Móšeń z 1 600 eurami namakał je dowolnik na Timmendorfskim přibrjohu nad Baltiskim morjom a je pjenjezy direktnje policiji přepodał. Jako chcyše wobsedźer na policajskim rewěrje přizjewić, zo je pjenjezy zhubił, móžachu je jemu tam hižo wróćić. Sprawny namakar drje njeje myto dóstał, zbožowny wobsedźer je pak přizjewił, zo chce so jemu dźakować.

Po tym zo je pokutu dwě lěće ignorował, by 59lětny Mnichowčan bjezmała do jastwa přišoł. Zastojnicy jeho na Mnichowskim lětanišću zadźeržachu, dokelž předležeše přećiwo njemu wukaz zajeća. Muž njebě spočatk lěta 2019 přikazanu pokutu 20 eurow zapłaćił. Zarjadniskich kóštow dla je suma mjeztym na 57 eurow rozrostła. Nětko bě sudnik zajeće hejateho muža wukazał. Tón pak pokutu radšo zapłaći a móžeše skónčnje do Turkowskeje lećeć.

Praha (dpa/SN). Štyri měsacy do wólbow parlamenta dyrbješe so čěski ministerski prezident Andrej Babiš dźensa w parlamenće wothłosowanju wo njedowěrje stajić. Wuslědk wočakowachu hakle we wječornych hodźinach. Do wothłosowanje je k raznym rozestajenjam mjez zapósłancami knježerstwa a opozicije dóšło. Prezident Miloš Zeman bě wčera připowědźił, zo chcył wón kabinet njewotwisnje wot wuslědka wothłosowanja hač do oktobra w zastojnstwje wostajić.

Dwělowacych njezastorčić

Drježdźany (dpa/SN). W debaće wo prawicarski ekstremizm w nowych zwjazkowych krajach je sakski ministerski prezident Michael Kretschmer (CDU) před spowšitkownjenjom warnował. „Zawěsće čuje so nětko wjele ludźi potrjechenych, kotřiž njeběchu scyła měnjeni. Dyrbimy tuž z tajkimi wuprajenjemi kedźbliwi być“, rjekny wón w sćelaku ZDF hladajo na wuprajenja społnomócnjeneho za wuchod Marca Wanderwitza. Kretsch­mer namołwi, dwělowacych a kritiskich zapřijeć a nic hnydom zastorčić.

Incidenca wostanje pola 35

Budyšin (SN). Serbski sejm je so z „Programom k demokratiskemu samopostajowanju serbskeho ludu“ na zjawnosć wobroćił. Je to wuslědk intensiwnych wuradźowanjow w minjenych měsacach, kaž ze zdźělenki wuchadźa. Z wobšěrneho kataloga naprawow su mjeztym dźesać dypkow wobzamknyli, kiž chcedźa nětko tež statnym runinam předstajić.

Program nawjazuje na namjety, kotrež bě dźěłowa skupina „Korporacija zjaw­neho prawa“ hižo lěta 2011 ze zastupjerjemi Zwjazka, Sakskeje, Braniborskeje a Serbow zdźěłała. Mjez druhim na­mjetuja, zo měł serbski lud status kolektiwneje prawniskeje wosoby w zmysle korporacije dóstać a přewzać zamołwitosć za planowanje šulskeje syće a no­šerstwo šulow. Serbski sejm žada sej woprawdźitu runohódnosć serbskeju rěčow porno němčinje w serbskim sydlenskim rumje, 24hodźinske medijowe programy a wobšěrne prawa słyšenja, sobuposta­jowanja a weta w statnych gremijach. Stat měł korporaciji dosahace financne srědki z dawkowych dochodow přewostajić. Załožba za serbski lud by jako financne zarjadnistwo do eksekutiwy korporacije přešła.

Berlin (dpa/SN). Kanclerski kandidat SPD Olaf Scholz je přećiwo tomu, ćěriwo dale podróšić. „Štóž spiralu bencinowych płaćiznow nětko dale wjerći, tón pokazuje, kak smorže jemu starosće ludźi su“, ­rjekny Scholz nowinarjam. Dźeń a wyša płaćizna za wuhlikowy dioksid „njestara so wo lěpši škit klimy, ale wo wjace hněwa mjez ludźimi“.

Kanclerska kandidatka Zelenych Anna­lena Baerbock bě so za to zasadźała, ćě­riwo wo cyłkownje 16 centow podróšić. Za to pak žněješe wjele ­kritiki.

Frakciska předsydka Lěwicy w zwjazkowym sejmje Amira Mohamed Ali Zelenym wumjetuje, zo praktikuja z planowanym zwyšenjom płaćizny bencina klimowu politiku na kóšty małych ludźi. „Baerbock zhladuje z njeznjesliwej arogancu na ludźi ze snadnymi dochodami. Jich to woprawdźe trjechi, mjeztym zo móža bohaći bjez problema tankować“, Ali twitterowaše. „To njeje zmysłapołna klimowa politika, ale wona towaršnosć hišće bóle pači.“ Kritika na ćěriwowych pła­ćiznach so tež w druhich stronach jewi.