Žadyn zakład jednanjow
Berlin (dpa/SN). Dźěłarnistwo lokomotiwnikow GDL njewidźi w tarifowym rozestajenju z Němskej železnicu žadyn zakład nowych jednanjow. Dźěłarnistwo je k dalšim jednanjam zwólniwe, jeli železnica wotpowědny namjet předpołoži, rjekny předsyda GDL Klaus Weselsky dźensa w rańšim magacinje telewizije ZDF. Dźěłarnistwo sej mjez druhim žada, tarifowe zrěčenje tež za přistajenych w porjedźernjach a w zarjadnistwje železnicy wotzamknyć směć.
Braun za jednotne rjadowanje
Berlin (dpa/SN). Nawoda kanclerskeho zarjada Helge Braun so za to wupraja, dobu karanteny w padźe koronainfekcijow na šulach jednotnje rjadować a zdobom skrótšić. W rańšim magacinje ZDF skedźbni wón dźensa na wotpowědne wobzamknjenje konferency ministerskich prezidentow. Tak měła karantena najdlěje pjeć dnjow trać a potom po tesće nimo być. Zwjazkowe kraje z rjadowanjom dotal jara rozdźělnje wobchadźeja.
Weber za wjace nawodnistwa
Z eklatom skónčiła je so wčerawša kwalifikaciska koparska hra za ...
Předsyda SPD: Rěčimy ze wšěmi
Berlin (dpa/SN). Předsyda SPD Norbert Walter-Borjans je warnowanja ze stron CDU/CSU wotpokazał, zo chcyła SPD swojeho kanclerskeho kandidata Olafa Scholza w padźe wólbneho dobyća nuzować so do směra na Lěwicu orientować. „To dyrbju so tola smějkotać“, měnješe Walter-Borjans minjeny pjatk w rańšim magacinje sćelaka ARD. Podruž, mzda, renta abo zakładne zawěsćenje dźěći nastupajo su sej w SPD a ze Scholzom přezjedni, wón rjekny. Na prašenje, kak swobodny Scholz we wutworjenju noweho knježerstwa je, Walter-Borjans praji: „Potom so, kaž přeco, wodźace gremije strony zeńdu, wězo z tym, kiž ma knježerstwo nawjedować.“
Předsyda SPD zakitowaše, zo njeje Scholz dotal koaliciju SPD, Zelenych a Lěwicy zasadnje wuzamknył. „Chcemy ze wšěmi rěčeć, to je tola normalne. Njebudźemy so jednej ze stronow podwolić, prajo, zo z druhim njerěčimy.“ Scholz njebě lěwicarski zwjazk wuzamknył, žada pak sej wot Lěwicy mjez druhim jasne wuznaće k NATO. Lěwica chce, zo Němska z NATO wustupi.
Kritizuja kurs talibanam napřećo
Berlin (dpa/SN). Wonkowny politikar CDU Norbert Röttgen najnowši kurs USA a druhich zapadnych krajow Afghanistanej napřećo raznje kritizuje. Wone so „na prošerja ponižeja“, kaž předsyda wonkowneho wuběrka zwjazkoweho sejma žurnalistam rjekny. W tym połoženju nima Röttgen za wšelake poskitki wonkownych ministrow žane zrozumjenje. „Zjawne poskitki nas jenož dale wosłabjeja. Žadanja njemóžemy praktisce zwoprawdźić.“
Wonkowni ministrojo EU běchu so kónc tydźenja na pjeć žadanjow dorozumili, kotrež měli talibanojo jako zakład zhromadneho dźěła ze zapadom spjelnić. Tak měli so na knježerstwje tež politiske mocy zwonka talibanow wobdźělić a čłowjeske prawa kaž tohorunja nowinarska swoboda zaručene być.
