Posledni třibój do wólbow
Kanclerscy kandidaća CDU/CSU, SPD a Zelenych w telewiziji
Berlin (dpa/SN). Na swojim poslednim třiboju do wólbow zwjazkoweho sejma su so kanclerscy kandidaća unije, SPD a Zelenych znowa raznje wo prawych strategijach na dobro škita klimy rozestajeli. Kandidatka Zelenych Annalena Baerbock swojimaj kontrahentomaj wumjetowaše, zo nimataj žanu rozumnu směrnicu. „Chcetaj Pariske klimowe zaměry spjelnić, abo chcetaj dale 17 lět brunicu zmilinjeć?“, prašeše so Baerbock wčera w zhromadnym wusyłanju sćelakow ProSieben, Sat 1 a Kabel eins swojeju riwalow unije a SPD Armina Lascheta a Olafa Scholza. Tón skedźbni na nuznje trěbny wutwar wobnowjomnych energijow, ke kóncej zmilinjenja brunicy pak ničo njerjekny. Laschet pokaza na mocy wikow a na kreatiwitu industrije, kotruž měł stat spěchować. Wón do toho wěri, zo płaćizna za wuhlikowy dioksydy fosilne nošerje energije tak podróša, zo je dočasny kónc zmilinjenja brunicy bjeze wšeho předstajomny. Wšitcy třo kandidaća wuznachu so k trěbnosći, hospodarstwo na nowe, klimje přichilene wašnje produkcije přestajić.
To a tamne (20.09.21)
W Šwedskej je so łós (Elch) do chorownje zadobył. Zwěrjo skoči wčera připołdnju z woknom kliniki w juhošwedskim měsće Eskilstuna a so při tym zrani. Pacientow njeje na zbožo nastróžił, dokelž bě rumnosć prózdna. Přistajeni wołachu hajnika a skótneho lěkarja, kiž měješe zranjeneho łosa najprjedy raz pohłušić. Dokładne přepytowanje ma nětko pokazać, hač dyrbja łosa zasparnić abo nic.
Pěšcy, skaterojo a kolesowarjo mějachu wčera na jedyn dźeń Lipšćanski nutřkoměšćanski wobchadny kruh sami za sebje. Hłowna dróha bě wot 10 hač do 17 hodź. za nadróžny wobchad zawrjena. Tež pjerkobul hrajacy a běharjo su njewšědne městno čile wužiwali. Měšćanski wobkruh wobkruža nutřkowne město Lipska na štyrjoch čarach. Z akciju je so Lipsk na Europskim tydźenju mobility wobdźělił. Wjedra dla bě nawal přewidny.
Wólby ruskeje Dumy zahajene
Moskwa (dpa/SN). W Ruskej su so dźensa tři dny trajace wólby parlamenta zahajili. Rano wotewrěchu poslednje wólbne lokale w Kaliningradskej kónčinje nad Baltiskim morjom. Zazběh wólbow bě wčera wječor na połkupje Kamčatka na wuchodźe kraja. Hač do njedźele ma 110 milionow ludźi Ruskeje składnosć, wo zestawje noweje statneje Dumy wothłosować. W mnohich kónčinach wola tež regionalne a měšćanske parlamenty. Wuslědk wólbow je zdobom wažny test za nahladnosć prezidenta Wladimira Putina.
Italska: Šćěpić abo testować
Rom (dpa/SN). Jako prěni kraj Europy předpisuje Italska přichodnje wšitkim přistajenym priwatneje a zjawneje słužby šćěpjenje abo negatiwny koronatest, zo móhli dale swoje dźěło wukonjeć. Štóž certifikat nima, njesmě wot 15. oktobra wjace do běrowa, na zarjad, do wobchoda abo gastronomije na dźěło hić. Za test płaća dorosćeni přichodnje 15 eurow. Přećiwo wukazej ministerskeho prezidenta Marija Draghija běchu dźěłarnistwa a prawicarske strony protestowali.
Sudniski proces korony dla
Łužiska politikarka Kathrin Michel, kotraž steji na 2. městnje ...
Němsko-pólsku radu ministrow namjetował
Podstupim/Frankfurt nad Wódru (RD/SN). Społnomócnjeny zwjazkoweho knježerstwa za Pólsku, braniborski ministerski prezident Dietmar Woidke (SPD), je namjetował zhromadnu ministersku radu wobeju krajow wutworić. Ta měło tomu słužić, zo so němsko-pólske poćahi polěpša. Zhromadna ministerska rada je forma politiskeje kooperacije, kaž pěstuje ju zwjazkowe knježerstwo dotal jeno z francoskim knježerstwom. „Zhromadne dźěło našeju krajow bychmy tak na jednu runinu z němsko-francoskimi poćahami stajili“, rjekny Woidke wčera w Podstupimje, witacy delegaciju senata, druheje komory pólskeho parlamenta.
Po słowach hosćićela je koronapandemija pokazała, zo ma so komunikacija mjez pomjeznymi regionami polěpšić. Tež afrisku swinjacu mrětwu nastupajo dyrbjałoj wobaj krajej wušo hromadźe dźěłać, sej Woidke žadaše. Wšako bě pólske knježerstwo zapowědźiło płoty přećiwo dźiwim swinjam na wuchodnym brjohu Wódry a Nysy twarić.
