Berlin (dpa/SN). Němski zwjazk dźěłarnistwow (DGB) wobzamknjenje strowotniskich ministrow raznje kritizuje, zo njedóstanu nješćěpjeni přichodnje čas karanteny koronawirusa dla zapłaćeny. „Njemóže być, zo politika zamołwitosć za bój přećiwo pandemiji cyle jednorje na dźěławych wotsunje“, rjekny předsyda DGB Reiner Hoffmann nowinarjam. „Šćěpjensku winowatosć přez posleńcu dale wotpokazujemy.“ Nimo toho noworjadowanje woznamjenja, zo dyrbja při­stajeni dźěłodawarja informować, hač su šćěpjeni abo nic. Hoffmann skedźbni na jedne z najwjetšich wudobyćow dźěłaćerskeho hibanja, zo dźěłodawarjo tak mało kaž móžno z priwatneho žiwjenja přistajenych a tak tež wo strowotniskej situaciji ludźi zhonja. „Nochcemy, zo dźěłodawarjo swoju poziciju mocy ze znajomosćemi wo strowotniskich datach swojich sobudźěłaćerjow zesylnja.“

Strowotniscy ministrojo Zwjazka a krajow běchu wčera wobzamknyli, zo nješćěpjeni wot 1. nowembra karantenu wjace zapłaćenu njedóstanu.

Sakska policija wotnětka tež w serbskej rěči za swoje „dobre dźěłowe městna“ wabi. Wčera su kampanju w Budyšinje před Serbskim domom předstajili a so za nju wuchwalowali. Po mojim měnjenju pak bě to najwjetši čas, zo je kampanja skónčnje dwurěčnje zaběžała. Pokiw, za po­wołanje policista w Sakskej tež serbsce wabić, nasta mjenujcy na wobydlerskej rozmołwje z ministerskim prezidentom Michaelom Kretschmerom a dalšimi ministrami Sakskeje w Budyskim Serbskim domje 4. julija 2018, potajkim před ně­što wjac hač třomi lětami. Tróšt dawa mi jeno znate wuprajenje, zo je wšitko, štož dołho traje, skónčnje tola spomóžne. A to kampani tež přeju. Wšako hlada sakskim policistam tójšto dźěła do rukow, chcedźa-li sej zhubjenu dowěru serbskich młodostnych wróćo zdobyć. Wo přichodnych serbskich zastojnikow serbskorěčnje wabić je wuraz runosće. Po tymle puću pak dyrbjeli hižo dawno kročić. Ale radšo zapozdźene hač ženje. Janek Wowčer

Z chětro měšanymi začućemi dyrbi němska winowa kralowna Eva Lanzerath koronapandemije dla nětko njewšědnu dobu zastojnstwa zakónčić. „Sym jara zrudna, zo so moje lěto skónči, bjez toho zo móžach kaž moje předchadnicy wino na wulkozarjadowanjach prezentować, rjekny 23lětna powěsćerni dpa. Ju běchu loni w septembru za 72. němsku winowu kralownu wuzwolili. Pandemije dla pak dyrbjachu nimale wšitke terminy wotprajić. Jutře wuzwola w pfalcskim Neustadće nowu winowu kralownu.

Z drjewjanej łatu a nožom su so susodźa w Berlinje-Reinickendorfje do so dali a so mjez sobu zranili. Wobydlerjo dweju domjacnosćow běchu so tak zwadźili, zo ­samo ćělnu namóc wužiwachu. 27lětny poćerpje zranjenja noža dla, dalša 37lětna ćežke zranjenja na hłowje. Wobeju dyrbjachu do chorownje dowjezć.

Za njedźelne wólby zwjazkoweho sejma we łužiskich městach dźeń a wjace wólbokmanych listowe wólby preferuje. To je naprašowanje našeho wječornika w Běłej Wodźe, Budyšinje, Kamjencu a we Wojerecach wunjesło.

Budyšin (SN/at). Něhdźe štwórćina wólbokmanych w Běłej Wodźe je sej dotal podłožki za listowe wólby wuprosyła, zdźěli Wulf Stiebenz, nowinski rěčnik měšćanskeho zarjadnistwa. Předwčera­wšim bě jich 2 950. „Při zańdźenych wólbach mějachmy jenož wosom do dźewjeć procentow listowych wolerjow.“