Zwjazkowy kancler Olaf Scholz na Petersbergskim dialogu w Berlinje

Berlin (dpa/SN). Zwjazkowy kancler Olaf Scholz je před „globalnym wožiwjenjom fosilneje energije“ jako sćěh płunoweje krizy wójny w Ukrainje dla warnował. „Nichtó njemóže z tym spokojom być, zo tež pola nas podźěl zmilinjenja brunicy zaso přiběra“, rjekny politikar SPD wčera na Petersbergskim klimowym dialogu w Berlinje. „Ćim wažniše tuž je, zo cyle jasnje zwěsćamy: To je časowje wobmjezowana naprawa, kotraž naše klimowe zaměry njezměni.“

To samsne płaći tež za inwesticije do płunoweje infrastruktury kaž za stacije za židki płun, Scholz potwjerdźi. To měło zaměram Němskeje wotpowědować, po kotrejž chcedźa w Němskej a po wšěm swěće přichodnje klimje napřećo neutralni być. „Konkretnje to rěka, zo njepodamy so do nowych dołhodobnych wotwisnosćow wot fosilnych energijow.“

„Bohu dźak, zo njejsmy stare kachle hišće wottorhali“, „Jenož derje, zo smy do noweje chěže kamin zatwarili.“ Takle mysla tele dny mnozy, hdyž słyša powěsće wo płunowej a energijowej krizy hladajo na přichodnu zymu. Mjeztym njemóža wikowarjo wuhla a drjewa ani telko dodawać kaž bychu chcyli, dokelž prosće wjace nimaja. To móže zwjazkowy kancler Scholz hišće tak naležnje twjerdźić, zo je přiběrace zmilinjenje brunicy nachwilna wěc a knježerstwo swoje klimowe zaměry njezměni: Ludźo so najprjedy raz prašeja, kak přińdu při wšej klimowej diskusiji bjez płuna přez zymu. A zo wětrniki a solarne připrawy bydlenja njetepja, je mjeztym tež znate. Zo smědźa brunicowe milinarnje Němskeje po woli zeleneho hospodarskeho ministra Habecka dlěje dźěłać, je dalše znamjo toho, zo je wójna w Ukrainje a z tym zwjazana energijowa kriza połoženje tak zasadnje na hłowu stajiła, kaž njeby sej to před lětom hišće nichtó chutnje předstajić móhł. Marko Wjeńka

Pospytane wotstronjenje wosaceho hnězda je w juhopfalcskim Bellheimje zasadźenje wohnjoweje wobory zawinowało. 39lětny bě spytał, wosy pod třěchu domskeho z bunsenowym palakom wućěrić. Při tym so hnězdo zapali. Přiwołana wohnjowa wobora móžeše woheń zhašeć, prjedy hač tón třěchu wobškodźi. Zamołwići wotradźa, hnězda sami wotstronić. Lěpje je, fachowcow přiwołać.

Kedźbliwy psyk je we Winsenje pola Hannovera wjetšemu wohenjej zadźěwał, swojemu wobsedźerjej pak skóržbu wunjesł. Muž bě woheń w železnym sudobju bjez dohladowanja palić dał, policija zdźěla. Na to so pódla sudobja ležace drjewo zapali. Hakle přez šćowkanje psa so na to dohlada. Susodźa wołachu wohnjowu woboru, kotraž płomjenja podusy. Při tym zwěsćichu, zo paleše so w sudobje wobarbjene drjewo, štož njeje dowolene.

Vatikan (B/SN). Bamž Franciskus je rozsud wyšeho sudnistwa USA kónc junija k zakónčenju samodruhosće z wotehnaćom zasudźił a so w interviewje z agenturu Reuters praša: „Je to legitimne, ­čłowječe žiwjenje wotstronić, zo by problem rozrisany był?“ Wón přirunowaše wotehnaće ze „skazanym mordarstwom“. Tele přirunanje je w medijach wulke rozhorjenje zbu­dźiło. Hižo w zašłosći bě hłowa katol­skeje cyrkwje zjawnje prajiła: „Štóž ­wotehnawa, tón mori.“ Amerika je w tutym prašenju pačena.

30 lět ministrantki