Schmilka/Arzberg (dpa). Tydźeń po wudyrjenju lěsneho wohenja w Sakskej Šwicy wočakowachu tam dźensa zwjazkowu zakitowansku ministerku Christine Lambrecht. Politikarka SPD chcyše sej po podaćach statneje kenclije w Drježdźanach wobraz wo połoženju činić – zhromadnje ze sakskim ministerskim pre­zidentom Michaelom Kretschmerom (CDU) a generalom Zwjazkoweje wobory Carstenom Breuerom. Wopyt zahajichu w zasadźenskej centrali wohnjoweje ­wobory w Bad Schandauwje. Nimo toho steji za ministerku a knježerstwoweho šefa helikopterowy lět na programje.

Woheń bě w narodnym parku Čěska Šwica w Čěskej wudyrił a so póndźelu ­tydźenja na narodny park Sakska Šwica rozpřestrěł. Woheń drje je wobmjezowany, su pak přeco zaso nowe žehlidła, praji rěčnik wokrjesa Sakska Šwica-Wuchodne Rudne horiny Thomas Kunz.

W zdźělence wokrjesa na pózdnim njedźelnym wječoru rěkaše, perspektiwisce je wotputanje połoženja předewšěm wot wjedra wotwisne.

152 milionow eurow za mjezy přesahowace zhromadne dźěło

Drježdźany (SN). Dobra to powěsć za pomjezny region Sakska-Čěska: Europska komisija je přizwoliła interreg-program za mjezy přesahowace zhromadne dźěło mjez Swobodnym statom Sakska a Čěskej republiku za spěchowansku dobu 2021 do 2027.

Z tym je zakładny kamjeń za pokročowanje wuwića połoženy, kotrež je so z přistupom Čěskeje republiki k EU w lěće 2004 započało – wutwar a pohłubšenje mjezy přesahowaceho zhromadneho dźěła susodow, hospodarske a socialne wuwiće zhromadneho pomjezneho ruma kaž tež wotstronjenje zadźěwkow za zetkawanje ludźi z wobeju stron hranicy a za jich zhromadne dźěło na teritorijach a runinach. Barbara Meyer, statna sekretarka statneho ministerstwa za regionalne wuwiwanje, so wjeseli: „Z přizwolenjom programa móžemy wuspěšne dźěło minjenych lět zhromadnje ze swojimi čěskimi partnerami pokročować a z tym namjezne regiony dale hromadu zrosć dać“.

Luxemburg (dpa/SN). Inflacija w europasmje je so w juliju pospěšiła a wospjet rekordnu hódnotu docpěła. Porno lońšemu měsacej zwyšichu so płaćizny pře­trjebarjow wo 8,9 procentow, statistiski zarjad Eurostat pjatk zdźěli. Tole je najwyša rata po zawjedźenju eura jako knižny pjenjez 1999. W předchadźacym měsacu běchu płaćizny přetrjebarjow wo 8,6 procentow stupali. Fachowcy běchu pospěšenje na 8,7 procentow wočakowali.

Ćěrjene bu podróšenje znowa přez energijowe płaćizny, kotrež so porno lońšemu měsacej wo 39,7 procentow zwyšichu. Postup bě pak trochu słabši hač w předchadźacym měsacu. Za to pospěši so podróšenje žiwidłow a požiwadłow wot 8,9 na 9,8 proc. Jadrowa inflacija, při kotrejž so wosebje chabłace płaćizny energije, žiwidłow a požiwadłow njewobkedźbuja, stupaše wot 3,7 na 4 proc. Najwyše inflaciske raty w měnowym rumje pokazachu z wjace hač 20 procentami znowa tři baltiske staty. W Němskej wučinješe po europskich standardach wobličena inflaciska rata 8,5 proc. Europska centralna banka bě před dobrym tydźenjom swoje wodźace danje prěni raz po jědnaće lětach zwyšiła.

Roznjemdrjeny paduch je fasadu wobchoda, w kotrymž běchu jeho při kradnjenu lepili, z kamjenjemi wobškodźił a 2 500 eurow škody zawostajił. Muž bě we wobchodźe aprikozy w hódnoće štyrjoch eurow kradnył a hnydom zjědł. Po roze­stajenju z přistajenym policija muža zaja. Jako jeho zaso pušćichu, so muž z kamjenjemi w ruce nawróći a je do wokna mjetaše. Znowa jeho policija zaja. Tónkróć tyknychu jeho do přepytowanskeje jatby.

Nócne harowanje w Berlinskim Treptowskim parku je zasadźenje policije zawinowało. Policija nańdźe wjacore skupiny 15 do 50 wosobow, po tym zo běchu so wobydlerjo hóršili. Mnozy mějachu radija sobu, běchu alkoholizowani a zastojnikam napřećo chětro agresiwni. Policija swjedźenje rozpušći. Partijow w ćopłym počasu dla su w někotrych parkach stolicy Němskeje hižo alkohol zakazali.