Wonkowny fachowc Zelenych Omnid Nouripour w tym zwisku tež poskitk wonkowneho ministra Heiko Maasa (SPD) talibanam kritizuje. „Wuwićowu pomoc poskićić a so nadźijeć, zo talibanojo z tym zwjazane žadanja spjelnja, je naiwne a njezwoprawdźomne.“
Laschet: Mamy wšitke šansy
Wólbny bój mjez CDU/CSU a SPD so dale přiwótřa
Berlin (dpa/SN). Tři tydźenje do wólbow zwjazkoweho sejma so rozestajenje mjez CDU/CSU a SPD, kotraž w aktualnych woprašowanjach nawjeduje, dale přiwótřa. Wodźacy politikarjo CDU a CSU sej wot SPD žadaja, so jasnje wot Lěwicy distancować. Kanclerski kandidat unije Armin Laschet (CDU) žada sej wot unije, „poslednju fazu wólbneho boja wužiwać a wojować. Mamy hišće wšitke šansy.“
Předsyda CSU Markus Söder rjekny nowinarjam kónc tydźenja hladajo na móžne koalicije, zo widźi jenož dwě móžnosći: pak jasny puć do směra na Lěwicu, pak amplowu koaliciju z FDP. Tola tež FDP njeby jako poměrnje mała strona zasadnemu lěwicarskemu wuwiću zadźěwać móhła. Kanclerskemu kandidatej SPD Olafej Scholzej Söder wumjetowaše, zo „nima jasne stejišćo k Lěwicy. Budźe wón ministra Lěwicy powołać, haj abo ně?“, so předsyda CSU praša.
Wopyta Pólsku
To a tamne (06.09.21)
Kino pod hołym njebjom wosrjedź awtodróhi móžeše 500 filmowych fanow sobotu na A 8 pola Pforzheima dožiwić. Wottorhanskich dźěłow při mosće dla bě čara kónc tydźenja zawrjena. Pforzheimske komunalne kino je składnosć wužiło a tam 15 metrow šěroku płachtu stajiło. Na třoch jězdnjach běchu stólcy nastajane, nimo toho předawachu popcorn a napoje. Wšitke zastupne lisćiki běchu w běhu połdra hodźiny předate.
Hejatej konjej stej wulět zapřaha w braniborskim Rheinsbergu dočasnje skónčiłoj. Brunačej běštej wosrjedź wulěta wosomwosoboweje skupiny z kuču naraz stejo wostałoj. Lědma zo bě pohonč z woza zalězł, pak wonej wóz chětro spěšnje 200 metrow po chódniku dale ćehnještej. Hakle jako so wotežka w štomje zapopadny, bě jězba nimo. Na zbožo so jenož jedna sobujěduca snadnje zrani.
Smědźa so ludźi prašeć
Berlin (dpa/SN). Dźěłodawarjo smědźa so sobudźěłaćerjow w pěstowarnjach, šulach a hladarnjach přichodnje prašeć, hač su přećiwo koronawirusej šćěpjeni. To je wuslědk hodźiny trajaceho wuradźowanja CDU/CSU a SPD, kaž dpa wozjewja. Móžnosć ma pak jeno za čas epidemiskeho połoženja narodneho rozměra wobstać, kotrež bě zwjazkowy sejm minjeny tydźeń wo tři měsacy podlěšił.
Přemało šćěpjenjow
Berlin (dpa/SN). W Němskej rozšěrja so powšitkowna mučnota šćěpjenja pře koronu. Podźěl dospołnje šćěpjenych wobydlerjow kraja je z 61 procentami přirunujo z 59 procentami minjeny tydźeń jeno snadnje rozrostł, rěka w tydźenskej rozprawje Roberta Kochoweho instituta. Wot kónca julija hač do kónca awgusta je kwota wo runje dźesać procentow rozrostła. To je přemało, wotwobarać štwórtu žołmu infekcijow „z połnymi intensiwnymi stacijemi“.
Lětarska słužba UNO zaso dźěła
