (SPD) je wčera prěni króć posedźenje Bjezstrašnostneje rady UNO nawjedował, po tym zo bě Němska po nimale sydom lětach předsydstwo rady na měsac přewzała. Hłowna tema bě lěpši škit humanitarnych pomocnikow UNO w krizowych kónčinach. Maas mjenowaše gremij „wutrobu“ Zjednoćenych narodow. Zdobom wón potwjerdźi, zo je sej Němska wulkeje zamołwitosće wědoma, kotruž z nachwilnym předsydstwom přewozmje.
Skóncowaneje wobruče při knježerstwowym lětadle dla bě politikar SPD přepozdźe do hłowneho sydła UNO w New Yorku přišoł a tak zahajenje posedźenja Bjezstrašnostneje rady skomdźił.
Brexit: Znowa wšitko wotpokazali
London (dpa/SN). Tež w druhim pospyće njeje so britiski parlament na alternatiwu k zrěčenju mjez Londonom a Brüsselom wo wustupje Wulkeje Britaniskeje z Europskeje unije dojednać móhł. Delnja komora je wčera wšitke štyri namjety wotpokazała, wuske přiwjazanje kraja k EU runje tak kaž dalše ludowe wothłosowanje. Jutře chcedźa znowa wo tym wuradźować. Premierministerka Theresa May zwoła knježerstwo hižo dźensa na wurjadne posedźenje.
Njedyrbjał-li so dospołnje zwadźeny parlament bórze dojednać, hrozy wustup kraja z Europskeje unije 12. apryla bjez zrěčenja abo dalše přestorčenje brexita. Potom dyrbjała so Wulka Britaniska na wólbach Europskeho parlamenta kónc meje wobdźělić.
Prezident britiskeho parlamenta John Bercow bě zapósłancam štyri namjety předpołožił. Najwjetše šansy běchu namjetej přicpěwali, zo wostanje kraj tež po brexiće čłon cłowneje unije. Po wotpokazanju namjeta je zapósłanc konserwatiwnych Nick Boles ze strony wustupił.
Njeje žaneje wosebiteje dataje
Zwjazkowe knježerstwo 14 antiserbskich njeskutkow registrowało
Berlin (SN/MkWj). Wot lěta 2015 je po rešeršach wěstotnych institucijow w Němskej k 14 chłostajomnym njeskutkam přećiwo přisłušnikam serbskeho ludu dóšło. Antiserbske njeskutki pak njejsu w swójskim temowym wobłuku registrowane. To wuchadźa z wotmołwy zwjazkoweho knježerstwa na małe naprašowanje frakcije Lěwicy, kotraž našemu wječornikej předleži. Pady wuchadźeja z rešeršow w centralnej dataji wo politisce motiwowanych njeskutkach. Hač na jedne wuwzaće jedna so wo delikty prawicarsce orientowanych skućićelow.
Komisija přećiwo anticyganizmej
Berlin (SN). Němske zwjazkowe knježerstwo je minjenu srjedu čłonow w koaliciskim zrěčenju dojednaneje njewotwisneje komisije fachowcow za bój přećiwo anticyganizmej powołało. Centralna rada němskich Sintow a Romow wita spěšne powołanje komisije přez nutřkowneho ministra Horsta Seehofera (CSU), po tym zo bě zwjazkowy sejm hakle tydźeń do toho wo wotpowědnych namjetach wšitkich frakcijow – nimo AfD – wuradźował.
Horst Seehofer skedźbni při předstajenju fachowcow na wuznam komisije za přichodne politiske wusměrjenje w boju přećiwo anticyganizmej. Wón sej přeje, runje tak kaž jeho ministerstwo, zo by komisija zakónčacu rozprawu ze substancielnym wobsahom předpołožiła, kotraž zwjazkowemu sejmej, zwjazkowemu knježerstwu kaž tež mjeńšinje Sintow a Romow poručenja za respektny mjezsobny wobchad dawa.
Předsyda Centralneje rady němskich Sintow a Romow Romani Rose rjekny: „Anticyganizm je w němskej a europskej towaršnosći hłuboko zakótwjeny. Kubłanska politika ma na to reagować.“
