Drježdźany (dpa/SN). Powšitkowny kolesowarski klub Němskeje (ADFC) w Sakskej je krajnemu knježerstwu tójšto komdźenjow a njedostatkow nastupajo kolesowarski wobchad wumjetował. W bilancy k prěnjemu połčasej legislaturneje doby dawa klub knježerstwu CDU, SPD a Zelenych w tymle nastupanju špatne znamki. Jenož dwaj z cyłkownje 15 projektow koaliciskeho zrěčenja stej dotal zwoprawdźenej – dźewjeć njejsu ani hišće započeli.

Wutwar syće kolesowarskich šćežkow so skoro dale wuwił njeje, rjekny předsyda kluba Nikolaus Schietzold. Mjeztym zo su w lětach mjez 2012 a 2015 podłu sakskich zwjazkowych a statnych dróhow hišće 30 kilometrow kolesowarskich šćežkow a hišće wjace twarili, bě jich 2020 a 2021 jenož sydom a dźesać kilometrow. Koalicija bě sej 2019 předewzała, podźěl kolesowarskich jězbow na cyłkownej ličbje jězbow hač do lěta 2025 z paketom naprawow podwojić, Schietzold rjekny. Tutón zaměr njeje ­poprawom wjace docpějomny. „Knježerstwo dyrbjało nětko skónčnje do pedalow teptać a přilubjenja znajmjeńša zdźěla spjelnić“, klub zdźěla.

Sydom metrow wulki swjaty křiž dyrbi wěriwa w Düsseldorfje ze zahrody swo­jeho domu wotstronić. Tole je tamniše krajne sudnistwo rozsudźiło. Křiž je „zakonje ranjace wobmjezowanje wobsydstwa“, sudnicy měnjachu. Skoržiła bě sobuwobydlerka a sobuwobsedźerka dwuswójbneho domu. Wona měješe swój wšědny dźeń z kóždym widom do zahrody za masiwnje myleny. Wěriwa argumentowaše, zo njeje wulkosć křiža připad: Ta wotpowěduje 736 metrow wulkej horje Golgota, na kotrejž běchu Jězusa křižowali. Wusud je płaćiwy.

Baćona smjertnje zranił je motorski sewjernje Drježdźan. Zwěrjo bě dróhu přeprěčiło, jako muž přijědźe. Wón njemóžeše so wuwinyć a zrazy do baćona, kiž hišće na městnje njezboža zahiny. 53lětny motorski wosta njezranjeny. Wěcna škoda njeje wočiwidnje nastała.

Braniborski kabinet je wčera druhi krajny plan za skrućenje delnjoserbskeje rěče schwalił, kotryž bě kulturna ministerka Manja Schüle (SPD) zapodała. Dokument wobsahuje mjez druhim samozawjazk kulturneho ministerstwa, w serbskim wobłuku jenož hišće projekty z poćahom k rěči spěchować.

Podstupim/Šejkow (SN/at). „Braniborska profiluje so ze swojim druhim krajnym planom dale jako progresiwny mjeńšinowy region w Europje, wo tym sym přeswědčena“, rjekny braniborska kulturna ministerka Manja Schüle (SPD) wčera po wobzamknjenju krajneho knježerstwa nastupajo dalšu podpěru delnjoserbšćiny. Po słowach ministerki nječinja to, „dokelž mamy Serbow za folkloristiski přiwěšk. Ale dokelž tči w Serbach potencial, jónkrótny region Łužicu hromadu wjesć“. Schüle zdobom wuzběhny, zo woni „jako witalna žiwa skupina hižo nětko strukturnu změnu we Łužicy rozsudnje wobwliwuja“. A tohodla chce braniborske knježerstwo wot Zwjazka wuwabjene srědki za strukturne wuwiće we Łužicy w přichodnych lětach bóle za planowanje a wožiwjenje rěče zasadźować.

Berlin (dpa/SN). Zwjazkowy minister za strowotnistwo Karl Lauterbach (SPD) chce přistup do testowanskich centrumow za ludźi wobmjezować. Jenož hišće ludźo ze symptomami a wuzwolene skupiny ludźi kaž małe dźěći a samodruhe měli prawo měć, so na koronawirus ­testować dać. Tole wuchadźa z „nazymskeje strategije koronawirusa dla“. Lauterbach chcyše koncept na dźensnišej konferency strowotniskich ministrow w Magdeburgu předpołožić.

Zelensky za nowe sankcije

Kijew (dpa/SN). Ukrainski prezident Wolodymyr Zelenskyj žada sej wójny přećiwo swojemu krajej dla nowe sankcije EU přećiwo Ruskej. Sedmy paket sankcijow je tak spěšnje kaž móžno trěbny, rjekny Zelenskyj w swojim nócnym widejowym poselstwje. „Ruska dyrbi přiběracy ćišć wójny a agresiwneje antieuropskeje politika dla začuwać“, wón rjekny. Zdobom wón potwjerdźi, zo trjeba Ukraina nuznje dalše a tež ćežke brónje.

Koaliciske jednanja skónčene