Lěsne wohenje w staće USA Kaliforniskej wohrožeja mjeztym tež ...
Posledni wojacy Afghanistan wopušćili
Kabul/Washington (dpa/SN). Z cofnjenjom poslednich wojakow z Kabulskeho lětanišća su USA wojerske zasadźenje w Afghanistanje po nimale 20 lětach zakónčili. „Sym tu, zo bych kónc cofnjenja z Afghanistana wozjewił“, rjekny ameriski general Kenneth McKenzie, nawoda centralneho komanda, na internetnej konferency žurnalistam. Tak skónči so tež wojerska akcija k ewakuowanju Američanow, zwjazkarjow a za škitom pytacych. Poslednje wojerske lětadło USA je mjeńšinu do połnocy z Kabulskeho lětanišća wotlećało. Prezident USA Joe Biden bě tónle termin wukazał.
Militantno-islamscy talibanojo, kiž běchu móc w kraju přewzali, swjeća cofnjenje wukrajnych wojakow jako dobyće. Kaž rěčnik talibanow Sabiullah Mudshahid wčera twitterowaše, „je Afghanistan nětko dospołnu njewotwisnosć docpěł. Dwaceći lět trajace wobsadźenje Afghanistana přez USA a NATO je so dźensa wječor skónčiło. Bóh je wulki.“
Bartsch: Kanclerka ma zapřimnyć
Nowe rjadowanja w šulach
Sakska hotuje so na nowe wučbne lěto w znamjenju korony
Drježdźany (dpa/SN). Po šěsć tydźenjach lětnich prózdnin zahaji so přichodnu póndźelu, 6. septembra, za něhdźe 494 000 šulerkow a šulerjow nowe wučbne lěto. Wone steji dale w znamjenju koronawirusa. Za karantenu, testowanje a dalše wobmjezowanja płaća wosebite prawidła. Korony dla je Sakska nowy wukaz za šule schwaliła.
Hinak hač loni płaći wotnětka zaso šulska winowatosć. Dźěći doma wuwučować je jenož hišće z lěkarskim atestom móžno. Noworjadowanje předwidźi prezencnu wučbu, njewotwisnje wot aktualneje incidency. Šule zawrěć njeje hižo předwidźane. Kultusowy minister Christian Piwarz (CDU) ma Saksku za nowe lěto derje přihotowanu a skedźbnja na wobšěrne móžnosće testowanja, na šćěpjenje dorosćenych a na móžne šćěpjenje dźěći, kotrež su starše hač dwanaće lět. Wobmjezowanja šulskeje wučby maja hakle płaćić, je-li strowotniski system znowa přećeženy.
Struchła bilanca
CDU z milinowej ofensiwu
Berlin (dpa/SN). Z pjatnaćedypkowym planom chce CDU wuwiće wobnowjomnych energijow pospěšić. Po informacijach dpa je stronski prezidij wčera w Berlinje koncept schwalił, kotryž je na to wusměrjeny, ručež móžno milinowu potrjebu Němskeje stoprocentnje z wobnowjomnymi energijemi kryć. Přetrjeba miliny přez hospodarstwo a priwatne domjacnosće budźe w přichodźe jasnje přiběrać, w mjenowanym planje rěka. „Tale milina dyrbi skutkowna, regeneratiwna a wobnowjomna – a nimo toho za přetrjebarjow a předewzaća tuńša hač dźensniša milina być.“
CDU chce nimo toho „načolne městno“ na polu technologije docpěć, wužiwaneje za zdobywanje energije ze słónca, wětřika, biopłuna, zemskeje ćopłoty a wodźika. Dale zasadźa so za to, zo hodźitej so wobnowjomna energija kaž tež jeje składowanje bjez běrokratije a wotedawkow zmóžnić. Tež popłatk za wobnowjomne energije dyrbja po nahledźe strony křesćanskich demokratow wotstronić. Planowany je spěchowanski program za twar solarnych připrawow a milinowych wětrnikow.