Wólbny bój mnohim wostudły
Berlin (dpa/SN). Tuchwilny bój w přihotach wólbow zwjazkoweho sejma maja mnozy za skerje wostudły. W naprašowanju slědźenskeho instituta YouGov w nadawku powěsćernje dpa rjeknychu runje štyri procenty ludźi, zo maja wólbny bój za „jara napjaty“, 16 procentow posudźuje wubědźowanje stron za „skerje napjate“. Byrnjež nastupajo nowu zestawu němskeho knježerstwa tuchwilu hišće wšitko wotewrjene było, 43 procentow wobdźělnikow reprezentatiwneho woprašowanja měni, zo je wólbny bój wostudły. Za 19 procentow z nich je wón tónraz samo „jara wostudły“. Sydom procentow ludźi sej w tymle prašenju žadyn posudk njedowola.
Rozžohnowacemu knježerstwu CDU/CSU a SPD njedawaja wólbokmani žane dobre wuswědčenje. Na prašenje, w kotrym z dźewjeć politiskich wobłukow – wot škita klimy hač k digitalizaciji – je so minjene lěta něšto hibało, rjekny 46 procentow ludźi: „na žanym.“
Načasny namjet
To a tamne (17.09.21)
120 hodźin na mobilnym nuzniku wutrać chcedźa štyrjo Britojo, zo bychu pjenjezy za dobroćelsku organizaciju zběrali. „Je napinace“, rjekny jedyn z wobdźělnikow po prěnjej nocy. Wodnjo wšak maja kontakt z ludźimi, w nocy pak je njepřijomne a wuske. Bywši wojacy chcedźa pjenjezy organizaciji Forgotten Veterans přewostajić, kotraž so wo weteranow stara. Wutrać dyrbja hišće hač do njedźele w 17 hodź. Hač do wčerawšeho běchu 1 000 puntow (1 170 eurow) nazběrali.
Zabłudźeny młody wjelk je w Drježdźanach-Langebrücku w płoće tčacy wostał. Zwěrjo chcyše sej před ludźimi na ležownosć wućeknyć a dósta so tak do njepřihódneho połoženja. Sobudźěłaćerjo wjelčeho běrowa wołachu hajnika a policiju. Skótny lěkar móžeše małeho wjelka skónčnje wuswobodźić. Tón so na to chětře do bliskeje Drježdźanskeje hole zminy. Je jara rědko, zo so wjelki woprawdźe do sydlišćow zabłudźa.
Publikum zajimowany a aktiwny był
Wuspěšny zhromadny wólbny forum Domowiny a Serbskich Nowin w Chróšćanskej „Jednoće“
Škit narodnych mjeńšin, strukturna změna we Łužicy pod turistiskim a serbskim aspektom, ratarstwo we Łužicy, populacija wjelkow, dwurěčne popisanje awtodróhowych taflow a změna mjenoweho prawa w Němskej na dobro Serbowkow – to su jenož někotre temy, wo kotrež je na póndźelnym zhromadnym wólbnym forumje Domowiny a Serbskich Nowin w Chróšćanskej „Jednoće“ šło. W prezidiju na prašenja moderatora a naměstnika šefredaktora Serbskich Nowin Axela Arlta wotmołwić mějachu kandidatki a kandidaća za wólby zwjazkoweho sejma, kiž nastupja we wólbnym wokrjesu 156 Budyšin. Kóždy z nich njemóžeše křižowanjow wjacorych terminow dla na forumje być, su pak zastupjerku abo zastupjerja do Chrósćic pósłali. Tak wotmołwjachu na prašenja tohorunja z publikuma a předewšěm tež serbskich młodostnych Caren Lay (Lěwica), Sabine Friedel (SPD, wona zastupowaše Kathrin Michel), Birgit Elsner (CDU, wona zastupowaše Rolanda Ermera), Lukas Mosler (Zeleni), Matthias Schniebel (FDP) a Karsten Hilse (AfD).
Proces přećiwo manageram
Braunschweig (dpa/SN). Na krajnym sudnistwje w Braunschweigu započa so dźensa chłostanski proces přećiwo štyrjom bywšim manageram a inženjeram awtotwarca Volkswagen dieseloweje afery dla. Wulkeho zjawneho zajima dla wotměwa so proces w měšćanskej hali. Wobskorženym wumjetuja mjez druhim jebanstwo z manipulowanej software w milionach awtow. Lěta 2015 wotkryty skandal płaćeše awtotwarca dotal wjace hač 32 miliardow eurow.
Laschet za wjace pomocy
Lübeck (dpa/SN). Kanclerski kandidat CDU/CSU Armin Laschet so za to wupraja, za wuwićowu pomoc w chudych krajach wjace pjenjez wudać. We „Wólbnej arenje“ telewizijneho sćelaka ARD wón wčera wječor na to pokaza, zo je Němska wudawki za to minjene lěta hižo zwyšiła. Mjezynarodne zjednoćenstwo statow bě sej 1970 předewzało, zo bohate kraje 0,7 procentow bruttodochodow za spěchowanje chudych krajow nałoža.
Biden widźi nowe wohroženje