Lětsa drje mjenje žita
To a tamne (31.08.21)
Z popjerjowym sprayjom do sobuwobydlerki dała je so rentnarka w starowni w bayerskim Oberstdorfje. Do toho bě so staruška ze 86lětnej zwadźiła. Na to hrabny młódša z njeju za tyzu ze sprayjom. Při atace su so nimo 86lětneje hišće třo dalši wobydlerjo domu zranili, lěkarske zastaranje pak na zbožo trěbne njebě. Přećiwo 79lětnej policija nětko zranjenja ćěła dla přepytuje.
Pjany do policajskeho wozydła zrazył je muž ze swojim awtom w braniborskim Seelowje. Policisća běchu njedźelu rano w zahrodkownišću zasadźeni a běchu swój wóz před zachodom wotstajili. 28lětny do njeho zrazy, jako chcyše kompleks wopušćić, a jón wobškodźi. Policisća naměrichu pola muža 1,97 promilow alkohola. Jězbnu dowolnosć wón žanu njeměješe. Tak sej zastojnicy tež klučiki awta hnydom zdźeržachu.
Scholz pječa najlěpje wobstał
Prěnje wulke telewizijne rozestajenje kandidatow unije, SPD a Zelenych
Berlin (dpa/SN). Při prěnim wulkim dowólbnym telewizijnym rozestajenju su třo kanclerscy kandidaća CDU/CSU, SPD a Zelenych mjezsobne rozdźěle potwjerdźeli. Při tak mjenowanym trielu sćelakow RTL a ntv pokazaštaj so kandidataj unije Armin Laschet a kandidatka Zelenych Annalena Baerbock bojowniskaj. Kandidat SPD Olaf Scholz je na wumjetowanja porno tomu měrnje reagował. Spěšne naprašowanje instituta Forsa bjezposrědnje po skónčenju wusyłanja pokaza, zo bě wón z tym wuspěšny. Na wšě 36 procentow wšěch 2 500 woprašanych bě měnjenja, zo je Scholz triel dobył. 30 procentow měješe Baerbock za dobyćerku a jenož 25 procentow Lascheta. Tež na prašenje, štó je najbóle sympatisce skutkował, wotmołwi 38 procentow na dobro Scholza, slědowaštaj Baerbock (37 procentow) a Laschet (25 procentow).
Bamž radźi so šćěpić dać
Vatikan (B/SN). We wosebitej widejowej powěsći je bamž namołwjał so šćěpić dać, dokelž je to „akt lubosće za sebje, za swójbnych a přećelow kaž tež za wšě ludy“. Pontifeks měni, zo je to jednore wašnje, so na dobro wšěch zasadźić, wosebje najčućiwišim napřećo. Widejowa powěsć je dźěl swět wopřijaceje šćěpjenskeje kampanje powšitkownowužitneje ameriskeje organizacije Ad Council „It’s up to you“ (Zaleži na tebi).
Wjace kanonikow biskopa woli
Drježdźany (B/SN). Drježdźansko-Mišnjanski biskop Heinrich Timmerevers je spočatk awgusta nowe statuty tachantskeho kapitla swjateho Pětra Drježdźany wobkrućił. Hłowna nowosć je, zo propstaj z Lipska a Kamjenicy kaž tež farar z města Gera jako čestni tachantscy kapitularojo přez swoje zastojnstwo nimo regularnych kapitularow biskopa wola. Po statuće staj tachantskaj fararjej w Drježdźanach a Budyšinje na kóždy pad wobdźělenaj, nimo toho ma znajmjeńša jedyn Serb jako kanonik krute městno w tachantskim kapitlu. Nowy tachantski kapitl chcedźa 14. nowembra 2021 we wobłuku nyšpora w Budyskej tachantskej cyrkwi spřisahać a zapokazać.
